„Ербиенби“ планира да воведе луксузни услуги, како личен готвач и масажи

„Ербиенби“ (Airbnb Inc.) планира да понуди повеќе луксузни удобности следната година за да привлече повеќе патници да го изберат нејзиното наместо хотелско сместување. Компанијата се подготвува да го прошири својот бизнис надвор од сместувањето и да понуди искуства во „услуги што ќе го направат 'Ербиенби' подобар за гостите“, рече Дејв Стивенсон, главен деловен директор, во интервју на маргините на Олимпијадата во Париз. „Ербиенби“ размислува за услуги како личен готвач, чистење во средината на неделата или подобрување на леснотијата на транспортот и пријавувањето, додаде Стивенсон.

Тој ги повтори коментарите на финансиската директорка Ели Мерц, која истакна потенцијални додатоци како храна и спа-услуги.

Стивенсон, чија сопруга добила масажа за време на нивниот престој преку „Ербиенби“ во Париз, рече дека компанијата размислува за нови понуди со неколку прашања на ум: Зошто патникот не би престојувал во „Ербиенби“ односно што го прави полесен престојот во хотел? И како може една компанија да го направи своето дејствување полесно за домаќините и за гостите?

Тој додаде дека официјална, подетална најава за идејата може да дојде „на почетокот на следната година“.

Директорите на „Ербиенби“ сè повеќе навестуваат можни нови области на раст. Извршниот директор Брајан Чески рече дека компанијата е подготвена да се прошири надвор од својата основна понуда за изнајмување откако ја помина изминатата година усовршувајќи ја апликацијата за да ги подобри доверливоста и транспарентноста на цените и да ги отстрани огласите со послаб квалитет.

Акциите на „Ербиенби“ се зголемија за околу еден отсто во Њујорк во средата минатата недела.

Конкретно, компанијата планира да ја зголеми понудата на бутик хотелски соби.

„Ќе видите како ќе продолжиме да го користиме 'Хотел тунајт' (HotelTonight) како канал за воведување бутик хотели на ’Ербиенби’“, рече Стивенсон, мислејќи на купувањето на платформата за понуда на хотелски соби „Хотел тунајт“ во 2019 година.

Сместувањето во бутик хотели е „одличен начин за патување“, особено за деловните луѓе, додаде Стивенсон. „Едно или две ноќевања понекогаш не се најдобра опција за престој во ’Ербиенби’, кој обично е подолг“.

Прогресот на компанијата кон бутик хотелски соби е делумно одговор на милјето на локални регулативи дизајнирани да ги ограничат услугите за споделување на приватно сместување, каква што впрочем е и „Ербиенби“. Чески во ноември рече дека бутик хотелите би можеле да ја „дополнат“ понудата во Њујорк по новите регулативи за користење на становите што ги воведе градот.