Дали „Луј Витон“ ќе го продаде „Марк Џејкобс“?

„Луј Витон“ (LVMH Moet Hennessy Louis Vuitton SE) ги истражува сите опции за својот моден бренд „Марк Џејкобс“ поради интересот од потенцијални купувачи, брифираат луѓе запознаени со ситуацијата.

Модниот гигант ангажираше советници да се разгледаат сите можности за „Марк Џејкобс“ откако доби понуди од заинтересирани страни, велат овие извори. Брендот исто така може да привлече понуди од други компании во потрошувачкиот сектор, како и од фирми со приватен капитал, тврдат тие, говорејќи под услов да останат анонимни бидејќи информациите се доверливи.

Процесот е во рана фаза и ЛВМХ сè уште нема донесено конечна одлука за тоа како да одговори на интересот. Според информациите, луксузниот конгломерат сепак би можел да продолжи сам да го развива бизнисот.

Претставник на ЛВМХ рече дека компанијата силно ја негира информацијата за евентуална продажба на „Марк Џејкобс“, одбивајќи да коментира во детали.

Сосема ретко се случувало ЛВМХ да се раздели со кој било бренд од своето портфолио. Еден од последните такви големи настани се случи во 2016 година, кога конгломератот се согласи да ги продаде брендовите „Дона Каран“ (Donna Karan) и ДКНУ (DKNY) за 650 милиони долари. Каков било договор ќе му помогне на ЛВМХ да ги капитализира долгогодишните напори за промена на Марк Џејкобс и ќе му овозможи да се ослободи од брендот во категоријата на пристапен луксуз за да се фокусира на понудите од повисоко ниво.

Марк Џејкобс/Фотограф: John Lamparski/Getty Images

 

Модниот дизајнер Марк Џејкобс (61) повеќе од една деценија беше креативен директор на „Луј Витон“, брендот што е најодговорен за профитот на ЛВМХ. Овој њујорчанец го основа брендот во 1984 година со својот деловен партнер Роберт Дафи. ЛВМХ поседува 80 отсто од брендот, додека Џејкобс и Дафи го поседуваат остатокот.

Чантата на Марк Џејкобс (Marc Jacobs The Tote Bag) се продава за 550 евра во Франција, што е значително помалку од цената од 1.500 евра што треба да ги издвоите за чантата „неверфул“ (Neverfull) на „Луј Витон“. Брендот исто така зачекори во сегментот на лична нега во 2007 година, дебитирајќи со парфемот „Марк Џејкобс Дејзи“ (Marc Jacobs Daisy), со познатата капа во облик на цвет, пред да лансира колекција за убавина во 2014 година, според нивната веб-страница.

Dimitrios Kambouris/Getty Images

ЛВМХ (LVMH) го реструктурира „Марк Џејкобс“ во последниве години, што доведе до поедноставување на понудата на производи. Профитабилниот бренд има забележано продажба од 600 милиони евра во 2023 година, според изворот. ЛВМХ вообичаено не открива финансиски податоци по бренд.

ЛВМХ со седиште во Париз е најголемиот конгломерат за луксузни стоки во светот, со 75 бренда во своето портфолио, вклучувајќи ги „Тифани“ (Tiffany & Co.), „Кристијан Диор“ (Christian Dior) и производителот на шампањот „дом перињон“.