Пред 150 години, Жорж Нагелмакерс, белгиски инженер и индустријалец, ги конструираше првите луксузни возови „Ориент експрес“ низ Европа. Оттогаш само малку имиња во светот на луксузните патувања предизвикаа такви асоцијации како „Ориент експрес“. Железничкиот превоз од Париз до Истанбул всушност беше пионер на луксузното патување на таа доба.
Денес легендата е оживеана во Италија. Како што е најавено во соопштението на француската хотелска групација „Акор“ (Accor), која во 2017 година се стекна со 50 отсто од акциите на брендот (преостанатите 50 отсто се во сопственост на „СНЦФ груп“, државната железничка компанија на Франција), проектот е заедничка инвестиција на оваа групација и на италијанската инвестициска фирма за недвижности „Арсенале“ (Arsenale), поддржана од главниот италијански железнички оператор „Трениталија“ (Trenitalia) и од „Фондационе“ (Fondazione FS Italiane), која управува со историските железници и возови во земјата.
Почнувајќи од годинава, возовите на „Ла долче вита“ (La Dolce Vita) ќе нудат избор на патувања од една до три ноќи од Рим и преку Сицилија. Сега се отворени предрезервации со депозит од 500 евра, кој може да се врати доколку се променат плановите.
„Тоа е како луксузно крстосување, но по шини“, рече Паоло Барлета, извршен директор на „Арсенале спа“, кој ќе работи со услугата во соработка со брендот „Ориент експрес“.
Alessio Paduano/Bloomberg
Возот е омаж на гламурот, радоста на живеењето и уметничкиот ентузијазам од 1960-тите, посветен на славењето на животот, духот на слободата, благосостојбата и задоволството, пишува на официјалната веб-страница.
„Диморестудио“ (Dimorestudio) и дизајнерското дуо Емилијано Салчи и Брит Моран, обајцата инспирирани од изработката на златната доба на италијанскиот дизајн, се најзаслужни за внатрешноста на луксузното патување по шини.
Во „Ориент експрес“ можете да изберете помеѓу две категории на сместување: од луксузни кабини до апартмани, а секој од 11-те вагони е врв на луксузот.
Alessio Paduano/Bloomberg
Покрај сето тоа, програмата ветува и гастрономско уживање со италијанска музика и вина, бели чаршафи со везови во стилот на „Ориент експрес“, со врвни маслинови масла, старински прибор за јадење и италијанска керамика. Се споменуваат деликатеси како корални ракови и тартуфи, а појадокот „Гранд турнеја низ Италија“ е инспириран од историјата на возот „Ориент експрес ла долче вита“ и се служи во собите. На менито: свеж овошен сок, сицилијански бриош, регионални џемови и италијанско кафе, објавено е на официјалната веб-страница.
Погледнете внатре.
Освен во Италија, обновената железничка служба, како што претходно беше најавено, ќе оди и на три меѓународни дестинации од Рим: Истанбул, Париз и Сплит. Засега не е прецизирано кога се планирани турнеи надвор од Италија.
Цените започнуваат од 2.500 евра по лице за ноќевање во луксузна кабина до 3.700 евра по лице во апартман. Цените ќе бидат потврдени во согласност со маршрутата и избраниот датум на поаѓање, се наведува во соопштението за медиумите на „Акор груп“ (Accor Group).
Исто така, можно е да се резервира целиот или дел од возот, како и тури „Ориент експрес ла долче вита“ за приватни или деловни прослави и настани.
.webp){kind=icon}
Во моментов нема коментари за веста. Биди прв да коментира...