Во време кога вкусот е само почетна точка, а трендовите во гастрономијата сè повеќе се фокусираат на емоции, дизајн и искуство, една македонска иновација предизвикува голем интерес кај потрошувачите. Станува збор за солени и слатки свеќи за јадење, изум на Снежана Трајковска, кој е прв таков не само во Македонија туку и во регионот.
Во разговор за „Блумберг Адрија“ таа открива дека идејата за овој необичен производ произлегла сосема случајно, кога минатата година учествувала на AMPLE Скопје - проект за зајакнување на жените преку развој на вештини, претприемаштво и одржливи прехранбени практики, поддржан од Европската заедница за иновации во храната (EIT Food).
„Во тој период ја насочив мојата креативност кон изработка на свеќи од екосоја восок, а благодарение на менторската поддршка, класичните восочни свеќи постепено се трансформираа во јадливи. Само еден месец по пласирањето пред јавноста, тие станаа вистински гастрономски хит, создавајќи уникатно искуство за корисниците“, раскажува Трајковска.
Производот е комбинација што ретко се среќава во прехранбената индустрија, па развојот не бил едноставен. Најтешкиот дел бил да се најде балансот меѓу безбедноста, естетиката и функционалноста.
Извор: Candlelicious
„Секој од тие елементи има свои правила, а кога ги комбинираш во еден производ, компромисите се неизбежни. Од една страна, производот мора да биде целосно безбеден за јадење, што значи строга селекција на состојки и процеси. Од друга страна, како свеќа мора правилно да гори, без чадење или нестабилен пламен. А истовремено, визуелно треба да изгледа привлечно и вкусно“, објаснува нашата соговорничка, која по професија е правничка, но ужива во готвењето.
Основата на свеќите е висококвалитетен путер. Во моментов во понудата постојат две солени верзии, со сушен домат и буковец, кои имаат арома на лук и сушени зачини. Две верзии има и од слатките свеќи (чоколадна и ф’стак), а се развиваат уште неколку производи, меѓу кои се свеќа со вкус на песто и овошна свеќа. Трајковска се труди сите состојки да бидат од македонско автохтоно потекло.
Од скепса до воодушевување
Очекувано за еден ваков нетипичен производ, првичната реакција на купувачите е комбинација од љубопитност и резерва. Трајковска открива дека на почетокот луѓето сакаат да разберат како функционира тоа и дали е безбедно и вкусно, а откако ќе им објасни дека производот е внимателно тестиран, вели дека љубопитноста преминува во брзо прифаќање и ентузијазам.
„Производот создава моменти на изненадување и задоволство што ги паметат. Мојата цел беше да направам спој на семејствата, пријателите да се дружат околу свеќата, да доживеат ново хедонистичко искуство, да се тргнат од електрониката, а со тоа ја исполнувам целта за која е создадена“, појаснува таа.
Извор: Candlelicious
Комплетниот процес на изработка е деловна тајна, но како клучни елементи таа ги истакнува фитилот и изборот на зачини, затоа што директно влијаат на безбедноста и на целокупното сензорно искуство. Таа објаснува дека фитилот ги одредува начинот на горење (стабилноста на пламенот), рамномерното топење и контролата на температурата, што е особено важно кај еден производ што има повеќекратна намена. Зачините и ароматичните ноти, пак, ги издвојува како срце на доживувањето.
„Тие не служат само да создадат мирис туку и да предизвикаат асоцијации, апетит и емоции. Правилниот избор и балансирање на зачините овозможуваат производот да биде препознатлив, но и ненаметлив, со цел да ги надополни просторот и моментот. Кога овие два елемента се внимателно усогласени, свеќата не е само функционален предмет туку и комплетно мултисензорно искуство“, раскажува Трајковска.
Таа смета дека токму мултисензорните продукти се иднината на гастрономијата, затоа што, како што вели, денешниот потрошувач бара целосно искуство, а не само функција.
„Луѓето повеќе не купуваат само вкус, тие купуваат атмосфера, емоции, спомени и доживувања, токму на места каде што таквите производи имаат најголема вредност“, дополнува таа.
Извор: Candlelicious
Во моментов нејзините производи се достапни преку социјалните мрежи со директни нарачки, со почетна цена од десет евра, во зависност од големината и вкусот на свеќата.
Стартапот е во фаза на раст и структурирање, а иновацијата на Трајковска веќе станува атрактивна тема за потенцијалните инвеститори.
„Имавме разговори со неколку страни, но сè уште сѐ е во фаза на проучување на можностите за соработка. За мене е важно да обезбедам партнерства што се усогласуваат со мојата визија и одржлив пристап кон развој на производот“, вели таа.
Кога станува збор за позиционирањето на пазарот, амбициите ѝ се јасно дефинирани - премиум производ за клиенти што бараат нешто различно. Според Трајковска, тоа се урбани потрошувачи, љубители на дизајн и гастрономија, како и компании и настани што сакаат оригинални подароци со впечаток.
.webp){kind=icon}
