„Сент стакинг“ (Scent stacking) е прогласен за еден од најбрзорастечките трендови за 2026 година. Концептот што означува комбинирање два или повеќе готови мирисни производи веќе создаде револуција во индустријата за парфеми, иако се однесува и на мешање други продукти, како гелови за туширање, хидратантни лосиони и кремови, но и спрејови за тело и за коса.
Овој тренд се најде и на листата најпребарувани термини според последниот извештај на „Пинтерест предиктс“, а истражувањето на платформата што анализира повеќе од 600 милиони корисници месечно покажало дека интересот за ниш-парфеми пораснал за рекордни 500 отсто.
За експертите, овие податоци јасно покажуваат дека потрошувачите повеќе не бараат само убав мирис туку и целосна контрола над производите што ги нанесуваат на кожата. Истовремено, тие нагласуваат дека иако оваа рутина е многу слична на „лејеринг“ (Layering), постои клучна разлика во пристапот.
„Додека ‘лејеринг’ подразбира нанесување поедноставни ноти или масла наменети за мешање, ‘стакинг’ е вистинска уметност на комбинирање два или повеќе веќе готови комплексни парфеми за да се создаде сосема нов, уникатен мирис со потпис“, објаснува Стефан Мицов, креатор на персонализирани парфеми и основач на брендот „Сентов“ (Sc3ntov).
Стефан Мицов
Според него, не постојат строги правила во примената на овој тренд и истиот тој, пред сè, е за лична експресија и храброст, а клучниот фактор е хемијата на кожата.
„Секоја комбинација мириса различно на секој поединец. Најважното ’правило’ е да се експериментира додека не се најде балансот што најдобро ја отсликува вашата енергија“, вели тој.
За „Блумберг Адрија“ тој открива и кои мирисни ноти најхармонично се надополнуваат кога се комбинираат повеќе парфеми, но и кои грешки најчесто се прават и на што треба особено да се внимава.
„Сличните групи секогаш се безбеден избор - цветни со цветни или гурмански со гурмански ноти. Цветните парфеми се неверојатно приспособливи и одат речиси со сè, освен со многу тешки, анималистички или доминантни кожни мириси. Од друга страна, кожните и зачинетите ноти добиваат прекрасна мекост кога ќе се искомбинираат со нешто слатко или ванилесто. Најчестата грешка, пак, е редоследот. Клучно е најинтензивниот и најтраен парфем да се нанесе прв, како база, а врз него да се додаваат полесните и повоздушести мириси. Исто така, треба да се внимава да не се претера со количеството. Кај ‘стакингот’ помалку е честопати повеќе“, советува Мицов.
Тој истакнува уште една суштинска работа, а тоа е дека постојат ноти или состојки што, иако се висококвалитетни поединечно, тешко се вклопуваат во иста мирисна композиција.
„Нашата работа е токму тоа, да најдеме баланс таму каде што на прв поглед нема. Сепак, одредени состојки се предизвик. На пример, лавандата, доколку не се ‘скроти’ со мошуси или лактони, може да развие остри, непосакувани анималистички нијанси, кои тешко се вклопуваат во нежна композиција“, предупредува тој.
Мајстор за мириси, но и за добар сервис
Стефан Мицов е македонски тенисер, кој сѐ уште активно настапува за репрезентацијата. Љубовта кон парфемите ја носи уште од дете, а спортските патувања и посетите на аеродромските продавници дополнително му ја зајакнале љубопитноста. Почнал интензивно да купува и да тестира различни производи, пред да стапи во контакт со професионални парфимери (стручни лица што создаваат мирисни композиции, често нарекувани „носови“ поради нивната исклучителна способност да препознаваат и комбинираат мирисни ноти, н.з.). По завршувањето на обуките, Мицов вложил сопствени финансии за материјали и почнал да креира свои парфеми.
Стефан Мицов
Нашиот соговорник смета дека токму персонализираните парфеми се врвот на овој тренд. Тоју вели дека наместо да експериментираат со готови производи, потрошувачите сѐ почесто бараат помош од професионалци, кои им помагаат да создадат база совршено приспособена на нивните желби, правејќи го процесот на „стакинг“ многу попрецизен и поефективен.
Зборувајќи за своите клиенти, Мицов истакнува дека „мирисот на чисто“ е дефинитивно најбараната категорија, но и дека дефиницијата за чистота е различна за секого. Како што објаснува тој, за некого тоа е смирувачка лаванда, за друг свеж бергамот и цитруси, за трет е нешто акватично што потсетува на дожд, а неговата работа е да открие која е таа лична асоцијација.
„Кај мажите моментално доминираат т.н. ‘суперамбери’ во комбинација со чадни ноти (smokey) или, пак, контрастни свежи акорди. Кај жените, сè уште владее влијанието на иновативните синтетички бази, како онаа во ‘бакара руж’ (Baccarat Rouge). Таа специфична структура на базата во моментов е апсолутен владетел на пазарот и е основа за многу нови женски композиции“, открива тој.
.webp){kind=icon}
