Алтернативниот начин на изучување странски јазици, кој нуди полесни и позабавни начини на совладување на истиот материјал, го презема приматот на традиционалните методи. Едукативните профили на социјалните мрежи што нудат побрзо учење странски јазици преку креативно осмислени видеосодржини се сè поприсутни и во регионот Адриjа, од кој две авторки од Македонија особено се истакнуваат и привлекуваат милиони следбеници на платформите како што се Тикток и Инстаграм.
Но, што значат тие бројки во финансиска смисла и колку интернет-популарноста носи и реална заработка?
Марија Мешкова, професорка по англиски јазик, вели: „Се чувствувам почестено што за кратко време успеав да достигнам значителен број следбеници. Тоа е доказ за растечката важност на модерниот начин на образование“.
Нејзините видеоснимки што духовито обработуваат вообичаени конверзациски грешки ѝ донесоа глобална популарност за помалку од една година. Содржините што ги објавува ги следат повеќе од 1,7 милион луѓе на различни платформи, во најголем број од Америка, Бразил, Мексико и од Индија.
Мешкова станала свесна за моќта на социјалните медиуми, особено во индустријата за е-учење, па пред една година одлучила да ризикува и комплетно да му се посвети на градењето на својот бренд. Иако на почетокот немало видливи резултати, а работела и по 17 часа дневно, таа не се откажала од истражувања, пишувања, снимања и објавувања. Требало да поминат осум месеци за едно нејзино видео да стане вирално и нејзиниот профил Zenfluent Maria на Инстаграм за само 30 дена да достигне 1,1 милион следбеници.
Како инфлуенсерка со вакви значајни бројки, ѝ се отвориле разни можности за генерирање приходи. Сега Мешкова креира и продава дигитални курсеви, е-книги и други образовни материјали. „The Real-Talk Grammar“ е дигиталниот прирачник што го издаде неодамна. Учениците го користат како задолжително четиво за секојдневна комуникација на англиски јазик, а се продава по цена од 12,99 долари.
Мешкова нагласува дека едукативното инфлуенсерство има друг тип влијателност, која не се ограничува само на стандардниот модел на маркетинг и продажба. Затоа се труди да се приспособи на брзиот онлајн свет, но и да понуди еден поинаков начин на учење јазик.
„Бројот на следбеници ми ја олеснува продажбата на овие производи низ светот. Исто така, еден од изворите на приходи се спонзорираните содржини, каде што соработувам со познати компании и брендови за промотивни кампањи на нивните сервиси и производи. Секако, јавното говорење на настани, како и корпоративните тренинзи и работилници од заинтересирани институции, се дополнителен приход во оваа работа“, објаснува Мешкова.
Видеоснимките на дваесетгодишната Теона Сима, студентка по новинарство и психологија на Американскиот универзитет во Бугарија, исто така бележат милиони прегледи. Нејзиниот инстаграм-профил The Language Blondie има над 740 илјади следбеници, а во описот на профилот е наведено: „Здраво, моето име е Теона и јас ќе ви помогнам секој јазик да го зборувате како мајчин“.
Прва љубов ѝ е спортот. Игра тенис, кошарка, одбојка, фудбал, плива, трча, скија, а е и водителка на спортските настани и натпревари на факултетот и е домаќинка на поткастот Office Hours, во кој ги интервјуира своите професори.
Покрај тоа, Теона е полиглот. Течно зборува пет јазици, разбира и говори уште три, а во видеата може да звучи како да зборува уште пет. Англискиот го усовршила на факултет, францускиот во средно училиште, а бугарскиот откако се преселила во Благоевград. За другите јазици е самоука.
Иако снима на многу јазици, видеото во кое глуми девојки од различни националности што зборуваат на англиски јазик има дури 43,3 милиони прегледи на Тикток.
„Препорачувам нешто само ако искрено го мислам тоа, не заради заработка. Нема цена љубовта што моментално ја чувствувам кон светот, а и ’светот’ кон мене. Финансискиот аспект ми нема никаква смисла“, објаснува Теона.
Таа постојано добива пораки од луѓе што ѝ се заблагодаруваат што им помага во учењето јазици, но не се доживува како инфлуенсерка. Теона вели дека едноставно имала среќа кога станува збор за моќта на интернетот.
„Сега имам платформа за размена на позитивна енергија и љубов со луѓе низ светот. Имам нови пријатели од Бразил, Хрватска, Полска, Германија, Турција.. Имам луѓе од кои можам да учам нови јазици, луѓе што сакаат сѐ што сум. Јас сум најбогатата личност на планетата“, заклучува Теона.
.webp){kind=icon}
