.webp){kind=icon}
Туристичките власти на островот Улко-Тамио во Финска настојуваат да создадат „остров без телефон“, место каде што посетителите ќе можат целосно да ги исклучат своите уреди и да уживаат во мирот и убавината на островот. Оваа идеја е одговор на растечката потреба на патниците да се откажат од дигиталната технологија и да се поврзат со природата, известува Лебавит Лили Гирма за „Блумберг“.
Улко-Тамио не е единствениот пример што потврдува дека сè поголем број патници избираат скриени места во природа за да доживеат дигитална детоксикација, да уживаат во автентични искуства и да го избегнат метежот на популарните туристички дестинации. Наведуваме неколку предлози за малку поинакво летно освежување во Европа. Не сме сигурни дека ќе можете да издржите да не го вклучите телефонот за да ги сликате незаборавните пејзажи. Нема да ве обвиниме ако сепак одлучите да го вклучите телефонот за да сликате понекој пејзаж.
Ардмор е приморско рибарско село во округот Ватерфорд, Ирска, недалеку од Југал на јужниот брег на Ирска. Тоа е само едно од многуте места каде што можете да уживате во свежи летни денови, песочна плажа на брегот на Атлантикот и најмалку педесет нијанси на зелено што ги нуди овој остров. Местото има само околу 430 постојани жители, кои секако се зголемуваат во текот на туристичката сезона. Еден од најпрефинетите луксузни бутик-хотели во регионот и во самата Ирска е хотелот „Клиф хаус“, сместен на карпа на брегот. Тој е пример за класична локална архитектура, со мов на покривот и келтски мотиви на теписите. Од сончевите тераси и балкони на секоја соба се гледаат кошници за јастози и игра на делфини во водата. Во ова живописно место во срцето на ирскиот гастрономски регион може да се ужива во некои од најдобрите ресторани во земјата - вклучувајќи го и тој на „Мишелин“ во самиот хотел. (Цена од 1.000 евра на ден, cliffhousehotel.ie).
Местото Екс-ле-Бен е познато како алпска ривиера поради неговата локација во близината на Лак ду Бурже, најголемото природно езеро во југоисточниот дел на Франција, во регионот Савоја. Традиционално ги привлекува сите оние на кои прва одредница за одмор им е мирот. На влезот во гратчето, доволно блиску до езерото, но и пристојно далеку од другите туристички објекти, се наоѓа „Шато Браше“, историската куќа на д-р Леон Браше, попознат како „кралскиот лекар“ и клучна фигура во регионот на крајот на 19 век. Овој дворец е опкружен со дива природа, врвовите на планината Дент ду Чат, видиковецот Ла Шамбот, опатијата Хаутеком и кањоните на клисурата Сиероз. Гостите можат да уживаат во 18-метарски отворен базен, терени за тенис и падел, крикет, бадминтон и одбојка и голф. (Цените за сместување почнуваат од 210 евра по лице, chateaubrachet.com)
Природниот базен Кали е еден од најскапоцените бисери на националниот парк Балатон во Унгарија. Ресортот „Кали арт ин“ е сместен во овој уникатен природен резерват, во селото Ковескал, кое во своето име го чува споменот на семејството Кал и познатите производители и трговци на вино што се населиле тука во текот на 17 век и чии вина биле популарни сѐ до Виена. Во тој период се изградени двете главни згради на „Кали арт ин“ и некои од помошните згради. Трите апартмани задржале голем број елементи од првобитното издание, со многу рустични детали. Осум стандардни соби се наоѓаат во новоизградената камена куќа во градината, која ја красат бадемови стебла. На јужната страна на градината има посебна куќа за гости со две спални соби, дневна и кујна. (Цената на сместувањето започнува од 200 евра на ден за стандардна соба, kaliartinn.hu).
