Доколку сакате промена на средината, но и натаму копнеете по градскиот живот, најновото рангирање на градовите во светот по удобностите кои тие ги нудат за живеење сугерира дека локацијата за вашиот нов дом би требало да ја барате во западна Европа или Канада.
Со оглед на тоа што пандемијата брзо станува бледо сеќавање во поголемиот дел од светот, глобалниот индекс (The Global Liveability Index) на „Економист интелиџенс јунит“ (Economist Intelligence Unit - EIU) за 2022 година изгледа многу како во деновите пред пандемијата.
Виена повторно го зазеде првото место што го имаше пред три години, пред да се спушти на 12. место во 2021 година поради затворањето на музеите и рестораните предизвикано од Ковид-19. Австриската престолнина го надмина данскиот Копенхаген на оваа позиција, благодарение на повисоката оценка за здравствена заштита, додека швајцарскот Цирих и Калгари и Ванкувер во Канада ги заокружуваат првите пет позиции.
На дното од листата со 172 градови се Триполи во Либија, нигерискиот град Лагос и сирискиот Дамаск.
„Во изминатите две години, глобалното рангирање на EIU во голема мера беше под влијание од пандемијата на Ковид-19, како и мерките за заклучување и физичко растојание кои влијаеа на резултатите во сферата на културата, образованието и здравството во градовите ширум светот“, се забележува во извештајот. „Сепак, во нашата најнова анкета, индексот се нормализира, бидејќи во многу земји ограничувањата се укинати“, се додава во него.
Единствените градови надвор од Канада и Европа кои се пробија во топ 10 листата се Осака во Јапонија и австралискиот Мелбурн, кои се во делба на 10. место.
Bloomberg
Велингтон и Окленд бележат најголем пад на оваа листа, откако се „слизнаа“ за 46 и 33 места соодветно.
Во спротивна насока, најголем прогрес на листата забележаа Лондон, кој се искачи за 27 места и го зазеде 33. место и Лос Анџелес, кој напредна за 18 позиции на 37. место.
Во извештајот се наведува дека Кина сè уште нема корист од укинувањето на ковид-ограничувањата, а поради руската инвазија на Украина, Киев е исклучен од списокот.
EIU посочи дека градовите се рангирани според повеќе од 30 квалитативни и квантитативни фактори во пет широки категории: стабилност, здравствена заштита, култура и животна средина, образование и инфраструктура.
Според листата, ова се 10-те најпогодни градови за живеење:
1) Виена, Австрија
2) Копенхаген, Данска
3) Цирих, Швајцарија
4) Калгари, Канада
5) Ванкувер, Канада
6) Женева, Швајцарија
7) Франкфурт, Германија
8) Торонто, Канада
9) Амстердам, Холандија
10) Осака, Јапонија
10) Мелбурн, Австралија
Ова е листата на последните 10:
163) Техеран, Иран
164) Дуала, Камерун
165) Хараре, Зимбабве
166) Дака, Бангладеш
167) Порт Морзби, Папуа Нова Гвинеја
168) Карачи, Пакистан
169) Алжир, Алжир
170) Триполи, Либија
171) Лагос, Нигерија
172) Дамаск, Сирија
.webp){kind=icon}
