Погледнете ја листата на моментално најскапите недвижности во Хрватска

Најскапата недвижност што моментално се огласува во Хрватска е вила вредна 15 милиони евра во Опатија, а првото место го дели со уште една модерна вила во околината на Мотовун.

Кварнер и Истра доминираат во остатокот од рангирањето на највредните недвижности на хрватскиот пазар. Тука има сѐ, од бајковит камен комплекс со две вили и базен во Канфанар до хотели кај Цриквеница и Ловран, но Опатија традиционално е лидер по понудата и цените.

Токму таму, на улицата Маршал Тито бр. 169 се наоѓа споменатата вила со базен, која се простира на речиси 2. 500 квадратни метри, од кои околу 1.400 квадратни метри се станбена површина. Секако, се наоѓа во првиот ред до морето, има 11 соби, 10 бањи, четири кујни, базен, вежбалница, опремена е со блиндирани врати и прозорци, а во цената од 15 милиони евра се вклучени и лустери „сваровски“.

njuškalo.hr

За слична сума од нешто малку повеќе од 113 милиони куни, ако ви е полесно така да замислите, се продава и вила во околината на Мотовун, на адресата Канал бр. 40, која на приземје има дневна, кујна, тоалет и трпезарија со пристап до тераса, додека на првиот и вториот кат има по две соби со бањи. Секој кат има сопствен балкон со поглед на дворот со базен и скара, а се продава комплетно опремена со мебел.

index oglasi

Следна на листата е луксузна новоградба, повторно во центарот на Опатија, на улицата Милева Сушан 7/1 до 7/5, со 15 стана, од кои секој има пространа тераса, односно приватна градина на приземје, а повеќето од нив имаат поглед на морето. Зградата со вкупна станбена површина од 2.200 квадратни метри се наоѓа на парцела од над 1.000 квадратни метри и се состои од четири надземни ката и подземна гаража.

Во огласот посочуваат дека „сите станови се опремени со најмодерни, најквалитетни и најздрави елементи за ентериер, модерен безбедносен систем, најбрз оптички интернет и со врвна топлинска и звучна изолација, а самата зграда може да се пофали со најквалитетна фасада со највисоки еколошки градежни стандарди и енергетски сертификат А+“.

Сето тоа ќе ве чини 10,5 милиони евра.

njuškalo.hr

Следува вила во околината на Рабац, поточно во Дуга Лука, на адресата 7C, која исто така се наоѓа во првиот ред до морето, со станбена површина од над 500 квадратни метри, со уште 2.500 квадратни метри градина. Може да биде ваша за околу осум милиони евра, но на кои клиенти целат продавачите јасно се гледа од огласот објавен на германски јазик.

Има приватен понтон за бањање и сончање, односно за прицврстување јахти и официјално е категоризирана со пет ѕвезди. Покрај веќе стандардниот базен и вежбалница, има и велнес, сала за билјард, центар за видеоигри, простор за скара и трпезарија на отворено на каскадно уреден терен, кој нежно се спушта кон морето. Тука има исто така и паркинг за три-четири автомобили. Единствено што е невообичаено е што со сиот овој луксуз, продавачот решил огласот да го објави без фотографии.

За сума од осум милиони евра можете да купите и цел комплекс реновирани камени куќи во близината на Канфанар, во населбата Барат, на адресата 36. Всушност станува збор за две вили и две помошни згради што се наоѓаат на парцела од речиси 3.000 квадратни метри, опкружена со сувоѕидица.

Поголемата вила од околу 900 квадратни метри се состои од седум пространи спални соби и бањи, три тоалети, дневна соба од 86 квадратни метри, балкон, базен, винотека, кујна, шест паркинг-места. Од друга страна, помалата вила има 450 квадратни метри и четири големи спални соби со бањи, еден тоалет, базен, кујна и дневна соба од 62 квадратни метри.

Помошните згради се опремени со две сауни, вежбалница, билјард, пет камини и фурна за леб, станици за полнење е-возила, а сите простории имаат подно греење.

njuškalo.hr

Во Селце кај Цриквеница, на улицата Емил Антиќ бр. 73, се продава хотел покрај морето со 60 соби на седум ката, базен, фитнес-центар, сауна, ресторан, кафуле и сите други содржини потребни за класификација со четири ѕвезди.

Изграден е во 2003 година, а реновиран во 2014 година, отворен е во текот на целата година и доаѓа со градина од речиси 4.000 квадратни метри.

Тој е намален од десет милиони евра на осум, па е вистинска можност за оние со длабок џеб што имаат желба да се пробаат во угостителството.

njuškalo.hr

Списокот го завршуваме со резиденцијалната населба во Пореч, каде што на Матерад, само на 70 метри од морето, се градат пет луксузни вили во низа, со површина од 180 до 240 квадратни метри.

„Три куќи ќе бидат составени од три ката, додека две куќи ќе бидат на четири ката. Сутеренот ќе биде во концепт на отворен простор и ќе му биде оставено на сопственикот да избере, од кој ќе може да направи кино, вежбалница, велнес или нешто друго по сопствен избор“, се наведува во огласот.

Од секоја вила може да се направат три посебни стана, а во оваа фаза на изградба идниот сопственик може да избере материјали и да го коригира внатрешниот распоред на просториите. Ова задоволство ќе го чини 6,2 милиони евра.

njuškalo.hr