.webp){kind=icon}
По минатогодишното соборување на рекордите во туризмот, грчките острови летово се на врвот, а до крајот на годината се очекуваат уште повеќе посетители. Додека туристите одат на познатите плажи и прават редици пред локациите за сувлаки во шпицот на сезоната, агентите за недвижности се зафатени со богати клиенти што бараат вили за да го продолжат својот престој на островите во текот на целата година.
Деспина Лау, шефица на приватната канцеларија на „Сотбис интернешнал“ (Sotheby's International Realty) во Грција, вели дека има значително зголемување на прашањата и заинтересираноста од потенцијални купувачи за време на нивните летни одмори.
„Вообичаено е таквите прашања да се претворат во вистинско купување во месеците по шпицот на сезоната“, вели таа, додавајќи дека повеќето купувачи доаѓаат од Грција, САД и Швајцарија.
Серж Кауан, консултант во „ДДРЕ глобал“ (DDRE Global), вели дека промената кон „работа оддома“ по ковид е чиста нето-корист - со оглед на привлечноста на грчките острови, посетителите остануваат подолго. „Миконос и Санторини беа посебни бастиони за вилите“, вели тој, додавајќи дека „дестинациите како Парос добиваат сѐ поголема популарност“.
Цените на недвижностите на островите Киклади пораснаа, достигнувајќи ги највисоките нивоа во последната деценија според новите податоци од истражувањето на „Геоаксис“ (Geoaxis). Островот Миконос, особено познат по хедонистичката мешавина од барови, клубови на плажа и ресторани, забележа пораст на цените за 10 отсто во однос на претходната година.
Тоа е делумно резултат на грчката програма за златна виза – која нуди престој во замена за странски инвестиции – што предизвика бран на заинтересираност кај странските купувачи, особено од Кина. До крајот на август грчката влада ќе ја зголеми потребната инвестициска сума на минимум 800.000 евра (863.000 американски долари) од 500.000 евра во популарните области како Атина, Миконос и Санторини; во помалку населените места и понатаму ќе важи долниот праг од 400.000 евра. Како причина за промените Владата го наведе притисокот врз пазарите за домување и изнајмување во земјата.
„Програмата за златна виза несомнено игра улога на пазарот на луксузни недвижности во Грција за зголемување на вкупната побарувачка и привлекување меѓународни купувачи“, вели Лау. „Сепак, нејзиното влијание врз ултралуксузниот сегмент е помалку изразено“. Таа додава дека богатите купувачи, наместо тоа, приоритет му даваат на потенцијалот за инвестирање во нивен втор дом или на ексклузивноста на недвижноста.
Ова се четири локации што моментално се на продажба:
Bloomberg
Нова вила на Миконос за 25 милиони евра
• Големина: 1.344 м²
• Соби: 10
• Бањи: 12
• Клучна погодност: Бесконечен базен
Вилата „Литос“ е една од најскапите куќи што се појавија на пазарот на Миконос во 2024 година. Неодамна завршениот проект на грчката претприемачка Софија Битара, основачка и креативна директорка на модниот бренд „БСБ гарментс“ (BSB Sa Garments), е современа вила од 1.344 квадратни метри, инспирирана од традиционалниот миконски стил. (Замислете бели ѕидови и обилна употреба на камен.)
Просторот, распространет на три нивоа, нуди поглед на Егејско Море, кон омилените острови Парос и Антипарос. Тука има кинособа со проектор и вежбалница со опрема на „Техноџим“ (Technogym), но главна атракција е загреаниот базен, кој се протега речиси по целата должина на куќата. Недвижноста се продава целосно наместена во нежна природна палета на бои, а исто така е достапна и за изнајмување по цена од 125.000 евра неделно.
Неокласична вила со базен на покривот на Сирос за 5,5 милиони евра
• Големина: 771 м²
• Соби: 10
• Бањи: 10
• Клучна погодност: Пространа тераса на покривот со поглед на морето и на базенот
Bloomberg
Наместо бела и сина боја и природен камен по кои се познати островите, оваа реставрирана неокласична вила, позната како „Андромеда“, има розова фасада. Сирос, главниот град на островите Киклади, е домаќин на регионалните судови и јавните канцеларии, што значи дека во текот на целата година има раздвижено население, не само во летната сезона.
Внатре има паркет во облик на рибја коска, заоблени стаклени прозорци и скали од бел мермер што водат до спалните соби, кои имаат тавани на висина од 16 метри. Неколку соби имаат приватни базени и веранди со поглед на соседните Миконос и Тинос. Тука има и градина со сенка и базен на покривот, каде што можете да уживате во зајдисонцето на Егејско Море. Историската недвижност е во непосредна близина на пристаништето, продавниците, баровите и рестораните на градот Ермополи. Исто така има само осум минути пешачење до плажата.
Куќа со поглед на пристаништето Хидра за 5,5 милиони евра
• Големина: 618 м²
• Соби: 4
• Бањи: 4 комплетни, 1 половина
• Клучна погодност: Приватни тераси скриени зад рачно направени камени ѕидови
Bloomberg
Островот Хидра без автомобили, познат по својата природна убавина, магарињата и куќите вградени во нерамниот терен, одамна е популарен кај богатите атињани, бидејќи е на само два часа возење со ферибот од пристаништето Пиреја. „Вила дела вита“, која зазема идеална позиција на ридовите со поглед на пристаништето, рестораните и баровите, е на само пет минути пешачење до морето.
Вилата има голем надворешен простор, идеален за користење во различни периоди од денот, така што секогаш можете да уживате во поволната медитеранска клима. Тука има и тераса, директно од главната спална соба, која сопствениците ја користат за појадок; тераса покриена со винова лоза за ручек; и тераса свртена кон запад за гледање на зајдисонцето за време на вечерата. Покрај главниот базен има бар.
Куќа покрај брегот на Миконос за 6,5 милиони евра
• Големина: 520 м²
• Соби: 7
• Бањи: 7
• Клучна погодност: Директен пристап до вода
Bloomberg
Сместена на јужниот брег на Миконос, блиску до плажата Глифада, затворената вила има бесконечен базен, но исто така е на само неколку чекори од морето, што ви дава чувство дека имате сопствен приватен дел на брегот. Распоредот на куќата е дизајниран за големи групи; покрај главната, на приземјето има шест спални соби, со независна контрола на температурата.
Главниот апартман со големи прозорски стакла го зафаќа целиот горен кат, нудејќи тераса околу целиот имот со камин и џакузи. Вилата се наоѓа во мирниот дел на островот што е познат по ноќниот живот до зори, но е на само 15 минути возење до продавниците, рестораните и баровите на градот Миконос.
