Околу 31 отсто од туристите денес, особено од генерацијата зед, попрво би научиле некоја нова вештина за време на патувањето отколку да купат сувенир, покажа новата анкета на познатата онлајн платформа за патувања „Гет јоар гајд“ (Get your guide).
Од курсеви за готвење во Њујорк до изработка на ножеви во Токио, во извештајот се наведува дека бизнисот со работилници за стекнување вештини доживува бум, а бројот на резервации годинава пораснал дури за 54 отсто.
Резултатите јасно покажуваат дека луѓето ги менуваат навиките што со децении беа дел од секое патување. Водени од лични интереси и автентични искуства, современите туристи сега сѐ помалку патуваат за шопинг, а сѐ повеќе за да научат нешто.
„Тоа е можност да се поврзете со локалната култура, да направите нешто со свои раце и да се вратите дома со приказна што е многу поинтересна од магнет за фрижидер“, пишува во извештајот.
Побарувачката за вакви искуства расте и кај нас, а тоа се гледа и од понудата на туроператорите, кои во последно време сѐ почесто нудат програма со активности наместо класични тури. Па така, на различни блогови за храна и патувања сѐ почесто ќе сретнете кулинарски работилници за приготвување традиционални јадења и печива, често во домашна или селска атмосфера, со локални состојки и вино, што на туристите им овозможува директен контакт со македонската гастрономска култура.
Агенциите бележат зголемен интерес кај странските посетители и за уметнички активности како сликање, ракотворби, резба во дрво и други традиционални техники што ги водат локални уметници и занаетчии.
Изборот за практични сесии е сѐ поголем, а јас одбрав три такви што особено се издвојуваат по својата содржина.
Уникатна средба со „Пајдушко“
Со водич на англиски или на турски јазик, на странските гости им се нуди ретка можност за 25 евра да го истражат Скопје преку традиционален танц.
Станува збор за едночасовна работилница на која може да научите како да го играте „Пајдушко“, еден од најживописните ора во Македонија. Организаторот истакнува дека не ви е потребно претходно искуство во танцување.
Извор: „Гет јоар гајд“ (Get your guide)
„Нашиот професионален инструктор ќе ве води чекор по чекор, помагајќи ви да ги совладате ритамот и движењата додека уживате во енергичната балканска музика. За искуството да биде уште поавтентично, ќе обезбедиме традиционални модни додатоци за целосно да се нурнете во традицијата“, пишува во описот на понудата.
Уметност меѓу корици
„Книговез“ е занаетчиска работилница во Охрид што ја негува традицијата на рачниот повез и изработка на книги и кожени производи. Во најпознатиот македонски туристички центар на туристите им се отвора уникатна можност да ги развијат своите рачни вештини, а мајсторот Драган Георгиевски е тука да ви покаже како се изработуваат тврдите корици од книгите.
Понудата вклучува и презентација на рачна резба на кожа, па со негова помош ќе ја совладате најстарата техника за такво шиење со две игли.
Секој учесник заминува дома со своите изработени производи, а тоа се најчесто три минијатурни бележници и една кожена футрола за картички.
,,Креативност, трпение и многу љубов е сѐ што ви треба за учество во оваа работилница која е од едукативен и забавен карактер“, велат организаторите.
Извор: „Трип адвајзор“
„Свадба е голема“
Впечатливи работилници организира и „Кајак.мк“, најголемата онлајн платформа кај нас што нуди алтернативно сместување. Часовите по грнчарство се особено атрактивни за странските туристи.
„Свадба е голема“ е креативен час што, според понудата, опфаќа целосно организирано културно доживување инспирирано од македонските свадбарски обичаи и симболиката на традиционалниот бардак.
Извор: Кајак.мк
Секој учесник добива полуготово бардаче, кое самостојно го декорира со етномотиви, под водство на инструктор и со обезбедени материјали и бои.
„Настанот се одвива во пријатна и автентична атмосфера, збогатен со традиционална македонска музика и вино за опуштено уживање. По завршувањето на обуката, учесниците го добиваат нивниот дизајниран бардак, како траен спомен и автентичен дел од македонското културно наследство“, пишува во понудата.
И оваа работилницата, како и повеќето други, е приспособена и за лица без претходно искуство.
.webp){kind=icon}
