Санторини е дефинитивно една од најпосакуваните, но и најскапите дестинации кога станува збор за летување. Сепак, не мора да биде така. Зајдисонцето во Иа, веројатно единствено во светот што добива аплауз од посетителите, е една од работите што овде треба да се доживеат, но постојат многу други места на островот што можете да ги видите дури и ако сте допатувале со помал буџет. Ние ги одбравме следните пет.
1. НЕА КАМЕНИ
Ако сакате добро да го истражите островот, најдобра опција е да си резервирате целодневен излет со брод и тоа е единствениот начин во еден ден да видите многу од атракциите.
Се тргнува од малото пристаниште во Фира, главниот град на Санторини. До него се стигнува на три начини. Со пешачење по релативно стрмните 587 скали, со изнајмување мазга или магаре за 10 евра или со жичница, за која ќе треба да платите шест евра. Имајте предвид дека доколку го одберете „полесниот“ пат, ќе треба да одвоите уште толку од буџетот за да се вратите назад. Доколку, пак, сте во полна кондиција, освен што треба да понесете соодветни обувки, добро е да знаете дека по скалите ќе се соочите со многу измет и аромата на моменти воопшто не е пријатна.
По малку невообичаено, за време на нашата посета, која ја реализиравме за велигденските празници, кога метежот е значително поголем, затекнавме малку туристи качени на магаре, кое овде традиционално се користи како „превозно средство“. Кампањата за нивна преоптовареност од страна на дебели туристи што пред неколку години ја почнаа борците за правата на животните очигледно дала плод, иако треба да се нагласи дека локалното население живее од овие тури.
Ѓорге Стојанов/Блумберг Адрија
Што се однесува на крстосувањето, освен луксузни пловења со катамаран, овде се достапни и релативно евтини групни излети. Оној што го одбравме важи за еден од најпопуларните и чини 25 евра. Сè уште активниот вулкан на малиот ненаселен остров Неа Камени е првата станица. Посетителите се искачуваат по чакалеста патека за да стигнат до врвот на 130 метри високиот вулкански кратер, од каде што може да направат целосна обиколка околу прстенот. Овде се наплаќа влезница од пет евра.
Ѓорге Стојанов/Блумберг Адрија
Бродот продолжува до соседниот мал остров Палеа Камени, каде што ви се нуди уште едно уникатно доживување - можност за капење во термалните извори. Авантурата завршува на Тирасија, втор по големина остров од малиот тркалезен архипелаг сместен во јужниот дел на Егејско Море. За две порции со морски плодови, помфрит, грчка салата, узо и пиво во една од таверните до самото море ние плативме 45 евра. Колку за споредба, толку пари потрошивме на главното пристаниште за две порции гиро и за две пива.
2. ЦРВЕНАТА ПЛАЖА
На 12 километри југозападно од Фира се наоѓа древната минојска населба Акротири, која важи за едно од најдобрите археолошки наоѓалишта во Грција. Толку добро е зачувано што често го споредуваат со Помпеја. Ако патувате сега, за посета на ова место ќе треба да одвоите 12 евра, а од ноември до март ќе платите двојно помалку.
Црвена плажа/Фото: Ѓорге Стојанов, Блумберг Адрија
Во близината на Акротири се наоѓа црвената плажа, една од најфотографираните на островот поради неверојатниот контраст помеѓу црвените вулкански камења и карпи и кристално чистото море. Овде влезница не се наплаќа, но треба да имате на ум дека грчките власти не ја препорачуваат од безбедносни причини. Сепак, и покрај многубројните табли со предупредувања дека постои голема опасност од одрони и дека плажата е опасна по живот, туристите масовно ја посетуваат, особено во летниот период.
Црвена плажа/Фото: Ѓорге Стојанов, Блумберг Адрија
3. ПЕРИСА
Најпознатата и најпопуларна плажа на Санторини се наоѓа токму овде. Овој шест километри долг појас со црн вулкански песок, кој се протега до селото Периволос, изобилува со кафулиња и таверни. Генерално, овде ќе ви требаат пари да изнајмите лежалка и чадор, но има доволно простор да ставите и своја крпа. Местото е идеално за семејства со деца, но и за оние што допатувале овде првенствено да се одморат. За разлика од скапите Фира и Иа, овде може да најдете пристојно и релативно пристапно сместување со вклучен појадок.
Ѓорге Стојанов/Блумберг Адрија
4. ПИРГОС
Највисокото населено место на островот и негов поранешен главен град. Плени со впечатлива архитектура, а прошетката низ тесните улички до црквата „Света Марија“, која се наоѓа на врвот од ридот, е посебно доживување. Последните две децении Пиргос станува особено интересен за туристите, откако и овде почнува да се нуди луксузен туризам со повеќе бутик-хотели и ресторани, кои не може да си ги дозволи секој.
На островот има и други селца со препознатливи варосани објекти и живописно обоени врати и прозорци, кои доколку имате доволно денови, можете да ги истражувате со часови. Дефинитивно едно од поубавите е Мегалохори. Еднакво живописнo како Иа, но многу поевтинo.
Ѓорге Стојанов/Блумберг Адрија
5. ВИНСКИОТ МУЗЕЈ
На Санторини ќе пробате уникатни вина, особено оние од асиртико, автохтоно бело грозје што потекнува одовде, а низ годините е раширено низ цела Грција. Домаќините овде се горди и на нивното црвено, слатко и многу јако десертно вино „винсанто“.
Вински музеј/Фото: Ѓорге Стојанов, Блумберг Адрија
На островот има дваесетина локални винарници, а повеќето од нив се отворени за посета. Ние се одлучивме за винарницата и вински музеј „Г. Куцојанопулос“, винарска визба со уникатен музеј, кој е сместен на осум метри под земја во вулканска пештера. Освен прошетка во подземните простории со восочни фигури, каде што може да се видат реквизити стари и околу 400 години, за 25 евра добивате и дегустација на четири од најпознатите вина што се произведуваат овде.
Вински музеј/Фото: Ѓорге Стојанов, Блумберг Адрија
.webp){kind=icon}
Во моментов нема коментари за веста. Биди прв да коментира...