Големите градови одамна поттикнуваат врска на љубов-омраза со туристите и со жителите. Една нова студија прави преглед на видовите места низ градовите што инспирираат најмногу гнев и оние што предизвикуваат најголема радост кај луѓето.
Анализа речиси на два милиона гео-означени твитови од Лондон и Сан Франциско покажа дека луѓето изразуваат повеќе позитивни емоции на места како ресторани и паркови, а понегативно се настроени кон канцелариите и спортските стадиони. Користејќи компјутерски алатки познати како невронски мрежи, истражувачите од Технолошкиот институт во Кјото идентификуваа кога и каде твитовите изразуваат гнев, исчекување, одбивност, страв, радост, тага, изненадување или доверба. Истражувањето, засновано на објави на социјалните мрежи од 2016 и 2017 година, беше објавено неодамна во онлајн списанието „ПЛОС уан“ (PLOS One).
Зелените и рекреативните простори предизвикуваат најпозитивни емоции кај жителите на градовите, а локациите како базени, пристаништа за едрилици и крајбрежјето исто така предизвикале твитови со високо ниво на радост. Сан Франциско, дом на паркови и плоштадот „Аламо“, е познат по изобилството зелени површини. Твитовите од хотели и ресторани, исто така, покажуваат високи нивоа на радост.
Сан Франциско
Bloomberg
Сосема очекувано, транзитот предизвикува тензии и во двата града. Твитовите направени во близината на железничките станици, автобуските постојки и мостовите преполни со автомобилски сообраќај пренесуваат чувства на одбивност и гнев. Но можно е чувството да е подобрено во последните години, барем за Лондон: минатата година, градскиот јавен транспортен систем доби признание како еден од најдобрите во светот врз основа на фактори како растојание до постојките, достапност, работни часови, метеж и брзина на патување.
Истражувачите, исто така, ги разгледале твитовите поврзани со некои поважни настани. Твитерџиите од Сан Франциско манифестирале највисоки нивоа на гнев, тага и одбивност за време на инаугурацијата на поранешниот претседател Доналд Трамп и Женскиот марш во 2017 година. На новогодишната ноќ биле испратени највисоко ниво на радосни твитови. За Лондон, твитовите покажале највисоки нивоа на страв и тага за време на нападите на Вестминстер и Лондонскиот мост од 2017 година. Највисоко ниво на доверба и исчекување е покажано за време на општите избори во Британија во 2017 година.
Податоците во овој поглед имаат свои граници. Собраните твитови се исклучиво на англиски јазик и можеби нема да бидат толку применливи за локации со мал дигитален отпечаток. Сепак, истражувачите веруваат дека наодите би можеле да помогнат во подобрувањето на инфраструктурата на одделни градови. Знаењето кои аспекти од градското живеење предизвикуваат позитивни или негативни реакции од жителите може да обезбеди рамка за подобро урбанистичко планирање, како што се структурни промени кај транзитните центри или додавање повеќе зелени површини.
.webp){kind=icon}
