Појавувајќи се на Канскиот филмски фестивал ден по премиерата на својот прв филм по три години, Џони Деп во средата изјави дека веќе „не чувствува потреба“ од Холивуд.
Ова беше ретко појавување на актерот во јавност, со цел да го промовира „Жан ду Бери“ (Jeanne du Barry) и да одговара на прашања по премиерата на филмот, во кој Деп го игра кралот Луј XV. Францускиот филм, во режија на Мајвен, која ја толкува и главната улога, и со Деп, кој за потребите на филмот зборува француски, е првото остварување на актерот откако поротата минатата година главно застана на негова страна во правната битка со поранешната сопруга Амбер Херд.
Дел од аргументите на Деп во тој судски процес беа дека изгубил понуди за работа поради наводите на Херд. На Херд ѝ беше наложено да му плати на Деп отштета од 10 милиони долари, со што се оправдаа неговите наводи дека таа лажела оти ја малтретирал пред и за време на нивниот краток брак. На Херд ѝ беа доделени два милиона долари.
„Дали се чувствувам бојкотирано од Холивуд? Во ваква ситуација треба да немате пулс за да речете 'не'. Ништо од ова не се случува. Ова е една чудна шега“, им рече Деп на новинарите. „Кога од вас ќе биде побарано да се повлечете од филмски проект на кој работите поради нешто што е чудна комбинација на самогласки и согласки што лебдат во воздухот, да, се чувствувате бојкотирано“.
Најзначајниот проект во кој беше побарано од Деп да се повлече е спиноф-франшизата на „Хари Потер“ „Фантастични ѕверови“ (Fantastic Beasts). Сега, сепак, тој вели дека не е заинтересиран да се врати во студиски проекти.
„Не се чувствувам бојкотирано од Холивуд, бидејќи не размислувам за Холивуд. Јас самиот веќе немам потреба од Холивуд“, рече Деп. „Ова е чудно, смешно време, кога сите сакаат да бидат свои, но не можат. Тие мора да одговорат на очекувањата на личноста пред нив. Ако сакате да живеете таков живот, ви посакувам сè најдобро“.
„Жан ду Бери“ беше премиерно прикажан во вторникот во француските киносали. Засега нема дистрибуција во САД.
Прес-конференцијата на филмот беше еден од најголемите циркуси во последниве години во Кан. Започна невообичаено доцна и присуствуваа Мајвен и другите членови на актерската екипа, но не и Деп. Тој пристигна по околу 20 минути и брзо го привлече вниманието.
Најголемиот дел од она што е напишано за него во последните години, Деп го нарече „фантастично, ужасно напишана фикција“.
„Тоа е како некому да му поставите прашање 'Како си?', но поттекстот е 'Леле, колку те мразам'“, рече Деп.
.webp){kind=icon}
