Љубителите на фудбалот наскоро ќе имаат можност да поседуваат едно од клучните парчиња во историјата на светските првенства. „Сотби“ треба да продаде комплет од шест дреса што ги носеше суперѕвездата Лионел Меси на Светското првенство минатата година во Катар, кога Аргентина го победи шампионот Франција и ја освои главната награда, победувајќи на пенали по завршувањето на натпреварот со 3-3.
Комплетот од сино-бели дресови со пруги, вклучувајќи го и оној што го носеше на последниот натпревар на 18 декември, може да стане највредната колекција на спортски сувенири што ќе се појават на аукција, проценетата вредност на комплетот е над 10 милиони долари. Сегашниот рекорд го држи дресот на Мајкл Џордан од НБА-финалето од 1998 година, кој беше продаден за 10,1 милиони долари на аукција на „Сотби“ во Њујорк во 2022 година.
Аукцијата ќе биде отворена за наддавање од 30 ноември до 14 декември.
Актуелниот рекорд за најпродавани фудбалски сувенири го држи исто така аргентински фудбалер, дресот на покојниот Диего Марадона од неговиот меч „Божја рака“ против Англија во 1986 година. Продаден е за 9,3 милиони долари на аукција во „Сотби“ во Лондон во мај 2022 година.
„Светското првенство во фудбал во 2022 година е еден од најголемите настани во спортската историја, нераскинливо поврзан со храброто патување на Меси, што цврсто го утврдува неговиот статус како најдобар играч на сите времиња“, рече Брам Вахтер, шефот на модерните колекции на „Сотби“, во изјавата за аукцијата. „Продажбата на овие шест дреса претставува монументална можност во историјата на аукциите, нудејќи им на навивачите и на колекционерите врска до крунското достигнување на Меси“.
Компанијата вели дека нејзините аукции за спортски сувенири привлекуваат нова генерација купувачи, со половина од понудувачите помлади од 40 години. Повеќе од 50 проценти се исто така нови понудувачи.
Американскиот технолошки стартап „Моменто“ (AC Momento) ги носи тие дресови на аукција. Дел од приходите оди за проектот УНИКАС, со поддршка на фондацијата на Лео Меси. Проектот е во соработка со болницата „Сент Џоан де Деу“ (Sant Joan de Déu) во Барселона, која ги поддржува потребите на децата со ретки болести. Аукцијата ќе биде проследена со бесплатна изложба на дресовите во „Сотби“ во Њујорк.
.webp){kind=icon}
Во моментов нема коментари за веста. Биди прв да коментира...