Прашајте го Чат ГПТ зошто е толку тешко да се испланира одмор и неговата главна причина од вкупно осум ќе биде „парализа во одлучувањето“. Преоптовареноста со информации е на второ место.
Како и сè што генерира бот, тој одговор е премногу едноставен. Но не е неточен. На списокот грижи би додале и високите влогови на ограничениот годишен одмор, тешкотијата да се усогласат истражувањето и опуштањето, како и економската неизвесност. Да не ја спомнуваме коцката што сите ја прифаќаме кога бираме меѓу вечна дестинација што може да ја преплават гужви и непознато место што можеби ќе го имаме само за себе. Не е ни чудо што е тешко да се направи првиот чекор.
За годишниот водич за патувања на „Блумберг“ за оваа година, ја олеснивме повеќе од кога било задачата да се пробиете низ шумата од информации. Следниве 20 дестинации се комбинација од освежени класици и бисери кои минуваат под радарот, секоја преполна со нови дози луксуз и креативна енергија. Тука се шкотските острови за кои никогаш не сте размислувале, голем азиски град–велесила на храната кој не е во Јапонија или Тајланд, и воодушевувачки национални паркови со нови, раскошни одморалишта. Тука се грчките планини наместо грчките острови (верувајте ни на збор, нема да зажалите), аргентинската престолнина на копнено едрење и карипската кралица на тивкиот луксуз. Меѓу она што се отвора во 2026 година и она што се „крчка“, веруваме дека сите овие места се на прагот на заслужен центар на вниманието.
Уште подобро, голем дел од годинешната листа силно се насочува кон вредноста, заменувајќи ги пренатрупаните и прескапи локации со места каде лесно може да се најдат врвни хотели за помалку пари.
Составувањето на оваа листа трае цела година. За да ја направиме, собираме и следиме вести од стотици извори, ги вкрстуваме со туристички експерти на кои им веруваме ширум светот и испраќаме репортери на првата линија на следните големи трендови. Резултатот е мапа за патување за 2026 година, која е и нова и сигурна, полна со изненадувања и загарантирани уживања.
Исто така е преполна со информации што ви се потребни за да го испланирате патувањето.“
Бареал, Аргентина
Бегство од секојдневието во сенката на Мендоса
Националниот парк Мендоса во Аргентина | Depositphotos
Бареал, градче оддалечено 224 километри северно од Мендоса, е познато на мал број Аргентинци, а уште помалку на меѓународни туристи. Неговите шармантни села од тули се опкружени со високите Анди, „месечеви“ пустински рамнини, бујни лозја и пештери украсени со праисториски цртежи. Може да ги посетите семејните пекари и производители на сирење, да пробате занаетчиски сидер и локално вино, или едноставно да уживате во грандиозниот пејзаж на пикник во пампасите.
Ноќе, небото овде е меѓу најтемните во светот, па набљудувањето на ѕвездите е спектакуларно. Со други зборови, има многу за посетителите кои бараат кулинарски, културни, па дури и авантури што поттикнуваат адреналин. До неодамна, доаѓањето овде често значеше скромен сместувачки капацитет во едноставни пансиони или кампување во пространи национални паркови. Убаво, но не за секого.
Сега овој малку познат агол на Јужна Америка почнува да ги пречекува првите комфорни услови со пет ѕвезди. За тоа е заслужна моќна нова екипа хотелиери во која се поранешниот државен министер Маркос Пења, Емилијано Ескура, потпретседател на Министерството за национални паркови, Гонзало Робредо, поранешен претседател на туристичката организација на Буенос Аирес и Маита Баренечеа, советничка за патувања на која се обраќаат и други советници кога станува збор за Аргентина. Тие ја реновираа старата куќа за одмор покрај реката во таа област „Посада Пасо де лос Патос“, која беше отворена во септември. Тоа е првото отворање во новиот потфат под името Пирка, за кој оваа четворка се надева дека ќе осветли делови од земјата богати со култура, но малку посетени. За вториот проект ја избраа јужна Патагонија.
Обновениот „Пасо де лос Патос“ има десет соби полни со антиквитети и две вили, опремени со локално изработени шешири и понча за да ги греат гостите за време на турите, како и готвачи кои подготвуваат оброци на оган, спарени со малбек вино, под огромниот балдахин од ѕвезди. Но би пропуштиле многу ако не ја зголемите дозата адреналин. Околу 30 минути јужно од хотелот се наоѓа Пампа дел Леонцито, огромна, ветровита рамнина која е единствената преостаната трага од древно езеро со плитко дно. Тоа е воедно и едно од ретките места во светот каде може да пробате land sailing, натпреварувачки спорт што подразбира управување со трицикл без мотор со огромно едро, преку белите пустински рамнини, со брзини и до 120 километри на час.
Кога да се оди:
Пролет и есен нудат најпријатно време, иако силните ветрови, идеални за land sailing, се присутни во текот на целата година попладне. Март е време на фестивалот на бербата на виното со паради и фолклорни игри, додека ноември го носи Националниот фестивал на традицијата, кој ги истакнува ракотворбите и гастрономијата на локалните гаучо заедници.
