На свечен настан во рамките на реномираниот фестивал за кафе во Мадрид минатата недела беа прогласени најдобрите сто кафетерии во светот. На листата се најде и скопското кафуле „Дјуд спешлти кофи“ (The Dude Specialty Coffee), кое во конкуренција на 4.000 локали заврши на 63-то место. Во ова елитно друштво е само уште една кафетерија од регионот Адрија, словенечката „Црно зрно“ (Črno Zrno), на 31-то место.
Најдоброто кафе во светот се служи во „Тобис естејт кофи роустерс“ Toby's Estate Coffee Roasters во Мелбурн. Австралиja доминира на листата и е единствената земја со три кафулиња меѓу најдобрите десет. Другите две кафетерии од најмалиот континент што завршија високо на табелата се „Прауд Мери“ (Proud Mary Coffee), исто така од Мелбурн, на четвртото место, и „Кофи антолоџи“ (Coffee Anthology) од Бризбејн на осмото место.
Приватна архива
Организаторот соопшти дека најдобрите се одбрани со јавно гласање, во кое учествувале 60.000 љубители на кафе, и од седум професионални судии.
„Во нашата потрага да ги идентификуваме најдобрите кафулиња низ светот воспоставивме сеопфатен сет на критериуми за да обезбедиме темелна и правична процена. Нашата евалуација се фокусира на следните клучни аспекти: квалитетот на кафето што се служи, искуството и подготвеноста на баристите, услугата, иновацијата во работењето, амбиентот, одржливите практики и конзистентноста на производот“, пишува на официјалниот сајт.
Добра промоција, но и нов предизвик за бизнисот
Скопската кафетерија „Дјуд спешлти кофи“ е присутна на пазарот четири и пол години, а сопственикот Мирче Чашуле ни објасни како таа воопшто се нашла на оваа престижна листа. Организаторите на изборот првпат ги побарале во јули минатата година, откако претходно без да знаат ги посетил најдобро рангираниот грчки барист. Откако ги ставиле на нивниот инстаграм-профил, каде што се организирало и гласањето, во јануари и официјално ги поканиле во Мадрид за да им го доделат признанието. Чашуле сѐ уште е под импресии од настанот.
„Мадридскиот фестивал на кафе се случува трета година и претставува еден од најголемите вакви саеми во светот. Годинава првпат се организираше овој тип на селекција на најдобри кафетерии и навистина беше чест да се дели бината со сопственици на локали од целиот свет и трендсетери во индустријата. Покрај изборот за најдобри кафетерии, имаше и шампионат за баристи, печачи на кафе, шампионат во лате арт за кафе и мача, натпревари за филтерски постапки, аукции за зелено кафе, капинг-сесии, презентации на иновации на машини и целокупна опрема за печење и приготвување кафе“, раскажува тој за „Блумберг Адрија“.
Приватна архива
Тој вели дека ова признание не е само успех за неговиот тим туку и светско уважување на брзорастечката скопска спешлти кафе-сцена. Во неговата кафетерија се служат кафиња од различни региони во светот. Тие не се врзуваат за одреден бренд, туку го служат тоа што им се допаѓа.
„Во моментов увезуваме од ’Менхетн кофи ростерс’ (Manhattan Coffee Roasters) од Ротердам, една од најдобрите пржилници за кафе во светот, а на наше огромно задоволство служиме и од македонскиот производител ’Типика спешлти кофи Скопје’ (Typica Specialty Coffee Skopje)“, информира Чашуле.
Ова не е прв интернационален успех за неговата кафетерија. Минатата година „Дјуд спешлти кофи“ се најде и на листата со најдобри места за кафе на глобалниот пребарувач „Јуропијан кофи трип“ (European Coffee Trip). Овие меѓународни признанија се добра промоција, но го прашавме што реално значат за самиот бизнис. Тој посочува дека со секое признание одговорноста е поголема и дека треба навистина макотрпно да се работи на задржување на квалитетот, но и на поставување нови стандарди во работењето.
„Искрено сметам дека најголемиот дел од спешлти кофи кафетериите од Скопје можат да бидат дел од листата на најдобри кафетерии. Последниве години се случува феномен во Скопје и во Македонија, се отворија еден куп нови кафетерии и сите се трудат да наметнат свои стандарди на работење, што е одлично“, вели Чашуле.
Приватна архива
Со неговиот тим ги следат глобалните трендови, кои постојано диктираат нови иновативни техники за правење совршено кафе. Вештачка интелегенција сѐ уште не користат во нивната работа и тој смета дека за неа има повеќе простор во поставувањето на параметрите за печење и развој отколку во делот на кафе-индустријата, кој е нивна примарна дејност.
„Искрено, за мене е апсурдно роботи да служат и приготвуваат кафе. Угостителството е жива материја и сметам дека човечкиот фактор е пресуден за работата на еден угостителски објект“, вели тој.
Ќе станува ли кафето уште поскапо?
Фјучерсите за кафе паднаа најмногу во последните два месеца откако претходно достигнаа ново рекордно ниво поради загриженоста за снабдувањето. Сепак, љубителите на кафе наскоро би можеле да очекуваат ново поскапување на нивниот омилен пијалак.
„Зголемената побарувачка на кафе и влијанието на глобалните временски промени и миграциите на луѓето имаат значителен ефект во креирањето на новата цена на овој продукт. Сметам дека цената ќе оди нагоре и најголем ефект ќе почувствуваат комерцијалните производители на кафе“, вели Чашуле.
.webp){kind=icon}
Во моментов нема коментари за веста. Биди прв да коментира...