Самопрогласениот принц на темнината, кој како водечки пејач на „Блек сабат“ (Black Sabbath) го дефинираше жанрот хевиметал, почина на 76-годишна возраст, објави „Асошиејтед прес“, повикувајќи се на соопштение од неговото семејство. Пред помалку од три недели, Озборн во Англија одржа проштален концерт пред 40.000 обожаватели, седејќи на црн трон. Од 2020 година тој јавно зборуваше дека боледува од Паркинсонова болест.
Озборн пееше во бендот „Блек сабат“ од неговото формирање во 1968 година до 1979 година, кога беше исфрлен од бендот. Потоа тој започна соло-кариера и, според „Билборд“, продаде повеќе од 100 милиони албуми. Тој беше и ѕвезда на сопственото реално шоу, кое го следеше неговото семејство.
Неговата кариера беше обележана со однесување под дејство на дрога и алкохол. Во јануари 1982 година во Де Мојн, Ајова, тој касна глава на лилјак што некој ја фрли на сцената. Еден месец подоцна, тој беше уапсен затоа што мокрел на статуа пред Аламо во Сан Антонио.
„Никогаш не помислував дека ќе живеам толку долго“, рече тој во едно интервју од 1986 година. „Неколкупати бев на работ на смртта поради сите алкохолни пијалаци и друго - кокаин, марихуана, ЛСД. Се обидувам да се исчистам, а тоа не е лесно. Но, се забавував и се надевам дека направив неколку добри албуми“.
Една од неговите песни, „Suicide Solution“, доведе до тужба што ја поднесоа родителите на депресивен тинејџер што се самоубил додека ја слушал песната. Озборн се бранеше на суд тврдејќи дека песната е апел против злоупотребата на алкохолот.
Настап во 2022 година
Фото: Harry How/Getty Images
„Не мислев така“, рече тој. „Мислев на тоа дека алкохолот може да те убие - не употребувај го“.
Роден како Џон Мајкл Озборн на 3 декември 1948 година во Бирмингем, Англија, тој се мачел во училиште поради недијагностицирана дислексија. Не успевал да се задржи на работните места во фабриките, па краток период и крадел пред да го оствари својот сон за рокенрол-слава со бенд што беше основан токму во неговиот роден град.
Подемот на „Блек сабат“, со хитовите како „Paranoid“ и „Iron Man“, довел до живот исполнет со прекумерна употреба на алкохол и дрога, што во текот на четири децении довело до неверства, занемарување на родителските должности, семејно насилство и голем број искуства на работ на смртта.
„Дрогата речиси ме уби“, изјави тој за „Блумберг њуз“ во 2010 година. „Не ми се допаѓаше како се чувствував поради стигмата што ја носев, па пиев затоа што мислев дека тоа е начин да се опуштам. Сакав да бидам безгрижен“.
Откако беше исфрлен од бендот, неговата кариера повторно тргна во нагорна линија благодарение на тогашната менаџерка Шерон Арден, која во 1982 година стана негова сопруга. Заедно го започнаа фестивалот за хевиметал „Озфест“ (Ozzfest) во 1990-тите.
Потоа тој повеќепати се враќаше во „Блек сабат“, почнувајќи од 1997 година. Последен пат се врати во 2012 година, кога го снимија својот последен студиски албум и започнаа проштална турнеја, која траеше до 2014 година.
Во меѓувреме тој стана и ријалити ѕвезда. Емисијата за неговото семејство се емитуваше на „Ем-ти-ви“ (MTV) од 2002 до 2005 година и ги следеше него, Шерон и две од неговите три деца - Џек и Кели. Најстарата ќерка, Ејми, одби да учествува.
Во автобиографијата од 2009 година Озборн го опиша инцидентот со лилјакот, тврдејќи дека мислел дека е гумена играчка, како многуте што обожавателите му ги фрлале во минатото. Тој го каснал животното, но наскоро го доживеал „најлошиот вкус што можете да го замислите“, а потоа почувствувал нешто како се грчи во неговата уста. Потоа примил вакцини против беснило и се соочил со протести од организација за заштита на животни, како и со големо медиумско внимание по инцидентот. Уште поголемо внимание привлече неговото апсење кај Аламо, кога бил фатен како носи еден од вечерните фустани на Шерон.
Со својата прва сопруга, Телма, се оженил во 1971 година. Имале две деца, Џесика и Луис, а се развеле во 1982 година.
.webp){kind=icon}
