Која е улогата на координаторот за интимност на филмски сет?

Дали сте слушнале за професијата координатор за интимност? Тоа е професија што се појави на филмските сетови пред само неколку години. Координаторите работат со актерите на подготовка и снимање на интимните сцени, како и на сите други сцени што  бараат висока емоционална ангажираност, а им обезбедуваат и психолошка поддршка.

Мал број актери досега имале можност да соработуваат со нив, особено во нашиот регион, каде што има само шест такви професионалци. Една од нив е и Анѓела Рајиќ Новаковиќ, за која оваа професија е комбинација од две струки: глума и психологија.

Професијата настана пред неколку години, во екот на движењето #MeToo, но во Европа сè уште е релативно неразвиена. Сепак, во Србија досега се обучиле шестмина стручњаци, а Рајиќ Новаковиќ вели дека низ целиот регион се чувствува сè поголема потреба за развој на професијата.

Оваа професија им овозможува на актерите да се чувствуваат безбедно, ја намалува можноста за злоупотреба (како познатиот случај на Шерон Стоун во филмот „Основен инстинкт“ / Basic Instinct), му помага на режисерот да ја спроведе својата визија, но и го намалува времето на снимање.

„На самиот почеток луѓето мислеа дека координаторите за интимност ќе бидат некој вид морална полиција или цензура, но преку искуството тие ги сфатија придобивките од професијата“, вели Рајиќ Новаковиќ, која како координаторка работела и со странски и со домашни продукции.

„Странските и домашните продукции имаат различно поимање за интимноста, така што ние мора да знаеме кои се нивните граници на интимност. Голема е разликата во начинот на кој тие ја гледаат интимноста“, објаснува соговорничката.

За тоа како актерот Милан Мариќ ја иницирал оваа професија, дали има тензии помеѓу координаторите за интимност и режисерите и какви се искуствата од филмските сетови, погледнете во новата емисија од серијалот „Инспирација“.

Другите емисии од овој серијал можете да ги гледате тука.