.webp){kind=icon}
Можеби ги нема веќе руските милијардери, а напорите да се скроти неверојатната инфлација можеби предизвикуваат стравови од глобална рецесија, сепак тоа не би го знаеле ако се гледа единствено параметарот што покажува раст во индустријата на ексклузивни јахти.
На саемот на јахти во Монако, што заврши минатиот викенд, имаше рекордни 117 изложени бродови. Таму не изгледаше како да има војна во Украина, санкции кон Русија, или дека можеби има енергетска криза, која што ја парализираше Европа.
Клучните луѓе во оваа индустрија говореа за незаситеноста од страна на побарувачката, која што се зајакнала во текот на пандемијата, бидејќи богатите одлучиле дека сопствен брод е идеален начин за бегство од карантини и инфекции. Дури и со намалувањето на стравот од пандемија, побарувачката остана голема. За само девет месеци во 2022 година, приходите на „Burgess“, еден од водечките брокери за супер јахти, пораснаа за 20 отсто во споредба со целата претходна година. што е показател за уште една рекордна година.
„Сите наши клиенти се многу богати, секогаш се чувствувале како недопирливи и моќни“, рече главниот извршен директор на „Burgess“, Џонатан Бекет. „Мислам дека пандемијата направи тие за прв пат да се чувствуваат ранливо. Тие знаат дека не се бесмртни и може да си дозволат да одат и да прават нешто навистина убаво, па зошто да не биде тоа сега веднаш?“, вака Бекет ги опишува размислувањата на нивните клиенти.
Огромната побарувачка ја направи 2021 година рекордна за светската продажба на ексклузивни јахти. Иако е малку веројатно дека тоа ќе се постигне и оваа година, продажбата уште е 68 отсто над 13-годишниот просек, според брокерската куќа „Fraser Yachts“.
Според Кевин Бодингтон, основач и извршен директор на „YachtBuyer.com“, минатата година 1.001 супер јахта од минимум 24 метри беа продадени за 9,4 милијарди евра. Продажбата годинава изнесува 567 јахти за 4,2 милијарди евра, вели тој.
„Пазарот омекнува, не толку поради недостигот од побарувачка, туку и поради недостигот од понуда. Книгата за нарачки од бродоградилиштата е прилично полна“, вели Бодингтон.
Побарувачката од Американците се зголеми повеќе отколку отсуството на руските богаташи. Според „Superyacht Times“, од 31 август сопствениците на ексклузивни јахти од САД го презедоа лидерското место според сопственичкиот удел, како во постоечката флота, така и во новоизградената флота.
Американците поседуваат 23 проценти од глобалната флота на супер јахти подолги од 40 метри, а следуваат Русите со околу 9 отсто. Останатите големи купувачи доаѓаат од Грција, Велика Британија, Турција и Италија.
Руските олигарси веќе неколку години се меѓу најистакнатите купувачи на пловила. Но, по руската инвазија врз Украина во февруари и одлуката за воведување санкции кон Русија, властите ги закотвија или запленија супер јахтите на руските милијардери, пловила вредни и по стотици милиони долари.
Бродоградилиштата кои градат нови супер јахти, главно во Холандија и Германија, велат дека имаат повеќе работа од кога било.
