.webp){kind=icon}
Расте бројот на непознати предмети на небото во изминатите дваесет години, истакна официјален претставник на Пентагон пред американските пратеници, но нема потврда за живот надвор од Земјата. Американскиот Конгрес за првпат во над 50 години, одржа јавна расправа на тема „неидентификувани појави во воздухот“.
„Од почетокот на 2000-те, забележавме зголемен број на неидентификувани случаи“, појасни Скот Бреј, заменик-директор за разузнавање за морнарицата на САД.
Тој порастот го препиша на „значајните напори“ што војската на САД ги вложува, со цел да го „демистифицира самиот чин на известување за набљудувањата“ и технолошкиот напредок.
Тој нагласи дека не е откриено ништо „што би упатувало на тоа дека феномените настанале надвор од Земјата“. Сепак, не се исклучува оваа можност.
Во јуни 2021 година, американската разузнавачка служба во долгоочекуваниот извештај, наведе дека нема докази за постоење на вонземјани, но призна дека се забележани десетици појави од воените пилоти, коишто не можат да се објаснат.
Некои се објаснуваат со присуството на дронови или птици, што ги збунуваат американските воени радарски системи. Други пак, може да се препишат на тестирање воена опрема и технологија од сили како на пример, на Кина и на Русија.
