Може ли параглајдерството да лансира елитен туризам во Крушево

Крушево урива рекорди во туризмот во 2025 година. Според последниот извештај на Општината, досега се евидентирани 40.000 ноќевања, наспроти скромните 14.000 посети во 2017 година. Локалните власти очекуваат бројките да растат и во 2026 година, кога градот ќе биде домаќин на светско првенство во параглајдерство и на пет други меѓународни натпревари.

Освен како реномиран центар за адреналински спорт, Крушево се етаблира и како препознатлива и посакувана одржлива локација, откако минатиот месец влезе на престижната листа со Топ 100 приказни за зелени дестинации (Top 100 Stories of Good Practices in Green Destinations 2025) на меѓународната организација „Грин дестинејшнс“ (Green Destinations).

На свечениот настан во Монпелје, Франција, присуствуваше и Татјана Хасану, раководителка на Одделението за локален економски развој, која во разговор за „Блумберг Адрија“ раскажува дека ваквите признанија и врвните спортски настани што постојано се одржуваат во градот не само што се клучни за локалната економија туку отвораат и нова перспектива.

„Параглајдерството има реален потенцијал да биде двигател на елитен туризам во градот, но тоа зависи од начинот на кој ќе се развива. Крушево веќе има меѓународен углед во параглајдерските кругови, а со тоа, градот привлекува пилоти и тимови од повеќе континенти, медиумско внимание во спортските и туристичките кругови, како и нов бран на авантуристички туризам со висока додадена вредност. Ова може да води кон елитен туризам само со интегриран пристап, каде што и преостанатата понуда ќе создава ‘луксузно’ искуство“, појаснува Хасану.

Туризмот во Крушево, како што истакнува таа, се трансформира во значајна гранка што отвора нови можности за населението, го зајакнува локалното претприемаштво и го репозиционира градот како дестинација за активности што не се ограничени само на зимскиот период.

„Дополнителната изградба на ново високопрофесионално полетувалиште за параглајдерство ќе го зголеми капацитетот за прием на параглајдеристи, организација на натпревари и практикување на спортот на различни нивоа, од аматери до професионалци“, вели Хасану.

Таа смета дека поголем капацитет значи и повеќе ноќевања, зголемен број туристи, повеќе работа за угостителите и локалните бизниси, поголем промет во продавниците и поголема наплата на туристичката такса. Сето тоа, според неа, придонесува Крушево да се позиционира како економски одржлива и светски препознатлива авантуристичка дестинација, каде што спортот и туризмот се развиваат рака под рака.

Елитните туристи не бараат само спорт

Освен што е автентична средина, која нуди совршен спој на природа и адреналин, Крушево е и град на традиција и историја. Со автентичната архитектура, богатото уметничко наследство и локалната кујна што се негува низ генерации, градот очекувано бележи зголемена побарувачка за искуствен и одржлив туризам.

Нашата соговорничка забележува значителен напредок во последните години, особено во развојот на сместувачките капацитети, како и во унапредувањето на услугите и гастрономската понуда приспособени токму за посетителите со повисока платежна моќ. Сепак, Крушево сè уште чека поголеми приватни вложувања во премиум сегментот на туризмот.

Хасану објаснува дека се потребни појасна институционална поддршка и поразвиено брендирање за да се привлечат посериозни инвеститори. Таа нагласува дека првиот и засега единствен бутик-хотел во градот покажал реална побарувачка за автентично и висококвалитетно туристичко искуство, но дека развојот на овој сегмент останува ограничен без подобрување на пристапната инфраструктура и појасна стратегија за привлекување инвестиции.

Хасану вели дека за да стане Крушево нова елитна дестинација, треба да се базира на повеќе столбови, првенствено на развој на уникатни туристички производи и историско-културни тури во комбинација со вечерни активности со музика и гастрономски искуства што би создале чувство на исклучителност, а тоа, според неа, е од особена важност.

„Позиционирањето на Крушево како дестинација за авантуристички и културно-историски туризам треба да се поддржи со квалитетен маркетинг, кој ќе ги истакне уникатноста на градот, неговата природна убавина и традиционални вредности“, вели таа.

Хасану  смета дека промоцијата на градот мора да биде проследена со врвни услуги што ќе го зајакнат впечатокот на луксуз и удобност, а вклучувањето на локалната заедница да гарантира автентичност на туристичката понуда.

„Автентичноста и ‘приказните’ од прва рака се она што создава чувство на ‘ексклузивност’. На овој начин, Крушево може да понуди автентично искуство што остава трајна и незаборавна меморија за сите што го посетуваат“, заклучува Хасану.