.webp){kind=icon}
Jавните тоалети обично се надвор од видното поле и надвор од умот на минувачите сè додека не им притребаат. Oд друга страна, универзалноста и секојдневна употреба ги прават тоалетите своевиден објектив за испитување на врската помеѓу градовите и животните стилови во нив, при што секој ваков простор раскажува приказна за текот на времето.
Но, има и земја каде што тоалетите се ценат и отворено се дискутира за нив, а тоа е Јапонија. Ваквата посветеност го инспирирала германскиот режисер Вим Вендерс да направи нов филм за јавните тоалети во областа Шибуја во Токио.
Тоалетите кои се инспирација за филмот се дел од уметничкиот проект The Tokyo Toilet, во кој биле ангажирани 16 светски познати дизајнери за да обноват 17 јавни тоалети во главниот град. Целта на проектот била да се елиминираат негативните стереотипи за јавните тоалети со иновативен дизајн, модерна опрема и внимателно одржување, со цел да се истакнат квалитети како што се чистота, педантност и необичност кои типично се поврзани со Јапонија.
Инспириран од предизвикот за зачувување на заедничките простори, режисерот добитник на Оскар, како протагонисти ќе ги вклучи луѓето кои се дел од посветениот персонал за чистење на The Tokyo Toilet, а има улога резервирана и за јапонскиот актерски ветеран Коџи Јакушо од „Shall We Dance?” и „Babel”.
„Ако успееме да ги одржиме новите тоалети убави и чисти, секој од овие тоалети ќе стане огледало што ќе го одразува прекрасниот дух на Токио“, се вели во извештајот за филмскиот проект.
Јапонските тоалети напредуваат заедно со технолошката и економската моќ на земјата. Во 1980-тите, производителот на тоалети „Тото“ го воведе електронскиот Washlet, рафинирана верзија на американско биде наменето за болнички пациенти со хемороиди.
Washlet сега е речиси синоним за јапонската култура и се извезува низ целиот свет, бидејќи сè повеќе луѓе ја посакуваат удобноста и чистотата на производот, особено за време на пандемијата на коронавирус. Денес, 80,3% од јапонските домаќинства имаат тоалет како Washlet, а тие исто така се присутни и во хотелите, рестораните, стоковните куќи, па дури и во јавните тоалети како Tokyo Toilet.