Кога да не се оди:
Во јули и август ветровите се помалку постојани, а температурите пониски, додека декември, јануари и февруари најчесто се премногу топли за многу активности на отворено.“
Сардинија, Италија
Добре дојдовте во „сината зона“
Плажата Кала Мариола на Сардинија | Depositphotos
Додека, гледајќи ја серијата „Белиот Лотос“, многубројни туристи се занимаваа со освојување на Сицилија, сè поголем број луѓе од туристичката индустрија сфаќаат дека блиската Сардинија нуди речиси ист број марини за мегајахти, плажи бели како пудра и хотели со пет ѕвезди, но со само дел од гужвата. Сигурен знак за раст на побарувачката е едноставен: повеќе директни летови. Овој италијански остров ја победи Ибица во анкета во која членовите на „Скајмајлс“ (SkyMiles) гласаа за нови дестинации.
Тие верни посетители несомнено ќе појдат кон гламурозната тиренска област Коста Смералда, која Ага Кан ја прослави во 1960-тите. Меѓу знаменитостите овде е и неодамна реновираниот „Белмонд хотел“. До лето, областа ќе добие нов хотел „Мандарин ориентал“ со 83 соби, скриен во шумата.
Сепак, она што ја прави Сардинија навистина посебна е нејзиниот статус на сина зона, кој препознава толку здрав начин на живот што многумина овде живеат повеќе од 100 години. Локалното население истакнува дека виното богато со антиоксиданти има врска со тоа. Многу праисториски локалитети: има повеќе од 7.000 за истражување, вклучувајќи мистериозно сложени кули, наречени според нивната конусна форма и сложената каменорезба.
Кога да се оди:
Иако летото и гужвите се синоним за висока сезона, преодните месеци – од април до мај и од септември до октомври – стануваат сè попривлечни поради пријатното време и поволни цени.
Кога да не се оди:
Прескокнете ги зимските празници. Поголемиот дел од продавниците се затвораат за сезоната, а од ноември до февруари е речиси пусто.
Габон , Африја
Нов центар за потсахарски еколошки туризам
Depositphotos
Џеф Безос можеби не е во бизнисот со луксузни патувања, но делумно благодарение на него, светските патници и познавачи одеднаш размислуваат за Габон. Неговиот фонд вети 30 милиони долари за напори за зачувување на природата во таа земја, со што се помага заштита на околу 30 проценти од нејзината копнена површина и 13 национални паркови.
Во нив се наоѓаат бујни прашуми кои се живеалиште на западните низиски горили и ретките мандрили, додека долж околу 885 километри недопрен атлантски брег почесто може да се сретнат диви слонови и нилски коњи кои „сурфаат“, отколку туристи жедни за сонце.
„Габон не е место за некого кој првпат оди на африканско сафари и веројатно сака класични пејзажи со баобаби и сцени со лавови. Но, бидејќи добар дел од супсахарскиот регион е заситен со туризам, западна Африка привлекува храбри љубители на природата“, вели Николa Шепард, чија „Експлорејшн“ прави единствени итинерери за Габон уште од 2023 година.
Понатаму, во последниве неколку години, Националниот парк Лоанго доби два удобни кампа, воведувајќи ги патниците во самото срце на дивината. „Акака форест камп“ е центар за сафари со кануа, пешачења и возење низ џунглата. А во „Ндола камп“ покрај горилите главно внимание привлекуваат и стадата слонови, биволи и црвени речни свињи.
Кога да се оди:
Сувата сезона, од јуни до август, е идеално време на брегот да се набљудуваат мигрирачки китови, а во Националниот парк Лопе парењето на мандрилите. Трекинг со горили е достапен во текот на целата година.
Кога да не се оди:
Од октомври до ноември дождовите се најсилни, што го отежнува набљудувањето на дивите животни. Повремено, патиштата во рамките на националните паркови можат да станат непроодни. Сепак, остатокот од дождовната сезона, која трае до мај, вреди да се разгледа: тогаш постои можност да се види гнездење на желки и младенчиња во Понгари, како и слонови и нилски коњи на плажите.
Алмати, Казахстан
Креативна енергија во степите на Централна Азија
Depositphotos
Астана можеби ја презеде титулата главен град на Казахстан во 1997 година, но по култура, Алмати и понатаму суверено владее. Најголемиот град во земјата е во подем: рекордни 2,5 милиони посетители поминале низ областа во првите девет месеци од 2025 година.
Некои дошле поради реликвии како златната куполеста катедрала Зенков и лавиринтот од тезги на „Грин базар“ , каде што се продаваат зачини, мед и колбаси од коњско месо. (Авантуристите-гурмани тука се на своето.) Други се упатиле кон алпските езера и скијачките патеки во планините Заилијски Алатау кои се издигнуваат веднаш зад поширокото бетонско градско јадро.
Како што пристигнуваат големи културни инвестиции, овие бројки ќе растат. Оваа есен долгоочекуваниот Музеј на уметности во Алмати се отвори со остар избор на казахстански и средноазиски уметници. Неколку блока северно, британскиот архитект Асф Кан го преобликува советскиот кинотеатар за современа уметност - галерија, библиотека и простор за перформанси со преполн календар, од изложби за казахстанскиот филм до специфични инсталации на локални уметници.
Подемот на Алмати како културна сила на Централна Азија доаѓа и со доза носталгија. Во центарот на градот, новиот „Јурта хотел“ нуди 20 раскошни соби инспирирани од номадските јурти; неговиот бар за кумис служи еднакво многу варијанти од истоимениот ритуален пијалак од ферментирано коњско млеко. А „неономадските“ ресторани како „Aуи“, во планините јужно од градот, нудат свежи интерпретации на степските деликатеси – на пример, рачно правени тестенини со зачинета патка или јагне печено на жар.
