.webp){kind=icon}
Дилер на уметнички дела во Палм Бич, Флорида е обвинет за измама и перење пари преку наводно продавање фалсификувани дела од славни уметници како Жан Мишел Баскијат, Енди Ворхол, Бенкси и Рој Лихтенштајн на клиенти кои воопшто не се посомневале.
Даниел Ели Буазиз, француски државјанин роден во Алжир, наводно ги продавал делата од неговите галерии „Даниели Фајн Арт“ (Danieli Fine Art) и „Галери Даниели“ (Galerie Danieli) лоцирани на престижната градска авенија Ворт, објави во петокот американското обвинителство за јужниот округ на Флорида во соопштение испратено преку електронска пошта.
Некои од измамничките парчиња биле евтини репродукции кои биле продадени за десетици или стотици илјади долари како оригинални дела.
Буазиз е обвинет дека купувал евтини репродукции од онлајн аукции и потоа ги продавал како оригинални и автентични слики. Тој, наводно, ги мамел жртвите со фалсификување на историјата на сопственост на уметничките дела и додавал потписи за делата да изгледаат автентични.
„Буазиз им се претставувал на жртвите како официјален проценител и експерт за уметност“, се вели во кривичната пријава, во која се истакнува примерот кога тој наводно продал репродукција на Ворхол од 100 долари за дури 85.000 долари, тврдејќи дека е вистинска.
Органите на редот успеале да ги идентификуваат жртвите кои купиле фалсификувани дела од Буазиз, а агентите исто така извршиле тајно купување на слика за 25.000 долари. Во друг пример, агентите користејќи биткоини оставиле аванс на колекција со посочена вредност од 22 милиона долари.
Буазиз првично се појавил пред сојузен судија во Вест Палм Бич во петокот, се вели во соопштението.
Канцеларијата на ФБИ во Вест Палм Бич и ИРС-ЦИ (IRS-CI) Мајами и натаму го истражуваат овој случај.
