Филмот за Меланија: Скапа стратешка лиценца со неочекувано силно отворање

Документарниот филм „Меланија“, кој светска премиера имаше на 30 јануари, ги следи 20-те дена непосредно пред инаугурацијата на Доналд Трамп за претседателскиот мандат, фокусирајќи се на подготовките на првата дама, Меланија Трамп, за влез во Белата куќа и нејзиниот поглед на улогата што ќе ја преземе по вторпат.

„Амазон студиос“ за правата на филмот плати рекордни 40 милиони долари, дури тројно повеќе од другите учесници - „Дизни“ и „Парамаунт“. Со дополнителни 35 милиони долари вложени во маркетинг, вкупните трошоци за продукција и промоција достигнуваат околу 75 милиони долари, што го прави филмот најскапиот документарец што „Амазон“ некогаш го лиценцирал и истовремено ризичен финансиски потег, бидејќи овој формат исклучително ретко поминува добро на благајните. Но критичарите сметаат дека за основачот на „Амазон“, Џеф Безос, овој пат не станува збор за заработка. Тоа, секако, претставува изненадување, како и приходот на благајните по отворањето, кој само во САД и Канада изнесува 8,1 милиони долари.

Според извештајот на „Волстрит журнал“, првата дама задржала околу 70 проценти од хонорарот за лиценцата, односно 28 милиони долари, за себе.

Ова не е единствената улога на „Aмазон“ во проектите на семејството Трамп. Оваа година „Амазон прајм“  започна да емитува реприза на филмот „Приправник“, кој ги следи трансформациите на Доналд Трамп. Организацијата „Трамп“ исто така најави официјална продавница на „Амазон“ за продажба на производи со брендот, што портпаролот на овој малопродажен гигант го опиша како „приклучување кон милионите други независни продавачи“.

Безос на инаугурацијата на Трамп, 20 јануари 2025 година. Неколку недели пред „Амазон студиос“ да понуди голема сума за правата на филмот, Безос вечерал со Трамп и неговата сопруга во Мар-а-Лаго. | Stefani Reynolds/Bloomberg

Не е за изненадување ниту содржината на филмот: ако очекувавте личен и интимен портрет, филмот нуди ограничен увид во личноста на Меланија Трамп и нејзиниот приватен живот. Можеби најинтимните сцени се оние со личниот стилист на Меланија, Ерве Пјер, и дипломатската размена со првата дама на Франција, Брижит Макрон.

Додека Доналд Трамп и францускиот претседател Емануел Макрон имаа, а и сѐ уште имаат, турбулентен однос, двете први дами меѓусебно си делеа комплименти за време на видеоповик.

Семејната динамика е речиси невидлива, а првата дама е најотворена кога зборува за смртта на својата мајка. Амалија Кнаус почина во јануари 2024 година.

Обложувачниците очекуваа значително послаба премиера | Bloomberg

Нејзината тага, изгледа, се засилуваше кога присуствуваше на погребот на поранешниот претседател Џими Картер во Вашингтон на 9 јануари 2025 година, на годишнината од смртта на нејзината мајка.

Таа опишува како седела во Националната катедрала во Вашингтон мислејќи на нејзината сакана мајка. Кнаус, вели таа, била најбогатата нишка во нејзиниот живот.

Доналд Трамп пред камера забележува дека неговата сопруга тешко ја поднела смртта на својата мајка.

Освен тоа, дознавме и дека омилена песна на Меланија Трамп е Billie Jean од Мајкл Џексон. Таа се појавува дури двапати како ретка интимна нота во рамките на внимателно контролираната приказна за животот на првата дама. Изборот на локации е исто така оскуден, па повеќето сцени се одвиваат меѓу кулата Трамп и вилата на Трамп во Флорида, Мар-а-Лаго.