Кога да се оди:
Алмати е актуелен во текот на целата година. Дојдете напролет или на есен поради благата клима и многу сонце, но ако планирате да одите на патеките во „Шимбулак“ северно од градот, дојдете меѓу декември и март.
Кога да не се оди:
Избегнувајте го врвот на сезоната во јули и август ако сакате да ги прескокнете летните гужви и растот на цените на хотелите.
Остров Рота, Индонезија
Вашиот прв „сурфари“
Depositphotos
Кога хотелиерката Џејмс Мекбрајд и американскиот претприемач Кристофер Бурч го отворија хотелот „Нихивату“ на оддалечениот остров Сумба во 2015 година, тие го редефинираа сурфањето не само како активност, туку и како луксузно искуство. Одморалиштето, кое стана еден од најпофалените хотели со пет ѕвезди во светот, ги спои епските бранови со врвниот дизајн и автентичното диво опкружување.
Патниците можеа да појадуваат послужени на пловечки послужавник во својот приватен базен, да пливаат со коњи од островот Сумба, да научат подводен риболов со локалното население или да се впуштат во пешачки тури низ оризови полиња. Сега, првиот спиноф на брендот настојува да го надмине тој успех, околу 160 километри источно, на островот Роте.
Ако оригиналниот „Нихи“ го редефинираше сурфањето како одмор, „Нихи роте“ е подготвен да го редефинира концептот на луксузно угостителство на навистина изолирано место. Кога ќе се отвори во април, ризортот ќе има 21 вила со покриви од трска, клуб на плажа со базен и вечери во стил на рибна пазарска скара. Академијата за угостителство ќе им овозможи на локалното население да научи занает што островот досега не го видел. По пристигнувањето, гостите ќе се пријавуваат во академијата и ќе се вклучуваат во работа со студентите.
„Идејата е заедницата и животот на рисортот да бидат неприметно поврзани“, вели Мекбрајд.
Локалците можат да ги водат гостите на „сурфарија“, каде со чамец се оди до бранови што одговараат на нивото на вештина. Истиот ветер што ги движи тие бранови го прави Роте совршено место за учење на спортот во подем – „wing foiling“ (лебдење на даска веднаш над површината на океанот, додека ве влече едро).
Пристигнувањето овде е исто така авантура сама по себе – бара лет до Купанг, на островскиот синџир Тимор во Индонезија, а потоа 30-минутен трансфер со авион. Но наградата се денови на бранови без други туристи, лов на баракуди и нуркање со кит-акули. Бонус: придонесувате за нов модел на угостителство што го става во прв план искуството водено од заедницата.
Кога да се оди:
Од јуни до септември е врвот на туристичката и сурф сезона. Април, мај, октомври и ноември се месеци кога брановите нудат сурфање без гужви.
Кога да не се оди:
За време на дождовната сезона, од декември до март, многу ресторани се затворени.
Грчките планини
Санторини и Миконос се веќе стар хит...
Depositphotos
Следната голема дестинација во Грција не бара соба од 1.000 долари за ноќ, турканица за резервација во барот на плажа, ниту преполн траект до оддалечен остров. Всушност, воопшто не вклучува острови. Далеку од гласниот ритам на Санторини и Миконос се наоѓа регион на традиционални фарми и производители на сирење, манастири стари илјада години врежани во карпи и изобилство стари камени градби. Добре дојдовте во грчките планини.
Колку и да се далеку од островите, и географски и духовно, северна Грција и внатрешноста на Пелопонез нудат многу исти кулинарски уживања и луксузни активности како островите во Јонското Море или Кикладите – и уште малку повеќе. Во Мецово, во северозападните Пиндус Алпи, на пример, можете да пливате во базен на рид, потоа да возите велосипед покрај црни смрекови шуми и да пробате каберне совињон од лозја на голема надморска височина. Мецово и другите планински гратчиња веќе се омилени на Грците како зимски засолништа.
Сега луксузните патници, уморни од екстремната медитеранска летна жештина, исто така ги откриваат овие планински оази. За првпат по повеќе од една деценија, сопствениците на хотели забележуваат дека пристигнува еднаков број резервации од топлите краишта на Америка како и од локалните гости.
Новите луксузни дестинации не можат бесконечно да се отвораат за да ја задоволат растечката побарувачка: во 2022 година грчката влада ги стави планинските живеалишта под закони за заштита на животната средина, стопирајќи понатамошна градба за да се спречи прекумерен развој и, уште полошо, пренатрупаност со туристи. Тоа значи дека бранот од неодамна отворени проекти може да биде последен од тој вид.
Еден од нив, „Мана“, е луксузен бутик-хотел со 23 соби во шумата Аркадија, околу 2,5 часа возење западно од Атина. Мрежа од 74 километри поврзани пешачки патеки минуваат низ шармантни села што изгледаат како од разгледница. Без разлика дали ќе го изберете „Мана“ или некој од конкурентите – можеби спа-ориентираниот „Еуфорија ритрит“ или удобниот сместувачки објект на фарма „Опора кантри ливинг“- големи се шансите дека ќе престојувате далеку од гужвата и ќе платите под 500 долари на ден.
