text size
Понудувачите „полудеа“ по две оригинални сценарија на американската ТВ-комедија „Пријатели“ пронајдени во канта за отпадоци, кои беа продадени на аукција за неверојатна цена.
Аукциската куќа „Хансон Рос“ беше вчудовидена од „феноменалниот глобален интерес“ за сценаријата за епизодите „Свадбата на Рос“, I и II дел. Сценаријата требаше да бидат уништени веднаш по снимањето во 1998 година. Но, случајно ги пронашла поранешна вработена и завршиле во нејзината ноќна маса повеќе од 20 години.
Сценаријата излегоа на аукција со проценета вредност од 600 до 800 фунти. Сепак, таа цена брзо беше победена неколкупати, благодарение на 219 понуди од целиот свет, вклучувајќи ги Обединетото Кралство, САД, Германија, Шпанија, Австралија, Украина, Дубаи и Швајцарија. Чеканот конечно падна на 22.000 фунти. Вкупната цена што ја плати онлајн меѓународниот понудувач беше 28.864 фунти.
Сценариото е од четвртата сезона, епизодите 23 и 24, кога тимот оди на свадбата на Рос со Емили (Хелен Баксендејл).
Во епизодата исто така се гледа дека Џои се среќава со војвотката од Јорк, Сара Фергусон, додека Фиби останува во САД како сурогат мајка на тројките на нејзиниот брат.
Оваа аукциска куќа, која во моментов нуди и голема колекција на монети од кралицата Викторија, чија поединечна крајна цена се проценува на 500 фунти, на својата веб-страница ја цитира изјавата на продавачот, 60-годишна пензионерка од Лондон: „Јас сум многу изненадена. Отидов на аукцијата со мојот сопруг и само седевме и се погледнавме. Не можевме да веруваме што се случува. Јас останав без зборови. Сè уште е надреално“.
„Порано работев во административна поддршка во студиото ’Фонтајн’. Никогаш не сум видела ниту еден од актерите од познатото шоу, но се сеќавам дека беше лудо. Имаше голема активност и дадов сè од себе да помогнам. Ним им требаше публика во студиото, а јас помогнав да се дистрибуираат билетите што луѓето ги добија на радионатпревар во Лондон за да го гледаат снимањето на серијата“, рече таа.
„Ги најдов во ѓубре неколку недели по завршувањето на снимањето. Дел од мојата работа беше да се погрижам сè да биде уредно и да нема ѓубре наоколу. Не бев сигурна што да правам со нив, па само ги ставив во мојата канцеларија. Се сеќавам дека се прашував на кој член на актерската екипа можеби му припаѓаат“, рече таа.
Среќната поранешна сопственичка вели дека дури неодамна ги нашла сценаријата.
„Го напуштив студиото ’Фонтајн’ во 1999 година и кога дојдов да го средам бирото, само фрлив сè во голема картонска кутија. Заборавив дека сценаријата се таму. Тие беа измешани во куп хартии. Не ги најдов додека не ја проверив кутијата неколку месеци подоцна. Завршија во ноќната маса и беа таму сите овие години. Можев лесно да ги фрлам. Ја чистев мојата куќа пред да се преселам неодамна и повторно наидов на нив“.
Американската серија „Пријатели“, создадена од Дејвид Крејн и Марта Кауфман, се емитуваше на НБЦ од 1994 до 2004 година и траеше десет сезони, во кои главните улоги ги толкуваа Џенифер Анистон, Кортни Кокс, Лиза Кудроу, Мет Лебланк, Дејвид Швимер и неодамна починатиот Метју Пери. Серијата е една од најпопуларните ТВ-серии на сите времиња, а е актуелна и денес.
Bloomberg
Последната епизода, која се емитуваше на 6 мај 2004 година, ја гледаа 52,5 милиони гледачи само во САД. Серијата беше номинирана за 62 награди „еми“ и ја освои наградата за извонредна хумористична серија во 2002 година за својата осма сезона. Серијата е рангирана на 21-то место на „50-те најдобри ТВ-шоуа на сите времиња“ на ТВ-водич.
.webp){kind=icon}
