.webp){kind=icon}
Кога Поли Ероусмит требало да земе одмор од работа во нејзината ИТ компанија за да се грижи за својата мајка пред умирање, таа побарала од еден од нејзините колеги да ја заменува додека е отсутна. Во исто време, му оставила важна задача. Морал да отпушти една вработена со незадоволителен учинок пред одреден рок, бидејќи потоа исплатата на отпремнина би станала задолжителна.
Тој се согласил, но не споменал една клучна работа. Имал тајна врска со таа личност.
Кога Eроусмит се вратила на работа по неколку месеци, била шокирана кога открила дека отпуштањето не се случило. Нејзиниот колега не можел да ја отпушти жената што ја сака, па Ероусмит морала сама да го стори тоа, секако со отпремнина.
„Тоа беше огромно предавство на довербата. Се чувствував како идиот бидејќи голем дел од мојот персонал знаел што се случува, а јас не знаев“, рече Ероусмит.
И покрај деликатните и потенцијално тешки последици од љубовта на работа, ваквите ситуации се вообичаени откако жените во 20 век почнаа повеќе да учествуваат во работната сила.
Во средината на 90-тите, едно истражување покажа дека секој четврти Американец имал афера на работа. Лос Анџелес Тајмс во 1995 година објави дека телекомуникациската компанија AT&T меѓу своите 250.000 работници има осум илјади вработени кои се брачни партнери.
Но, не сите врски се во рамки на брак.
Брачна советничка во својата книга од 2004 година објави дека до 1990 година, 38 проценти од жените кои ги изневерувале своите сопрузи се гледале со некого од работа. Во 90-тите таа бројка се искачила на 50 отсто.
Bloomberg Mercury
Ниту во Британија не е поинаку. Истражување од 2022 година покажа дека секој четврта личност признала дека има романтична врска на работа.
„Со собирањето на податоците, ми стана јасно дека ова не е специфично за еден сектор или индустрија, туку дека тоа се случува насекаде“, вели Тина Чандер од адвокатската фирма „Врајт Хасал“ (Wright Hassall), која ги собирала податоците.
Кога врската оди добро, има смисла дури и да ја охрабруваме, бидејќи анализите покажуваат дека наоѓањето љубов на работа може да ја зајакне љубовта кон самата позиција и со тоа да го зголеми работниот морал и продуктивноста.
Такво искуството имала 36-годишната Ема Холингсворт, која го запознала својот 37-годишен сопруг Ричард пред 15 години на третиот ден од тренингот во рамки на Сити во Лондон.
Вели дека заедничката работа во текот на следните неколку години го направила работното место многу попријатно и дека можеле да ги координираат нивните дневни распореди. Сега двојката има три деца.
Губење на популарноста
Но, постојат и знаци дека романсите на работа ја губат популарноста. Додека 21 отсто од Американците на возраст меѓу 50 и 64 години изјавиле дека нашле партнер на работа, само 13 отсто од младите на возраст меѓу 18 и 29 години можат да го кажат истото.
Ова можеби и не е толку изненадувачки бидејќи денеска постојат мал милион начини за запознавање. Освен тоа, една петтина од оваа група млади луѓе ги пронашле своите партнери на онлајн, според студијата на Истражувачкиот центар „Пју“ (Pew Research), тинк-тенк во Вашингтон кој се занимава со социјални прашања.
И културолошките промени прават разлика. Движењето „Ми ту“ (#MeToo) влијаеше на перцепцијата за тоа што е прифатливо на работното место, па дури и кога има взаемна согласност за врска, некои компании не го одобруваат тоа.
На пример, во февруари 2022 година, претседателот на Си-ен-ен (CNN), Џеф Цукер, поднесе оставка откако беше откриена долгорочна консензуална врска на работа. Слично нешто му се случи на извршниот директор на „Мекдоналдс“ (McDonald's), Стив Истербрук во 2019 година.
Но, има толку многу случаи на грди ситуации околу врските на работа, што постојат компании кои се занимаваат со ублажување на деловните ризици од ваквите љубовни проблеми.
Енди Коли од компанијата „Профешнал баундерис“ (Professional Boundaries), која се занимава со поправање на состојбите кога ќе пропадне врска на работно место, вели дека еднаш бил повикан да посредува во љубовниот триаголник кога жена во брак со еден вработен останала бремена од друг.
„Луѓето можат да имаат афери на работа, но во ваков случај може да изгубите 20 отсто од работната сила одеднаш поради љубовен триаголник“, вели Коли.
Најважниот совет што го дава на тренинзите е луѓето добро да размислат за тешкотиите кои можат да настанат поради заљубувањето на работа и да навлезат подлабоко во врската доколку се навистина сигурни во нејзината издржливост. Тој вели дека треба да си поставувате прашања како „што е тоа кај оваа личност што ме привлекува?“ и „дали би било исто ако не работиме заедно?“.
Коли, се разбира, генерално не е против врските на работно место. На крајот на краиштата, тој самиот ја запознал сопругата на тој начин.
Тој исто така додава дека врските се неизбежни поради времето што луѓето го минуваат заедно на работа.
„На работни места со многу луѓе, врски сигурно ќе се случат. Имам обука за 120 луѓе во јули и ви гарантирам дека некој ќе заврши во врска“, вели Коли.
Загарантирана приватност
Ако сте шеф кој стравува од романтични ситуации на работа, може да се најдете во искушение да го оневозможите тоа. Но, законски тоа е тешко да се спроведе во Британија, бидејќи луѓето имаат право на приватност и на работа.
Можеби затоа би било поадекватно да се воведе обврска за известување на шефот дека сте во интимна врска на работа, се разбира со коректен и дискретен пристап.
Мет Гинџел, адвокат во областа на работните односи, вели дека негативните ефекти од романтиката на работа може да се менаџираат според постоечките правила, па ако перформансите страдаат поради проблеми во врската, работодавецот има право да спроведе процес за проверка на учинокот.
Но, врска со претпоставен или подреден во деловната хиерархија е многу веројатно да доведе до проблеми бидејќи може да создаде перцепција за нефер ситуација.
„Имаше случаи кога моравме да седнеме со двојката и да им укажеме дека поради природата на врската не е соодветно да продолжат да работат во истите улоги и баравме да предложат решенија“, вели Рејчел Ган, кој се занимава со советување во ситуации на конфликт на интереси.
Но, повторно, би било тешко да се истуркаат луѓето од нивната позиција само поради постоењето на врска, бидејќи прво треба да се докаже некоректноста на ситуацијата.
Искуството на Ероусмит на почетокот на приказната покажува до каде може да оди несоодветноста кога шеф и вработен се во врска. Сепак, оваа ситуација на крајот не ѝ наштетила на споменатата двојка.
„Тие се венчаа и сè уште се заедно, колку што знам. Има смисла да се најдеш во таква ситуација на работа ако на крајот ја пронајдеш вистинската личност“, вели Ероусмит.