Кога да се оди:
На пролет температурите се најпријатни за планинарење, а дивите цветови се најубави кон крајот на април. Летото е идеално за освежување далеку од жештината на градовите.
Кога да не се оди:
Области како Мецово се најпрометни за време на врвот на ски-сезоната од јануари до март, па за помирно патување избегнувајте ја зимската сезона.
Дакар, Сенегал
Град на западот од Африка во кој владеат уметноста и модата
Depositphotos
Сенегалското наследство кое преку трговијата со робови било пренесено на запад, како што се печатените текстили и музиката заснована на ритамот на тапани, претставува едно добро познато поглавје од културното влијание на главниот град – Дакар. Сепак, во последниве години младата креативна сцена го зацврсти градот како дизајнерска дестинација што вреди да се посети.
Еден од катализаторите беше моментот кога дизајнерката Адама Парис во 2002 година го основа „Дакар фешн вик“ за да го претстави сопствениот независен бренд. Растот на овој настан – кој во 2025 година собра рекордни 22 сенегалски дизајнери – потврдува дека Адама Парис покрена вистински креативен бран. Денес посетителите на Дакар можат да купуваат креации на Сара Диуф, чија линија „Тонгоро“ е омилен избор на Бијонсе и Наоми Кемпбел, или да набават авангардни кафтански модели на Сели Раби Кејн. За љубителите на патики тука е „Нио фар бај Милкос“, чии шарени патики и мокасини ја црпат инспирацијата од традиционалната сенегалска носија.
Уметноста исто така цвета. Кога биеналето „Дак арт“ ќе се врати напролет 2026 година, се очекува повеќе меѓународни посетители од кога било, откако веќе ја подигна летвичката на 250.000 посетители во 2024 година.
За среќа, во најпознатиот луксузен хотел во Дакар - „Тероу би“- изградени се повеќе од 100 апартмани покрај плажа. Кога ќе влезете во тренди клубот на плажа, „Ле џам“, речиси сигурно ќе се „судрите“ со следната генерација познати личности од градот.
Кога да се оди:
Јануари и февруари имаат корист од сахарските ветрови и речиси нема дожд, а постојаните бранови од Атлантскиот океан се идеални за традиционално сурфање.
Кога да не се оди:
Август и септември. Интензивната влага и бројните поројни дождови гарантираат дека ќе бидете мокри на овој или оној начин.
Шкотски архипелаг – островите Хебриди
Идеално бегство од секојдневието
Depositphotos
Знаете за Шкотска поради голфот, вискито и замоците. Но дали знаевте дека земјата има речиси исто толку острови како Фиџи? Архипелагот Хебриди долж западниот брег опфаќа 500 карпести островчиња на кои можете да уживате во путерести, богати сендвичи со јастог и да пешачите до карпи за да ја видите најголемата колонија атлантски тупики во Британија.
На пролет 2026 година, ново крстарење на луксузниот оператор „Аберкормби“ ќе го обиколи овој регион, каде сместувањето инаку е прилично рустично; 148 гости ќе имаат услуга од батлери и други погодности, а по симнувањето од бродот ќе можат да ја истражат 1.500 години старата опатија на Иона или напуштеното приморско населено место Сент Килда.
Хебридите стануваат полесно достапни со лет до Глазгов, каде може да се фати 45-минутна конекција до Ислај. Токму таму ЛВМХ отвори хотел со 12 сони; цените од 300 долари по ноќ вклучуваат дегустации на димено виски - карактеристично за овие острови.
Се разбира, имајќи ја предвид шкотската историја и култура низ милениуми, не се сите причини за посета на Хебридите во чаша. Некои се, на пример, во карпите. На островот Луис, Каланаис стендинг стоунс, постари од Стоунхенџ, се сметаат за ритуален простор на друидите. И не заборавајте на ѕвездените дождови – островите се познати по исклучително темното небо, што овозможува спектакуларни ноќни глетки.
Кога да се оди:
Од мај до октомври. Овие месеци се најдобри за набљудување на дивиот свет и авантури во природата. Денот трае и по 22 часот околу средината на летото. А во септември е фестивалот на виски, недела прослава на најпознатиот шкотски извозен артикл.
Кога да не се оди:
Од јануари до април, кога прочуеното дождливо шкотско време речиси сигурно ќе ги расипе вашите очекувања за активности на отворено.
Островот на зачини во Танзанија
Следната голема дестинација за крстарења
Depositphotos
Не би згрешиле ако помислите дека Танзаниските острови на зачини се попристапна верзија на Малдивите, но би ги потцениле. Точно, и двата имаат врвни морски рисорти и локации во Индискиот океан и воодушевувачки сместувања со пет ѕвезди, како 12 ексклузивни бунгалови со сламнати покриви на обновениот остров Мнемба, или 70 вили со приватни базени и услуга од батлер на островот Бавe. Сепак, танзаниската група од околу 50 острови го добила името по својата, па, зачинска историја. И денес на островот Мафија ќе најдете фарми со морско оревче, цимет и каранфилче, како и свахили исцелители на островот Пемба и арапска архитектура од 12 век во Занзибар.
