.webp){kind=icon}
Олимпискиот спринтер од Јамајка, Усеин Болт, бил шокиран кога открил дека недостасуваат 12 милиони долари од сметката што ја имал во инвестициската фирма „Стокс енд секјуритис“ (Stocks and Securities), со седиште во Кингстон, објави неговиот адвокат.
Неодамна на Болт му било кажано дека на сметката преостануваат само околу 12.000 долари, изјави адвокатот Линтон П. Гордон во телефонски разговор. Сметката била дел од животните заштеди на пензионираниот атлетичар.
„Тоа би било вознемирувачка вест за секого“, рече Гордон во средата. „Секако и за г-дин Болт, кој ја основа оваа сметка како дел од неговата приватна пензија“.
Комисијата за финансиски услуги на Јамајка во вторникот соопшти дека поставила сопствен привремен менаџер во „Стокс енд секјуритис“, по извештаите за наводи за измама што и претходно ја натераа комисијата да ја стави банката под засилен надзор.
Од приватната фирма веднаш не одговориле на барањата за коментар.
Гордон рече дека регулаторите не комуницирале со него или со неговиот клиент. Ако Болт не ги добие парите во рок од осум дена, Гордон вели дека планира да покрене случај пред Врховниот суд во Кингстон.
Болт, освојувач на осум олимписки златни медали, се смета за најбрзиот човек на светот, држејќи светски рекорди во трките на 100 и 200 метри. Во понеделникот, Болт на својот твитер профил цитираше стихови кои делумно гласат: „Историјата на злото... Што е коренот?... ПАРИТЕ“.
