Како родното место на Меланија Трамп стана туристичка атракција

На денот на инаугурацијата на американскиот претседател Доналд Трамп во Севница, Словенија, родниот град на неговата сопруга Меланија Трамп, се собра голема толпа. Ова е релативно мала општина со 4.500 жители во Посавје, која речиси преку ноќ во првиот мандат стана вистинска туристичка атракција.

„Вниманието што Севница го ужива благодарение на првата дама на Америка, градот добро ќе го искористи за време на овој претседателски мандат“, велат од локалниот Јавен институт за култура, спорт, туризам и младински активности (КШТМ Севница).

По тој повод во Севница беше организирана богата културно-туристичка програма во чест на нивната поранешна сограѓанка. Така, на денот на инаугурацијата, во периодот од 13 до 15 часот, се одржа бесплатен разглед на градот со водич наречен „Патеките на првата дама“, при што првите посетители имаа можност да ги обиколат деловите на Севница каде Меланија Трамп го поминала детството и младоста, тогаш се‘ уште како Меланија Кнавс.

„Бевме многу задоволни од посетата. На турнејата присуствуваа посетители од различни градови, а се интересираа, на пример, каде Меланија одела на училиште“, ни изјави директорката на институтот КШТМ, Мојца Перновшек.

Меѓу другото, тие се прошетаа и до замокот Севница, каде им беа претставени производи кои симболично се поврзуваат со претседателската двојка. Гостите можеа да уживаат во познатата торта „Меланија“, која беше создадена за време на првиот мандат на Трамп, а ја пробаа и специјалната пита „Прва дама“ и претседателскиот бургер, кој е дизајниран во чест на американскиот претседател, за кој се верува дека е љубител на хамбургери.

Замокот е една од главните атракции во Севница/Извор:КШТМ Севница

 

Уште за време на првиот мандат на Доналд Трамп, угостителите, туристичките работници и претприемачите од Севница препознаа можност на пазарот да понудат производи што го носат името на првата дама. Така се создадени пити, десерти, кафе, вино, чај, креми, колачи и многу повеќе.

Палетата на производи развиена од локални производители од Севница во чест на Меланија Трамп сега се нуди под брендот „Прва дама“. Сега можете да ги споите десертите и веќе познатите претседателски хамбургери со кафе и чај, кои содржат специјални мешавини поврзани со брендот „Прва дама“. Во колекцијата се и виното „Модра Франкиња“ (Modra Frankinja) кое е создадено во соработка со четворица локални винари, месниот специјалитет „Севнишка салама“, козметички производи од колекцијата за нега, како и влечки од „Копитарна Севница“ наречени „Белата куќа“.                      

Колку чинат производите од „Првата дама“? Ги дознавме и цените на производите од колекцијата „Првата дама“, кои не се секаде објавени: виното „Модра Франкиња прва дама“ (вклучувајќи ја и картонската кутија) чини 27,90 евра, додека чајот 3,60 евра. Доколку сакате да пиете чај од шолјата на првата дама, тоа ќе ве чини дополнителни 17 евра. Кремот за нега на кожата од „Првата дама“ е достапен за 15,30 евра, додека можете да се разгалите во влечките „Белата куќа“ со симболичен бел пом-пом за 59,90 евра. КШТМ Севница

  

Институтот КШТМ Севница ги рекламира производите како колекција што „отсликува спој на елеганција, традиција и светски шарм“. Тие исто така наведуваат дека производите од „Првата дама“ се „дизајнирани за оние кои го ценат врвниот квалитет, вниманието на деталите и допирот на луксуз што нè поврзува со нашите корени“.

„Секоја промоција е добредојдена, особено за оние од нас кои не доаѓаат од еден од попознатите словенечки региони. Нам ни е важно луѓето да слушнат за нас, да го посетат нашиот град и со задоволство ќе се вратат“, вели Перновшек.

Инаугуративната вечер во Севница ја одбележа врвна словенечко-американска гастрономија, а на настанот присуствуваа претставници на американската амбасада, компании и членови на Американската стопанска комора. Тие сметаат дека Словенците направиле премалку за да ја промовираат Словенија за време на првиот мандат на Трамп, но присутните се согласија дека имаат - барем во следните четири години - одлична можност да го привлечат вниманието на светската јавност.