Сепак, можеби уште подобро е крстарењето. Во 2025 година, Франсоа-Анри Пино (сопственик на „Керинг“, под чија рамка работат „Гучи“ и „Сен Лоран“) стекна мнозински удел во ултра-луксузната компанија за мали бродови „Аква експедишнс““, која ја проширува флотата и итинерарите за да вклучи експедиции надвор од утврдени патеки, комбинирајќи ги Островите на зачини и Сејшелите, почнувајќи од зимата 2026. За среќните 30 патници на неодамна купената суперјахта долга 77 метри, тоа значи пловидби од 10 и 11 ноќи, односно едрења за време на кои ќе можат да се сретнат со џиновски желки на Алдабра, да пливаат со китови покрај Мафија, впивајќи ги мистичните свахили традиции кои датираат од древни времиња.
Напомена од уредникот: Во моментот на заклучување на текстот, Стејт департментот на САД и меѓународни партнери советуваа патниците да ги преиспитаат необврзувачките патувања во Танзанија поради политички немири во престолнината. Островите главно не беа опфатени со овие предупредувања.
Кога да се оди;
Сувата сезона трае од крајот на јуни до почетокот на октомври, со сончеви денови од зори до самрак, бистри води, азурно небо и активности на плажа како нуркање со маска и дишалка и нуркање.
Кога да не се оди:
Април и мај се дождовна сезона, а некои хотели се затворени. Доцната есен исто така може да биде дождлива.
Град Лима
Кулинарска престолнина која ќе ви го промени погледот на храната.
Depositphotos
Лима често останува на работ од глобалната гастрономска сцена и ретко е во центарот на вниманието. Но во јуни 2025 година, „Маидо“ беше прогласен за број еден на најновата листа „50 најдобри во светот“ , и го турна градот во прв план. Ресторанот, кој го води шефот Мицухару Цумура, е познат по врвната перуанско-јапонска (односно Никеи) кујна, единствен производ што настанал благодарение на големата јапонска заедница во Лима.
Сега славата околу градот се шири како што Никеи кујната го освојува светот. На почетокот на мимагтата година, „Папа Сан“ се отвори во Њујорк со варијации на севиче и робатаја јадења на скара. „Oсака Никеи“, огранок на популарно место од Лима, наскоро ќе се отвори во Чикаго (САД), а „Maнко“, кој ќе служи Никеи јадења во раскошен амбиент, доаѓа во Париз. Во самата Лима, оваа мешавина и понатаму цвета во неодамна отворениот „Шизен ресторант“ (главна шефица Мајра Флорес) и „Нау никеи руптоф“ на 21-от кат од новиот „Интерконтинентал“. Сето тоа претставува глобален кулинарски бран кој сигурно ќе инспирира многумина да тргнат на своето гастрономско патување.
На среќа за љубителите на храна, Лима тројно го зголеми меѓународниот аеродром во проект вреден две милијарди долари, кој беше завршен во јуни, а градот е полн со нови места за престој. Покрај „Интерконтинентал“, луксузната групација „Андеан“ ги реновираше шесте соби во „Aтомпорал“. Други неодамнешни отворања на групацијата, како луксузниот сафари камп „Тинајанаи“ близу кањонот Колка, нудат одлична можност за продолжување на авантурата. А шпанската групација „Мелиа хотели“ ќе отвори огранок од својата линија „Колекшн“ со пет ѕвезди во историскиот центар на градот во јули 2026, на чекор од „Плаза де Армас“.
Кога да се оди:
Лима е убава во текот на целата година, но локалците ги преплавуваат баровите и рестораните за време на летото, па периодот од декември до март е одличен (иако влажен). Тоа е воедно и најмалку погодното време за искачување кон Мачу Пикчу, па престолнината е помалку преплавена од бекпекери.
Кога да не се оди:
Туристичката сезона е на врвот од јуни до август, па тогаш е тешко да се обезбедат врвни резервации и попристапни хотели.
Острови Туркс и Кејкос
Карипски центар на „тивкиот луксуз“ што станува сè погласен.
Depositphotos
Островите Туркс и Кејкос долго беа како олимпијци што завршуваат на четврто место: најдобри во својата класа, но без медал. Нивните брегови нудат најчист контраст меѓу белото и тиркизното, прошарани со рисорти од брендови како „Aман“ и „Комо“. Сепак, луксузните патници често ги прескокнуваа поради барови на плажата Сен Бартс или гурманската Ангвила.
Затоа „Tи-си-ај“ (како што ги нарекуваат локалците) води неофицијална кампања да стане најлуксузна дестинација на Карибите, со најпрестижни хотелски ланци како „Јану“, „Валдорф Асторија“ и „Keмпински“ кои се градат на главниот остров Провиденсијалес. Иако Ангвила долго важеше за најдобро гастрономско искуство на Карибите, „Tи-си-ај“ тивко го презеде тронот.
Неодамна отворениот ресторан „Ембрес“, кој дава азиски печат на готвењето на дрва, и „Марин рум“ сместен на самиот брег на океанот, ја подигаат летвичката, поттикнувајќи ги и класичните ризорти како „Грејс беј клуб““ и „Шор клуб“ да ја унапредат сопствената гастрономија. Зголемениот број летови, не само до Провиденсијалес туку и до скриениот Јужен Кејкос, кој до 2025 година не примаше меѓународни летови, помага повеќе патници да ги откријат тие волшепства.
Севкупниот сјај речиси сигурно ќе доведе до рекордни цени. Но 2026 може да донесе малку пристапност благодарение на новиот хотел „Андаз“ со 59 соби, кој се отвора во јануари на Грејс беј. Резервирајте навреме и освојте сопствен златен медал во планирањето на одморот.
