.webp){kind=icon}
Американскиот пејач и моден директор Фарел Вилијамс ги здружи силите со една од најголемите К-поп ѕвезди со цел на аукција да продадат десетици лични предмети на јужнокорејскиот музичар, собирајќи околу 1,1 милион долари преку онлајн аукциската платформа на Вилијамс.
На аукцијата, организирана од дигиталната аукциска куќа на Вилијамс, „Џупитер“ (Joopiter), беа вклучени предмети во сопственост на Џи-Драгон (G-Dragon), лидер на јужнокорејскиот бенд „Биг бенг“ (BigBang). Вистинското име на Џи-Драгон е Квон Џи-јонг, а освен што е пејач и текстописец, тој е и амбасадор на „Шанел“, сопственик на сопствена модна линија и страстен колекционер на уметнички дела.
Вилијамс, кој е глобален трендсетер и креативен директор на машката линија на „Луј Витон“, го основа „Џупитер“ во 2022 година за да привлече нови и млади колекционери, комбинирајќи уметност, мода и култура.
На најновата аукција беа продадени повеќе од 45 колекционерски предмети на Џи-Драгон, вклучувајќи го и шарениот капут од лисица што го носеше за време на неговата турнеја со „Биг бенг“ во 2015 година, кој беше продаден за 125.000 долари. Другите предмети вклучуваа златен микрофон (16.250 долари), чанта „шанел х фарел“ (18.750 долари) и режисерско столче (51.250 долари).
Аукцијата, која заврши во вторникот, привлече големо внимание ширум светот, при што околу 42 процента од понудувачите беа од Јужна Кореја, покажуваат податоците на „Џупитер“.
„Идејата зад ’Џупитер’ е да се прифати енергијата што се ослободува кога предметите го менуваат сопственикот и да се почитува вредноста создадена околу тие предмети“, напиша Вилијамс во соопштението.
„Џупитер“ веќе соработува со многу поп-ѕвезди и луксузни брендови, а моментално нуди престој во една од најексклузивните нови резиденции во Токио, сместена на карпа со поглед на планината Фуџи. Како дел од напорите да допре до кинеските клиенти, „Џупитер“ соработува со Џексон Ванг, К-поп ѕвезда родена во Хонгконг, и отвори канал „Вичет“ (WeChat) за продажба на стоки.
Со тим од експерти што претходно работеле во аукциските куќи „Кристи“ и „Сотбис“, „Џупитер“ се фокусира на продажба на колекционерски предмети поврзани со современата култура, привлекувајќи и формирајќи база на помлади клиенти. Кејтлин Донован, шефица за глобална продажба на „Џупитер“, во интервју рече дека страницата организира изложби во повеќе градови и планира да се прошири на нови пазари, вклучувајќи го и Блискиот Исток.
„Целта на 'Џупитер' е да го демократизира начинот на кој луѓето гледаат на аукциите“, рече Донован во музејот „Даелим“ во Сеул, кој беше домаќин на изложба на колекционерски предмети и уметнички дела на Џи-Драгон.
Дигиталните аукции ги уриваат бариерите за влез во многу различни канали. Онлајн аукцијата на „Џупитер“ и придружната изложба во музејот „Даелим“ во Сеул беа темпирани да се совпаднат со меѓународниот саем за уметност во Сеул, кој заврши во саботата. Добропознатите галерии, како што се „Гагосијан“ и „Гледстоун“, ги претставија новите дела на уметници од САД, вклучувајќи ги Дерик Адамс и Анику Ји.
