Новиот филм за Формула 1 од студиото „Епл“ (Apple Inc.), насловен „Ф1“ (F1), забележа огромен успех на благајните при своето деби, остварувајќи приход од 55,6 милиони долари во кината низ САД и Канада.
Филмот, во кој Бред Пит ја толкува улогата на остарен возач што се враќа на патеката, според процените на компанијата „Бокс офис про“ (Box Office Pro), требаше да заработи околу 50 милиони долари за време на премиерниот викенд.
Овој филм се смета за уште еден тест на стратегијата на „Епл“ да ги прикажува своите филмови најпрво во кина, пред да станат достапни на стриминг-сервисот Епл ТВ+ (Apple TV+). „Ф1“ е еден од најскапите проекти на компанијата – со продукциски буџет поголем од 200 милиони долари. Дистрибуцијата во кината ја изврши „Ворнер Брос Дискавери“ (Warner Bros. Discovery Inc.), која во неделата ги објави резултатите од заработката за време на премиерниот викенд.
Епл ТВ го тестира својот влез во арената на големите кино-блокбастери
Извор: Bloomberg
„Очигледно е дека ова е најголемиот филм на ’Епл’ прикажан во кината досега и навистина силно го поддржаа неговото прикажување за време на премиерниот викенд, кој беше навистина неверојатен – 144 милиони долари на глобално ниво“, изјави во интервју Џеф Голдстин, претседател на глобалната кинематографска дистрибуција во „Ворнер Брос“ (Warner Bros.).
Иако публиката на филмот „Ф1“ во првите денови од прикажувањето беше претежно машка, таа секојдневно се проширува како што различни демографски групи почнуваат да го препорачуваат филмот, додаде Голдстин.
Сцена од филмот
Извор: Warner Bros
Џиновските екрани на компанијата „Ајмакс“ (Imax Corp.) донеле речиси една четвртина од вкупниот приход на благајните за време на викендот во Северна Америка, изјави Рич Гелфонд, извршен директор на компанијата. „Верувам дека ’Епл’ е многу охрабрен од овие резултати и мислам дека тоа дефинитивно значи дека ќе продолжи да прави блокбастери“, рече Гелфонд.
Критичарите главно го пофалија реализамот на филмот, кој делумно е снимен со помош на мали камери, слични на оние од „ајфон“, поставени внатре во автомобилите за време на вистински трки. Според сајтот „Ротен томатос“ (Rotten Tomatoes), филмот има 83 проценти позитивни оценки меѓу професионалните критичари.
Храмот на брзината е прикажан во реалистични сцени снимени на вистински патеки, од Абу Даби до Јапонија
Фото: Bloomberg
Екипата снимала сцени на патеките од Формула 1, од Абу Даби до Јапонија, добивајќи пристап до гаражи, боксови и најнедостапните делови од светот на трките. Во филмот се користени и вистински спортски коментатори.
Продуцентот Џери Брукхајмер изјави за „Блумберг“ дека било потребно повеќе од една година за тимовите од Формула 1 воопшто да се согласат со идејата за филм за нивниот спорт.
„Им рековме: Ќе навлеземе во вашиот свет и ќе направиме најавтентичен можен филм за него’“, рече Брукхајмер. „Тие беа нашите вистински партнери во овој проект – без нив немаше да го добиеме пристапот што го имавме“.
.webp){kind=icon}