КОГА ДА СЕ ОДИ
Високата сезона традиционално трае од декември до април, но целете на јануари и февруари поради миграцијата на китови и нешто помали гужви. Мај и јуни се помалку конвенционални, но еднакво добри опции: времето останува пријатно и ветровито, со мал ризик од урагани или непријатни алги.
КОГА ДА НЕ СЕ ОДИ
Доцените летни месеци се ценовно најповолни, но само ако сте подготвени на ризик од бура. Сезоната на урагани трае од јуни до ноември, а од август до октомври се најчести временските непогоди.
Резервати на тигри во Индија
Приказна за несекојдневен успех подготвена за рефлектори.
Depositphotos
Со години и најмалата трага од тигар во Индија беше речиси невозможна. На преминот кон 20 век, повеќе од 100.000 тигри живееле во бројните шуми на таа земја, но до независноста во 1947 нивната бројност паднала на проценети 40.000. Во децениите потоа, уништувањето на живеалиштата, ширењето на човечките населби и неконтролираниот лов на трофејни ѕверови ги довеле пругастите мачки на работ на опстанок. Пописот од 2006 година покажа само 1.411 единки.
Но напорите за зачувување започнати во 1970-тите со текот на времето дадоа резултати. Иницијативите воспоставија заштитени резервати, го сузбија криволовот и, донекаде контроверзно, преселија заедници што живееле во шумите. Исходите беа мешани, но упорноста и подобрата технологија на крај го свртеа трендот.
Според најновиот попис од 2022 година, Индија има околу 3.682 диви тигри, повеќе од две третини од вкупната светска популација.
Сега постојат 58 резервати во 18 држави, а само мали делови се отворени за туристи. Националниот парк Бандхавгарх, во централната држава Мадја Прадеш, и Националниот парк Рантхамборе во Раџастан се меѓу најпопуларните дестинации за сафари со тигри.
И како што растеше популацијата, брзо растеа и опциите за посетители. Домашниот бренд Taj го отвори „Саваи Рантамборе“ во 2023 и веќе планира втор хотел близу Мадхопур, главната капија на паркот. „Oберои хотлес и рисортс“, мерило за луксузно хотелско работење во Индија, неодамна отвори камп со шатори близу Бандхавгарх, како и палатата „Oберои Рајгарх палас“ на ридестиот раб на резерватот „Пана тајгер“.
„Лила хотелс“, познат по хотелите со пет ѕвезди низ целата земја, подготвува отворања во Бандхавгарх и Рантхамборе, додека бутикот „Посткард“ најавува сафари куќички во Канха и Рантхамборе. Кога овој вториот ќе се отвори, ќе има шатори дизајнирани од специјалистот за сафари кампови „Лакшори фронтирс“. Почетните цени ќе бидат околу 2.200 долари за ноќ, што го става меѓу најскапите места за престој во Индија.
КОГА ДА СЕ ОДИ
Студената зимска сезона трае од ноември до февруари, кога можете да бидете надвор преку ден. Бонус: вегетацијата е проретчена, па тигрите полесно се забележуваат.
КОГА ДА НЕ СЕ ОДИ
Од март до јуни е најтопло и најсуво, додека монсунските дождови траат од јули до септември.
Гвајана
Еколошки туризам со ново значење.
Depositphotos
Локалците некогаш го нарекуваа успиениот Џорџтаун „следниот Дубаи“. До крајот на 2026 година, околу десетина хотели од синџирите „Хилтон“, „Хајат“ и „Мериот“ ќе се отворат во престолнината, која денес врие од градилишта и кранови, речиси колку и од пастелно обоени згради во британски колонијален стил.
Поминаа десет години откако се смени сè за оваа мала нација, во која англискиот е службен јазик, а која се граничи со Венецуела и Бразил.
„Ексон мобил“ откри нафта која сега се проценува на 11 милијарди барели долж брегот, што ја сврсти Гвајана меѓу земјите со најголеми познати резерви по глава на жител и ја претвори во најбрзо растечка економија во светот. Досега од продажба и тантиеми на нафта се остварени 7,5 милијарди долари приходи, што го трансформира главниот град и поттикна бум на деловни патувања.
За да го поддржи овој раст, земјата воведува нови летови од САД, Европа и Канада, гради нов аеродромски терминал, отвора центар за обука во туризмот вреден седум милиони долари во Порт Морант, и – можеби најважно – развива низа инфраструктурни проекти кои наскоро ќе им овозможат на патниците да го истражат биодиверзитетното, со прашуми покриено внатрешно подрачје на Гвајана.
Тука лежи вистинскиот потенцијал на Гвајана. Во регионот Рупунун, водите на Амазон течат покрај „Гвајана шилд“, карпести формации стари околу 1,7 милијарди години. Звуците на големи амазонски видови папагали одекнуваат на небото, а птици со живописни бои патролираат долж брегот на реката. Грмушките од островите нудат засолниште за диви ѕверови – јагуари и тапири. Природните убавини на речните меандри со мали езера каде живеат „џиновски“ видови речни риби, мравојади, големи видри, но и една од најголемите слатководни риби на светот - арапаима.
Сето ова можете да го доживеете ако престојувате во еколошки прифатливи хотели како „Рева еко лоџ“ и „Кајман хаус“ . Или во „Каитур гестхаус“, долго затворен објект кој по целосна реновација во 2026 повторно ќе ги отвори вратите, а е сместен на работ на еден од најмоќните водопади во светот. Ова е еден од најнедопрените агли на земјата – барем засега.