На северот на Италија, хотелот „Еремус релеис“ нуди седум приватни апартмани со прекрасен поглед на езерото Гарда. Опкружен со чемпреси и ридови покриени со винова лоза, како и градини со цитруси и лаванда, „Еремус релеис“ е совршено место за одмор. Акцентите од природно дрво и оригинални архитектонски карактеристики од 16 век, кога оваа зграда била манастир, се модернизирани со базен и софистициран ентериер. (Цените започнуваат од 350 евра на ден по апартман, eremusrelais.com)
Рајското прибежиште во највозвишениот дел на Таормина, хотелот „Вила Карлота“ всушност е резиденција изградена во 1860 година за локално аристократско семејство. Со величествениот поглед на морето и на Етна, волшебните градини, одличните сицилиски ресторани и отворениот базен, како и топлите земјени бои и антиквитети, ова место на гостите им нуди автентичен сицилиски шарм.
За тоа во голема мера придонесува Андреа Квартучи, кој заедно со другите членови на семејството трансформирал три историски вили во елегантни места за удобно бегство. Престојот во Таормина со Квартучи значи да се доживее градот како локален жител: од разгледување на старинска веспа „андреа“ до риболов на тајни места на семејниот брод. Но семејниот момент не е само италијанска „работа“.
Во скриеното одморалиште „Каза де Мондо“ во ридовите Боликејме, на југот на Португалија, скулпторот Мондо и неговата сопруга Хариет Пена споделуваат со посетителите љубов кон уметноста и природата, традиционални локални специјалитети и освежување во тишина и приватност. Оваа „куќа“, која многу брзо почнувате да ја доживувате како свој дом, се состои од три комфорни колиби, базен и кујна со традиционален изглед со голема маса, каде што сите се како семејство.
Casa De Mondo: Олдтајмер за разгледување со стил
Depositphotos
Само 25 минути од аеродромот „Фаро“ и 15 минути од плажа, но секако далеку од метежот. Ако сакате да го обиколите Златниот триаголник: од Боликејме до Албуфеира и Фаро до Виламура, Квинта де Лаго и пошироко, тоа можете да го направите со олдтајмерот што сопственикот го оставил на располагање за своите гости. (Наемот за сместување започнува од 100 евра на ден, casedemondo.com)
Бидејќи обично лично се грижи за барањата на своите гости, кои ги смета за пошироко семејство, една од првите личности што ќе ги запознаете во хотелот „Кристијанија Лех“ во местото Лех на австриските Алпи е Гертруд Шнајдер, сопственичка и менаџерка. Како ќерка на првиот австриски олимписки шампион во алпско скијање и основач на хотелот, Отмар Шнајдер, Гертруд добро ја познава магијата на австрискиот „Sommerfrische“ (летен одмор). А во „Кристијанија“, тоа претставува врв на креативноста и квалитетната услуга. Батлерите ќе се погрижат за секоја ваша потреба (и за потребите на вашето милениче) – и ќе организираат разни активности на отворено: романтично кино под ѕвезди, пикник на планинска ливада, посета на локални винарници. И нешто по што е карактеристичен овој хотел: „Хоенфлуг“ - изложбен простор што во соработка со уметничката галерија „Штурм енд Шобер“ од Виена ги претставува врвните современи уметници Беатриз Олано, Џералд Мосера, Ванеса Хен и многу други. (Цените за изнајмување соба започнуваат од 470 евра, kristiania.at)
На границата на Чешка и Моравија, дворецот „Хералец“ се наоѓа во истоименото село, на само 20 минути возење од градот Хавличков Брод и на исто растојание од Јихлава, главниот град на регионот. Дворецот е национален културен споменик, еден од најубавите замоци и најромантичните градби во Чешка. Иако станува збор за историска градба што потекнува од 12 век, одлично нешто за ова уникатно одморалиште е опсегот на услуги што ретко се среќаваат на едно место: од мени за перници (можете да изберете помеѓу перници од пердуви од гуска со различна цврстина и големина, антиалергиски и анатомски перници од различни видови и големини), сеопфатен спа-центар „Локситан“, до разни активности во природа, како јавање коњи, капење во рибници, риболов, изнајмување велосипеди. Кога ќе го посетите „Шато Хералец“ и ќе изберете една од прекрасните соби, сигурно ќе го почувствувате присуството на сопственичката Александра Каспарова во секој детаљ. Отмената атмосфера и посветеноста на врвната удобност се инспирирани од нејзините сопствени аристократски корени, со потекло од Холандија и Русија. (Цената за апартман започнува од 280 евра на ден, chateauheralec.com)
