„Ембраер феном 300“ (Embraer Phenom 300) ја презеде титулата на најкористен приватен авион во САД, соборувајќи ја водечката позиција на „цесна сајтејшн ексел“ (Cessna Citation Excel), која ја држеше 15 години. „Феном 300“, млазен авион со средна големина што собира до девет патници, направи повеќе од 360.000 полетувања и слетувања на американските аеродроми во текот на последните 12 месеци до август. Тоа е околу 1.400 повеќе полетувања и слетувања во однос на семејството на авиони „цесна сајтејшн ексел“. „Ексел“ беше најкористениот приватен млазен авион околу 15 години, според месечниот извештај на Федералната управа за авијација за операциите на деловните млазни авиони.
„Феном 300“ стана популарен бидејќи троши помалку гориво, чини трипати помалку, а нуди поголема брзина и досег од „сајтејшн ексел“, изјави Брајан Фоли, консултант за приватна авијација. Тие атрибути се голема компензација за помалиот простор во кабината кај „феном 300“, наведе тој во мејл.
„’Феном’ стана омилен меѓу понудувачите на чартер-летови, кои го користат многу повеќе од просечните оператори на авиони“, изјави Фоли. Постои „перцепција дека е наменет за честа употреба поради долгогодишното наследство на ’ембраер’ како производител на патнички авиони“.
Во мај компанијата „Нетџетс“ на „Беркшир хетавеј“ (Berkshire Hathaway Inc.'s NetJets), најголемиот оператор со приватни авиони, објави договор вреден 5 милијарди долари за купување до 250 авиони „ембраер претор 500“ (Embraer Praetor 500), кои се поголеми од „феном 300“ и вклучуваат и услуга. Минатата година единицата за приватни авиони сочинуваше околу 27 отсто од вкупната продажба на „ембраер“ од 4,2 милијарди долари.
Со исклучок на периодот кога сега веќе укинатиот „хокер 800“ (Hawker 800) беше водечки приватен авион во САД во 2007 и 2008 година, таа титула ја држеше авионот на компанијата „Цесна“ (Cessna), според податоците на Федералната управа за авијација што датираат од 2001 година.
Иако „ембраер“ сега има право да се пофали дека е производител на најкористениот приватен авион во САД, „Текстрон“ (Textron) сè уште доминира во вкупните часови на летање, благодарение на широкиот спектар на авиони, од многу лесни авиони до суперсредната големина на „лонгитјуд“ (Longitude). „Цесна“ работи и на освежување на семејството „ексел“ со моделот „сајтејшн есценд“ (Citation Ascend), кој се очекува да стапи во употреба во 2025 година, соопшти компанијата.
„Еден од секои три деловни авиони во светот е ’цесна сајтејшн’, а подобрувањата на производите како што е овој продолжуваат да им даваат на клиентите нови причини да нѐ изберат нас поради нашите докажани перформанси, водечката технологија и уникатното искуство во кабината“, наведе „Текстрон“ во мејлот.
.webp){kind=icon}
