Велнес индустријата расте. До 2027 година се очекува дополнителен раст од 57 отсто, достигнувајќи вкупно 8,5 трилиони долари, што е приближно двојно повеќе од бруто домашниот производ на Германија. Но, трендовите се менуваат. Додека фокусот кон индивидуалноста и персонализацијата веќе беше присутен во текот на претходната година, се чини дека 2024 година ќе биде дефинитивен доказ за тоа, се вели во извештајот на „Пинтерсет Предиктс“ (Pinterest Predicts), кој известува за трендовите врз основа на најпребаруваните термини. Подгответе чевли за планинарење и рекети за бадминтон, а за вашето омилено кафе обезбедете машини и шолји во вашиот стан. Еве што друго нè чека.
Збогум за кофеинот
Се чини дека заврши времето на утринската доза кофеин бидејќи на сцена стапуваат алтернативи како мача, кафе од печурки и кафиња без кофеин. Судејќи според светските трендови, сè повеќе луѓе ќе се свртат кон опции со малку или без кофеин. Исто така, Пинтерест предвидува зголемување на интересот за кафематите во својот дом. Кога сме веќе кај кафето, потрошувачката на млеко сè повеќе се фокусира на алтернативи од билки.
Pexels
Сув јануари (па и февруари, март...)
Сè уште е присутен трендот на намалување или целосно запирање на консумирањето алкохол. Во исто време, расте интересот за безалкохолни алтернативи за уживање во омилениот пијалок. Со вредност малку над милијарда долари во глобална продажба, овие пијалоци сочинуваат само дел во однос на пазарот на алкохолни пијалоци вреден 650 милијарди долари, но тие забележуваат силен раст, пишува „Блумберг“. Според „Евромонитор“ (Euromonitor), нивниот раст се очекува да биде околу 30 отсто годишно во наредните години, за разлика од шест отсто за конвенционалните алкохолни пијалоци. Во оваа смисла, безалкохолните опции на алкохолните пијалоци се сè поприсутни.
Безалкохолните пива одамна го зазедоа својот удел на пазарот, а сега овој тренд е сеприсутен и меѓу другите категории. Неодамна имав можност да разговарам со Пол Бивис, директорот на „Вајлд ајдол“ (Wild Idol) кој ми кажа дека кога решиле да создадат врвен безалкохолен шампањ, знаеле дека сакаат да создадат нешто сосема револуционерно. Тој смета дека безалкохолната верзија во никој случај не е конкурент на алкохолната верзија, туку дека тие „убаво се надополнуваат“.
Едноставно, станува збор за можност за избор да се ужива во меурчињата и атмосферата што тие ја носат за оние кои не го сакаат ефектот што го има алкохолот. Бидејќи Бивис претходно беше долгогодишен директор на „Лансон“ (Lanson Champagne) во Обединетото Кралство, треба да му се верува.
Ниту познатите личности не останаа имуни на растечкиот тренд, па Кети Пери ја лансираше линијата „Де Сои“ (De Soi) безалкохолни аперитиви направени со природни адаптогени. И, секако, најшироко консумираниот безалкохолен пијалок во светот, водата, ќе продолжи да биде суверен владетел, со над 470 милијарди литри потрошувачка во 2022 година, надминувајќи ги и газираните и алкохолните пијалоци, според „Статиста“ (Statista).
Истиот извор наведува дека глобалниот приход во сегментот на пакувана вода на пазарот на безалкохолни пијалоци континуирано ќе расте во периодот од 2023 до 2027 година, за вкупно 77,5 милијарди американски долари (+22,65 отсто). По седма последователна година на раст, овој показател се проценува дека ќе достигне 420 милијарди долари, а ќе достигне нов врв во 2027 година.
Бавни патувања
Се чини дека времето на патувања каде сè треба да се види веднаш и сега, со безброј фотографии и активности е минато. Сега се бараат „потивки“ дестинации фокусирани на благосостојбата и здравјето. Термичките оази кои нудат одмор за умот и телото полека го пробиваат својот пат кон врвот на листата на желби. Лековити термални води, чист воздух и природна средина, сауни, солена соба, бројни третмани и кулинарски задоволства...
Pexels
Помалку екрани, повеќе зеленило
Дигиталната детоксикација подразбира контролирано и намалено користење на дигиталните комуникации, излегување од затворените простори и уживање во природата. Меѓу најпопуларните активности останува планинарењето, кое цветаше за време на пандемијата, а долгите прошетки стануваат сè почести.
Ренесанса на негата на телото
Индустријата за убавина минатата година покажа раст во сите категории, како што претходно објавивме, а грижата за телото ќе биде во првите редови во 2024 година. Од домашни третмани, бројни лековити креми до специјализирани третмани во велнес центри.
Во оваа смисла, повторно можеме да се упатиме кон бањите, каде што се креираат специјални програми за нега на кожата на телото и лицето. На пример, термалните бањи Лашко во Словенија нудат велнес програми базирани на локално пиво (или хмељ) и мед. Пивската масажа длабински ја навлажнува и ја храни кожата, а релаксацијата со мед, концепт за првпат развиен од оваа термална бања, вклучува бројни третмани за лице и тело и програма во сауна.
Thermalna Laško
Бадминтонот е повторно хит
Омилената игра од детството се враќа на голема врата. Според најновиот извештај на Пинтерест, бадминтонот е хит. Имено, платформата забележа зголемување од 45 проценти на бројот на луѓе кои бараат теми поврзани со овој спорт. Меѓу другите спортови, мрежата го истакна и зголемениот интерес на генерацијата Зед за кик-бокс, карате и џиу-џицу.
Pexels
.webp){kind=icon}
Во моментов нема коментари за веста. Биди прв да коментира...