Контроверзии

Филмот го режираше Брет Ратнер, чија репутација, да кажеме – е комплицирана. Имено, ова е негово прво остварување откако во 2017 година шест жени го обвинија за сексуално вознемирување и напад. Тоа се случи во екот на движењето #MeToo, а магазинот „Ролингстоун“ известува дека Ратнер ја искористил околноста што е сосед на семејството Трамп во Мар-а-Лаго, па продолжил да ја снима првата дама и по завршувањето на документарецот. Иако не е познато дека режисерот давал прилози за претседателските кампањи на Трамп (но евидентирани се повеќе донации за Хилари Клинтон за време на трката во 2016 година, како и подароци за Камала Харис додека сè уште беше сенаторка на Калифорнија), филмот изобилува со политички контроверзии.

И пред почетокот на снимањето голем дел од продукцискиот тим одби да биде потпишан на филмот, а по премиерата некои од оние што беа потпишани, како што велат, посакале да одлучиле поинаку.

Филмот како пиар-машина за сопругот, оценуваат критичарите | Bloomberg

Потоа, критичарите оценија дека премиерата на скапиот документарец е неумесна во момент кога администрацијата на Трамп спроведува рации во врска со имиграцијата. Посебно внимание предизвика сцената во која Меланија Трамп, во филмот и на премиерата, го нагласува своето искуство како имигрантка.

Во една сцена таа вели: „Тежината на историјата испреплетена со мојот личен пат како имигрантка… ме потсетува зошто толку длабоко ја почитувам оваа нација.“

Во ера кога славните личности создаваат содржини за да ги контролираат својот имиџ и порака, на филмот му се забележува и тоа што Меланија често го пренасочува вниманието кон сопругот, повторувајќи ги неговите тврдења за „неправдата“ што ја претрпел, со што документарецот повеќе личи на наративна поддршка на пиар-кампања отколку на независен личен портрет.

Која е публиката?

Во споредба со другите високопрофилни документарци, „Меланија“ засега се наоѓа некаде меѓу културен настан и бизнис-експеримент. На пример, „Тејлор Свифт: Турнејата Ери“ (Taylor Swift: The Eras Tour) оствари над 261,6 милион долари глобално и го редефинираше пазарот на концертни документарци, станувајќи најголемиот документарен филм во историјата според заработката на кинопазарот. Тоа значи рекордни бројки и по отворањето и по вкупниот приход, надминувајќи го претходниот рекордер – филмот „Мајкл Џексон: Тоа е тоа“ (Michael Jackson: This Is It - 261,2 милион долари).

 

 

Сепак, и покрај многу негативниот прием од филмските критичари, анкетите покажуваат висока оценка од публиката (Синемаскор „A“, пет ѕвезди на Посттрак и 89 проценти препораки). Освен тоа, демографијата на публиката во првиот ден потврдува дека филмот успешно целел на публиката на Трамп: жени постари од 55 години сочинувале околу 72–78 проценти од купувачите на билети во првиот ден, со силно учество на гледачи од јужните американски држави како Флорида, Тексас и Аризона. Повеќето посетители биле идентификувани како бели жени, а значаен дел од публиката доаѓа од поконзервативни заедници.

Иако денот на премиерата донел поголема заработка од онаа на која се обложувале порталите, јасно е дека е повеќе од неизвесно дали „Амазон“ ќе го поврати вложеното. Но, истовремено, за „Амазон“, кој веќе лиценцирал големи имиња и содржини за да го поттикне ангажманот на претплатниците, ваквиот тип инвестиција можеби укажува на поширока бизнис-логика: тактички инструмент за аквизиција на публика, демографски сегменти и медиумска видливост во политички поларизирана средина.

А за гледачите што очекуваат силна емотивна нарација и повеќе деликатни детали, час и 48 минути во кино може да минуваат бавно. Ако сакате поинаку да го поминете тоа време, можеби е попрактично да почекате филмот да стане достапен на „Амазон прајм видео“ и да го гледате во сопствен ритам.