КОГА ДА СЕ ОДИ
Посетителите се превезуваат по прашливи патишта со теренски возила со погон на сите четири тркала, за време на месеците со помалку врнежи од септември до март. Недостигот на вода значи дека повеќе животни се собираат околу поилишта, што го олеснува набљудувањето. Дојдете на есен за да ги видите водопадите Каитур во полна сила, без постојана закана од дожд.
КОГА ДА НЕ СЕ ОДИ
За време на дождливата сезона од април до август, кога реките стануваат вистински автопати, а движењето низ прашумата е многу покомплицирано.
Корзика
Италијанско/француски љубовен спој за кој не знаевте дека ви е потребен.
Depositphotos
Зошто да бирате меѓу Италија и Франција кога можете да го добиете најдоброто од двете земји на едно место? Тоа го ветува Корзика, компактно островче кое лежи меѓу Марсеј и Рим во Тиренското Море. Островот подеднакво црпи од својата континентална околина во културата, кујната и дијалектот – но шармот на Корзика останува целосно уникатен.
Да го земеме планинскиот град Зонза, полн со неоготска архитектура и романички цркви: таму се наоѓа хотел стар само шест месеци – „Домен Ле Муфлон д’Ор“, од синџирот „Реле и Шато“, со 20 апартмани со откриени дрвени тавани и кристални лустери.
На северниот врв на островот, близу рибарското пристаниште Сент Флорент во пастелни тонови, интимниот „Базги- базги“ изгледа како да е пренесен од Балеарските острови – бутик-хотел на самата плажа, со базен во сенка од борови, со чадори со реси и 28 пространи соби во земјени тонови.
На западниот брег, во грчкото село од 17 век Каргезе, можете да престојувате во „Mилос“, нов хотел на карпа со избелени ѕидови, чиј ресторан со поглед кон морето спојува локално сирење и корзиканско телешко со минерални вина од островот.
Најлесниот и најгламурозен начин да го видите сето тоа е од вода, особено на „Oриент експрес кортијан““, кој со речиси 70 метри должина ќе биде најголемата едрилица-јахта на светот кога ќе биде пуштена во море летото 2026. Неговата корзиканска тура ќе опфати ноќевања во Пропријано, Калви и други пристаништа. Целта е да понуди откривање на воодушевувачки плажи, древни цитадели и гламурозни марини – места што ретко кој некогаш ги гледа.
КОГА ДА СЕ ОДИ
За најдобро време и цени, резервирајте во мај, јуни и септември.
КОГА ДА НЕ СЕ ОДИ
Иако летото е висока сезона, јули и август можат да бидат неподносливо топли. Повеќето хотели и атракции се затвораат од ноември до март поради студено и влажно време. Во зимските планински области често паѓа снег.
Пенанг, Малезија
Традиционално наследство на мултикултурен остров.
Depositphotos
Наследството е „во мода“ на мултикултурниот остров Пенанг. Кинеско-португалските трговски куќи во Џорџтаун, шарената престолнина на островот, добиваат ново руво за генерација дизајнерски освестени патници, со колонади, дрвени ролетни и дворови покриени со калеидоскопски плочки кои повикуваат векови трговија меѓу Европа и Азија.
Локалните креативци предводат иновации. Меѓу нив е архитектот Су К. Чан. Откако го отвори ценетиот „Сури рисорт“ на Бали пред речиси една деценија, се враќа кон корените со „Сури пенанг“, сместен во истиот ред традиционални куќички во кои и самиот пораснал. Се отвора на почетокот од 2026 година, а 15 апартмани комбинираат оригинални архитектонски елементи со модерни, пригушени ентериери и „инсајдерски“ пристап до соседниот будистички храм Кху Конгси.
Неколку блокови подалеку, хотелиерата Крис Онг штотуку го отвори „Aргус резиденс“, инспириран од евразиската заедница на Пенанг. Наскоро „1926 Херитиџ хотел“, симбол на колонијалниот стил на „Бурма роуд“, ќе ја прослави својата стогодишнина со целосно реновирање, додавајќи во понудата раскошни бањи со мермерни кади и услуга од батлер за соби со поглед кон градина или базен.
Необичниот архитектонски стил надградува уште една привлечност на Пенанг: храната. Мешавината од малајска, кинеска и индиска кујна е долга традиција која го обликувала островот во еден од најдобрите градови во Југоисточна Азија за „улична храна“. Не пропуштајте го „Пенинсула хаус“, амбициозен нов ресторан кој ги истакнува локалните производи преку глобални вкусови. На пример, рибен специјалитет – карпачо со луткав чипс од локалниот коренест зеленчук јам и јапонски понзу сос од ананас и џин. Сместен е во соодветно обновен архитектонски арт-деко бисер со скалиште како кула и прозорци од под до таван, кој со децении беше успиен на „Бил стрит“.
КОГА ДА СЕ ОДИ
Декември и јануари обично носат најмалку дождови и најпријатна температура. Градот е најжив за време на бројните верски фестивали во текот на целата година. Во февруари можете да присуствувате на сјајно хаотичната процесија „Таипусам“ или на прославата на Лунарната нова година.
