Вториот најбогат Индиец ја проширува својата империја во Дубаи со уште еден договор за купување на вила на крајбрежјето, со што за само неколку месеци го собори својот претходен рекорд за најскапа зделка за станбени недвижности во градот, посочуваат извори запознаени со ситуацијата.
Мукеш Амбани минатата недела купил вила на Палм Џумеира за околу 163 милиони долари од семејството на кувајтскиот тајкун Мохамед Алшаја, посочуваат изворите кои побарале да останат анонимни, бидејќи не се овластени да зборуваат јавно.
Конгломератот на Алшаја ги поседува локалните франшизи за светски познати брендови како Starbucks, H&M и Victoria’s Secret. Амбани е претседател на Reliance Industries Ltd., најголемата индиска компанија по пазарна вредност, и има нето вредност од 84 милијарди долари.
Милијардерот откупува имоти во странство, и сè повеќе бара домови кон запад. Reliance потроши 79 милиони долари минатата година за да го купи култниот британски кантри клуб Stoke Park, а Амбани исто така бара имот во Њујорк, објави Bloomberg.
Неговата најнова аквизиција во Дубаи е поскапа авантура од домот вреден 80 милиони долари што го купи претходно годинава. Таа зделка беше најголемата продажба на имот во градот, сè додека друга вила на островот во облик на палма не беше продадена за 82,4 милиони долари.
Одделот за земјиште и недвижности во Дубаи претходно неделава објави договор за имот во вредност од 163 милиони долари на Палм Џумеира, без да го открие идентитетот на купувачот. Портпаролот на Reliance одби да коментира, а и претставниците на Алшаја не одговорија на барањата за коментар.
Прочитајте повеќе: Наплив на богаташи во Дубаи, 'цвета' пазарот за луксузни станови
Низата рекордни зделки го нагласува неодамнешниот успех на Дубаи во привлекувањето на некои од најбогатите деловни луѓе во светот. Пазарот за недвижнини во градот-држава, кој придонесува за околу една третина од неговата економија, се опоравува од седумгодишниот пад благодарение на пргавото справување со пандемијата Ковид-19 од страна на властите и иницијативите кои имаат за цел да им дадат на доселениците поголем удел во економијата.
.webp){kind=icon}
