.webp){kind=icon}
Короната ја зголеми популарноста на камповите во Европа за осум пати, а овој туризам сѐ повеќе добива на масовност и на популарност и кај нас. Македонија, исто како и Србија, нема море, но има чиста и недопрена природа, планини, реки и езера, а очигледно и квалитетна услуга. Така барем се изјасниле корисниците на „Кампинг.инфо“, една од најпосетуваните платформи за кампување која нуди преглед на над 23.000 кампови ширум Европа.
Сите три најдобро рангирани македонски кампови според овој релевантен онлајн водич се наоѓаат во Струга и во околината на градот. Едно ноќевање кај нив во просек чини 15 евра, а во продолжение ви пренесуваме што сѐ им се нуди на гостите кои се заинтересирани да кампуваат овде.
Највисоко оценет е кампот „Скаут“ претставен како идеална пошумена површина од 6.500 квадратни метри на работ на градот Струга на брегот на Охридското Езеро.
„Совршено позициониран, на само 1.000 метри од центарот на градот, 800 метри од главниот зелен пазар и со пет различни плажи во радиус од 600 метри, го прави уникатен за младите кои сакаат активен одмор и забава на пешачка дистанца, но и за семејства кои претпочитаат тивко кампување под целодневна длабока сенка на 50-годишни дрвја, а сепак да се блиску до главните градски случувања“, стои во описот на „Кампинг.инфо“.
Depositphotos
Овде имате опција да изнајмите и дрвени куќи, но и соби, ако сте од оние кои имаат желба за кампување, а не се љубители на шатори и сакаат цврста подлога за спиење. Од мај до октомври, на посетителите им се нудат и специјални пакети за неограничен престој во кампот, а цените се движат од 320 до 500 евра во зависност од потребите на камперите и од тоа дали користат нивен или изнајмен шатор. Добро е и да знаете дека во ек на сезона овде редовно се одржуваат разни курсеви и работилници.
Според податоците на сајтот, „Скаут“ е и еден од најопремените кампови кај нас. Гостите имаат на располагање машини за перење алишта, заеднички фрижидер и скара, означени места за готвење и простор за јадење, простор за багаж, бар и пицерија. Во комплексот има и лулашки за релаксација, терени за кошарка, одбојка и ракомет, а можете да изнајмите и кајак или велосипед.
Втор на листата со најдобро рангирани македонски кампови е „Рино“. Како што е наведено во описот, се наоѓа на околу три километри од Струга и на 16 километри од Охрид, во тивка природна околина со поле директно до езерото.
Од европските кампери ова место има највисоки оценки за локацијата, храната и гостопримливоста, а во 2021 и 2022 година беше прогласен за топ-дестинација според корисниците на истата платформа.
Depositphotos
На нивниот официјален сајт е наведено дека објектот располага со 50 парцели, шест тоалети и четири тушеви. Околу кампот можете да пешачите, да отидете на пливање или да го изнајмите нивниот брод за мало патување по езерото и за риболов.
„Лекј Сајд“, кој се наоѓа во селото Калишта на четири километри од Струга, ја заокружува листата со кампови кои оставиле силен впечаток кај туристите што ја посетиле нашата земја. Отворен од март до октомври, овој мал камп има највисоки оценки и од корисниците на „Трип-адвајзер“. Велосипедизам, пливање и риболов се активностите кои гостите најчесто ги препорачуваат овде.
„Лоциран на мирно место на брегот на Охридското езеро, овој камп прави да се чувствувате удобно“, пишува на страницата на „Кампинг инфо“ каде се’ поголем интерес за ова место покажуваат кампери од Полска, Германија и од Холандија.
