.webp){kind=icon}
Пред десет години речиси никој не би поверувал дека повеќе од милион луѓе ќе купат часовник што не само што го покажува времето туку и чита текстуални пораки, ја проверува временската прогноза и го следи бројот на чекори. Но се случи токму тоа. Денес носечките уреди презедоа и многу нови улоги - вклучувајќи и помош за спиење. Со порастот на проблемите поврзани со спиењето и зголемената свест за важноста на квалитетниот сон, носечките уреди се позиционираа како потенцијални решенија. Со оглед на тоа што сѐ повеќе луѓе се соочуваат со проблеми поврзани со спиењето, практичноста и потенцијалната ефикасност на носечките помагала за спиење нудат трошка надеж за оние што трагаат по квалитетен ноќен одмор. Додека се обидуваме да ги затвориме очите и да не размислуваме за утрешниот состанок, тие вредно собираат податоци и го анализираат секој наш потег. Така, тие им овозможуваат на корисниците подобро да ги разберат своето тело и навиките за спиење, за да преземат соодветни чекори кон подобрување на квалитетот на спиењето. Овие уреди исто така следат различни физиолошки параметри, како што срцевиот ритам, телесната температура, движењата на телото и нивото на кислород во крвта во текот на ноќта. Врз основа на овие податоци, тие обезбедуваат детални информации за квалитетот на спиењето и обликуваат персонализирани препораки за да се постигне подобар сон. Но постојат и такви решенија што се потпираат на моќта на ритуалите.
Паметна маска за спиење Illumy | Sound Oasis/Instagram
Репродуцирајќи го природниот ритам, паметната маска за спиење „илуми“ (Illumy) користи светла што ги имитираат мозочните реакции на спиењето, користејќи технологија развиена од НАСА за да ги релаксира астронаутите. Смирувачките сини нијанси доведуваат до длабок сон, додека суптилните црвени светла будат нежно. Таа чини околу 40 долари.
„Брео ајси4“ (Breo iSee4) им помага на уморните очи да се релаксираат како претерано истегнати мускули. Преку мали пулсирања на топол воздух, овие уреди ги масираат очните капаци за да ги ублажат напнатоста, отокот и притисокот врз синусите и нежно да предизвикаат длабок сон. Со нежни рабови и удобни перничиња, уредот е доволно комфорен за да се опуштат дури и оние што спијат настрана. Чини 182 евра.
Паметна маска за спиење Breo iSee4 | Breo/Instagram
За оние што внимаваат на стилот, особено е интересна серијата носечки уреди што доживуваат експанзија во светот и се тренд број еден кога станува збор за благосостојбата. Третата генерација на прстенот „оура“ (Oura) е носечки уред за следење на спиењето што надгледува импресивна низа податоци за вас, за да ги оцени вашиот сон и дневна активност. Неговиот модерен и лесен дизајн го прави еден од најатрактивните носечки уреди за следење на спиењето и поради тоа им е омилен сојузник на славните и на модната јавност.
Прстенот следи различни параметри за да ги оцени вашиот сон и дневни активности. Со сензори што ги мерат срцевиот ритам, телесната температура и нивото на кислород во крвта во текот на денот и ноќта, „оура“ им дава на корисниците драгоцени информации за квалитетот на спиењето, одморот и физичката активност во текот на денот. Овој уред не само што дава увид во спиењето туку дава и препораки за подобрување на спиењето, што е од суштинско значење за оние што се борат со несоница.
Прстени Oura | Oura/Instagram
Прстенот е достапен во четири бои - сребрена, црна, стелт (темносива) и златна. Батеријата трае од четири до седум дена, што е натпросечен век на батерија во споредба со другите уреди за следење. За да пристапите целосно до функциите на прстенот „оура“, мора да ја преземете апликацијата и да купите месечно членство. Членството е бесплатно шест месеци, а потоа чини 5,99 долари месечно. Цените за прстенот почнуваат од 299 долари, па нагоре.
Ако, пак, повеќе сакате да носите белезици, белезицата за спиење „филип стајн“ (Philip Stein), која користи технологија на природна фреквенција (Natural Frequency Technology®) за да им помогне на корисниците да спијат подобро и да бидат свежи за новиот ден, може да биде адекватно решение. Оваа иновативна белезица се става на раката 15-20 минути пред спиење за да почне да работи. Она што е особено примамливо е тоа што за овој уред не требаат батерии и доаѓа со удобен „појас за пижами“ од микровлакна, кој ѝ овозможува на кожата да дише во текот на ноќта.
Белезица за спиење Philip Stein | Philip Stein/Instagram
Белезиците за спиење „филип стајн“ користат технологија на природна фреквенција што го зајакнува човечкото биомагнетно поле и може да им помогне на тие што го носат да ги намалат негативните ефекти од џетлег, како што се замор или вртоглавица, се наведува на официјалната онлајн презентација на овој бренд.
На многу сличен принцип работат и часовниците „галакси воч 6“ (Galaxy Watch6) и „галакси воч 6 класик“ (Galaxy Watch6 Classic), кои „Самсунг електроникс“ неодамна ги претстави во земјите од регионот Адрија. Серијата „галакси воч“ сега нуди детална анализа на резултатите од спиењето - вкупното време на спиење, циклусите на спиење, времето на будење, како и физичкото и менталното закрепнување - за да им помогне на корисниците да го разберат квалитетот на спиењето.
Galaxy Watch6 | Samsung/Instagram
Индивидуалните пораки за спиењето, развиени во соработка со фондацијата „Нешнал слип“, исто така им даваат на корисниците детални повратни информации за нивниот начин на спиење. „Галакси воч 6“ има модерен минималистички дизајн. Тој доаѓа во големина од 44 мм во графитна и сребрена боја, како и во големина од 40 мм во графитна и златна боја. „Галакси воч 6“ ќе биде достапен по препорачана малопродажна цена од 319 евра за блутут-верзијата и 369 евра за ЛТЕ-верзијата.
Часовникот „галакси воч 6 класик“ се карактеризира со омилената ротирачка рамка и е достапен во црна и сребрена боја, во големини од 43 и 47 мм, а ќе биде достапен по цена од 419 евра за блутут-верзијата и 469 евра за ЛТЕ-верзијата. Часовниците се достапни за претпродажба кај овластените партнери на „Самсунг“.
Barisieur | Joy Resolve/Instagram
Што ако неопходниот придвижувач на денот подразбира одредени ритуали, од кои на многумина им е омилен оној со уживањето во мирисот на шолја кафе? Алармот „барисие“ (Barisieur) за приготвување кафе или чај го комбинира најдоброто од двата света - традиционалниот ритуал и модерната технологија. Станува збор за уред што буди постепено, со звук на зовриена вода и мирис на свежо сварено кафе или чај. Тој се програмира однапред за да помогне во воспоставувањето рутина пред спиење, што е важен чекор кон повторно воспоставување на природните циклуси и навики на спиење.
Проектот заживеа благодарение на собирањето средства од повеќе од 2.000 непознати луѓе во светот во кампањата на овој стартап во 2016 година. Задоволството да уживате во однапред приготвена шолја со вашиот омилен пијалак чини 345 фунти.
