Наречете го ова и ефект на Белиот лотос (The White Lotus).
Обожавателите се собираат на локациите на своите омилени серии и филмови во сè поголем број. Како што туристите го посетуваа станот на „Пријатели“ (Friends) во Вест Вилиџ, а потоа Дубровник беше преплавен од обожаватели на „Игра на тронови“ (Game of thrones), сега некои хотели се целосно распродадени благодарение на серијата „Белиот лотос“.
Во новиот извештај на „Американ експрес“ (American Express), 70 отсто од генерацијата зед и милениумците велат дека биле инспирирани да патуваат до некоја дестинација откако ја виделе на малите екрани. Сериите се речиси исто толку инспиративни како социјалните мрежи - 75 проценти од испитаниците велат дека патувале на места откако ги виделе во објави од своите пријатели или други луѓе на социјалните мрежи.
„Патниците сè повеќе се инспирираат од популарната култура“, вели Одри Хендли, претседател на „Американ експрес травел“ (American Express Travel).
Растот на популарноста на т.н. сет-џетинг може да се поврзе и со навиките од времето на пандемијата. Луѓето што мораа да јадат дома и не можеа да патуваат гледаа телевизија со часови, како на пример првите сезони на хитовите на „Ејч-би-о“ (HBO), „Белиот лотос“ (White Lotus), и на „Нетфликс“ (Netflix), „Емили во Париз“ (Emily in Paris). Така, од своите каучи сонуваа за времето кога ќе бидат укинати ограничувањата за патување и со своите неискористени буџети планираа патување на локации каде што би можеле самите тие да бидат главниот лик. Сега кога границите се повторно отворени, сет-џетингот годинава е еден од најголемите трендови за патување.
Веб-страницата на „Фор сизонс“ во Мауи за една година забележала пораст од 425 отсто во посетеноста, за време на првата сезона на серијата / Depositphotos
За ова нема подобар пример од „Белиот лотос“. Серијата беше критички и комерцијален успех за „Ејч-би-о“ и инспирација за патниците. Драмата-комедија прикажува непријатни интеракции меѓу богатите гости и персоналот на хотел во луксузно одморалиште, кои завршуваат со смрт на едно лице.
Првата сезона беше снимена во „Фор сизонс резорт“ (Four Seasons Resort Maui) во Ваилеа, а втората сезона прикажа уште еден имот на „Фор сизонс“ - палатата „Сан Доменика“ во Таормина, Италија. Гледачите опседнати со серијата ги резервираа имотите на кои се снимале епизодите и во потрага по сопствено животно искуство го поттикнаа работењето на хотелите.
„Популарниот тренд на сет-џетинг значително го зголеми интересот за Мауи и Таормина, а фреквентноста на веб-страниците и проверките на достапноста на двата имота значително се зголемија, што на крајот доведе до повеќе резервации“, вели Марк Спејчерт, извршен потпретседател и главен комерцијален директор во „Фор сизонс“.
Посетеноста на хотелите во Сицилија се зголеми благодарение на серијата „Белиот лотос“ / Depositphotos
Според извештаите од тој синџир на хотели, веб-страницата на одморалиштето во Мауи забележала 425 отсто зголемување на сообраќајот за една година, во текот на првата сезона од серијата. Исто така, сите љубители на „бинџање“ на серијата на „Ејч-би-о“ во недела навечер навалиле да резервираат ноќевања на Сицилија.
„За претстојната сезона во Таормина, имотот е распродаден, а и за уште неколку понатаму. Серијата ја прикажа Таормина како неверојатна дестинација“, вели Спајчерт. Цените за ноќевања во објектот почнуваат од околу илјада евра.
Ребека Масри, основачка на луксузната туристичка компанија „Литл емперорс“ (Little Emperors), вели дека клиентите, особено Американците, постојано прашуваат за „Фор сизонс“ на Сицилија. „Атрактивноста на Сицилија расте поради серијата“, вели таа, но и поради тоа што е поевтина од некои локации како што е брегот Амалфи.
„Не профитираа само 'Фор сизонс'“, посочува тaa, објаснувајќи дека серијата имала позитивен ефект и за другите луксузни хотели во регионот. „'Роко форте' (Rocco Forte) и 'Белмонд' (Belmond) имаат хотели на Сицилија и сите се барани благодарение на серијата, иако не е снимена таму“.
Обожаватели на Хари Потер го посетуваат популарниот перон 9¾ / Depositphotos
Во Британија, феноменот е добропознат по туристичкиот аџилак до фреквентната железничка станица Кингс Крос, каде што обожавателите на Хари Потер ја посетуваат платформата 9¾, каде што момчето волшебник се качуваше на својот воз за Хогвортс. Во раните 2010-ти, толпи посетители доаѓаа да го видат замокот Хајклер во Хемпшир, каде што се снимаше серијата „Даунтаун аби“ (Downton Abbey). Сега „Бриџертон“ (Bridgerton) на „Нетфликс“ носи посетители во Бат.
„Помладата публика доаѓа во Бат за серијата“, вели Патриша Јејтс, извршна директорка на „Визит Британ“ (VisitBritain). „Одлично е да се видат нашата историја и наследство прикажани на таков начин, па милениумците и патниците од генерацијата зед доаѓаат во поголем број“. Локациите за снимање, како што е замокот Хауард, забележаа зголемување на помлади посетители по премиерата на серијата.
Според „Американ експрес“, патувањата се вратиле на нивоата пред пандемијата на крајот на четвртиот квартал од минатата година, вели Хендли.
Дали сакате да ја престигнете толпата на вашиот следен сет-џет? Следете ги најавите каде ќе се снима наредната сезона на „Белиот лотос“. По привлекувањето толпи на Хаваи и Сицилија, третата сезона наводно ќе биде лоцирана во Азија.
.webp){kind=icon}