КОГА ДА НЕ СЕ ОДИ
Пенанг има тропска жештина во текот на целата година, но особено во март и април, кога често е непријатно да се шета низ градот.
Мексикански гробишта на пеперутки Depositphotos
Погледнете ја галеријата
Depositphotos
Погледнете ја галеријата
Depositphotos
Погледнете ја галеријата
Depositphotos
Погледнете ја галеријата
Depositphotos
Погледнете ја галеријата
Климатско зајакнување на една од најголемите природни атракции во светот.
Патниците веќе долго ги следат пеперутките до мексиканската држава Мичоакан. Уште од 1970-тите, милиони монарх пеперутки ја минуваат зимата во високопланинските шуми со ојамел ела, мигрирајќи од САД и Канада во ројеви. Околу 600.000 луѓе доаѓаат да ги видат во заштитените биосферни резервати низ Централните Висорамнини на Мексико. Миграциските рути на овие кревки суштества се менуваат заедно со климата, а каде и да одат, носат духовни и економски „жили“ на околните места.
Ограничената туристичка инфраструктура долго време спречуваше ноќевања и викенд-патувања, но сè повеќе бизниси се обидуваат да го претворат интересот за пеперутките во раст на локалниот туризам. Семејниот хотел „Гардин ранчо сан кајтенао“, на 13 ари земјиште, со егзотични витражи и домашни пецива и џемови за појадок, е шармантна база. Минатата година, луксузната агенција „Џурани мексико“ воведе 30-минутни трансфери со хеликоптер од Мексико Сити за да може миграцијата да се види, така што клиентите можат да поминат ден во посета на пеперутките и заедницата во „Кресенцио моралес“, а потоа да се вратат во сместување со пет ѕвезди, како „Фор сизонс“.
Уште една новина е „Каса де ла култура Мазахуа“, центар каде што Мазахуа, автохтона група чиј корен во оваа област датира уште од 12 век, може да ги негува традициите на кои им се заканува исчезнување. Центарот го користи ова наследство како основа за работилници за посетители. Исто така развива партнерства со туристички оператори како „Натурал Хабитат Адвенчрс“ и „Натурал сафарис“ - двете познати по организирање патувања за набљудување пеперутки — со цел креирање целодневни тури кои ги истражуваат културните богатства на ова подрачје.
КОГА ДА СЕ ОДИ
Монарх пеперутките пристигнуваат во ноември и обично заминуваат во март, што се поклопува со сувата, постудена сезона. Јануари и февруари обично се најдобри за набљудување.
КОГА ДА НЕ СЕ ОДИ
Јули до септември се најтопли и највлажни месеци.
Оман Depositphotos
Погледнете ја галеријата
Depositphotos
Погледнете ја галеријата
Depositphotos
Погледнете ја галеријата
Depositphotos
Погледнете ја галеријата
Пејзажи што го одземаат здивот.
Само во Оман можете денес да јавате преку портокалови дини што се издигнуваат во назабени врвови, а веќе утредента да нуркате меѓу морски желки. Релативно мала земја, отприлика со големина на американската држава Њу Мексико, со население од околу пет милиони жители, можеби нема гигапроекти со девет цифри или мегависоки облакодери како соседните Саудиска Арабија или Обединетите Арапски Емирати. Но, она што ѝ недостасува во архитектонскиот сјај, го надоместува со неверојатна природна убавина.
На запад е прочуениот Вади Гул, познат како Големиот кањон на Арабија, додека на југ, во пустината Вахиба, се простира море од златни дини што се брануваат и до 90 метри височина. А од 2026 година овие предели ќе можете да ги доживеете преку мрежа од три нови хотели под името „Малкаи“, кои нудат патување низ разновидни предели и богатото наследство на султанатот.
Исто така, во 2026 година се отвора хотелот „Енви Ал Сифах“, инспириран од африканските сафари кампови. Комплексот ќе има 40 луксузни експедициони шатори, базен и простран спа-центар сместени на осамена плажа каде пустината се сретнува со морето – само 45 минути возење од главниот град Мускат. Оттаму гостите можат да уживаат во дневни авантури како нуркање, веслање на даска и едрење со традиционални дрвени бродови со јарболи. Вечерните излегувања носат уживање во локалната кујна и традиционалната макамат музика.
Продолжете го патувањето и престојувајте во легендарниот „Сикс сенсес Зиги беј“ во гуверноратот Мусандам, каде високите црвени карпи се надвиснуваат над приватна плажа, а спа-центарот е неодамна проширен. Регионот богат со фјордови што го опкружуваат е одвоен од остатокот на земјата и длабоко се вовлекува во Ормускиот теснец.
Сепак, планинарењето овде треба да биде на врвот на вашата листа. Оман поседува еден од најголемите комплекси на офиолити во светот — назабени делови од океанската кора кои, со судирот на тектонските плочи, се издигнале на копно. Качувајќи се по нивните степенести површини, ќе чекорите по дното на океанот, но на суво.
Кога да се оди
Декември и јануари се идеални месеци пред Рамазан, со пријатно сонце преку ден и посвежи вечери.
Кога да не се оди
Во јули и август може да биде неподносливо жешко, со крајбрежна влага што ја засилува интензивната летна пустинска температура. Повеќето активности на отворено се прекинуваат.
Сан Франциско
Прочуениот град во заливот на океанот.
Depositphotos
Да го парафразираме Марк Твен, поранешен жител на Сан Франциско: извештаите за „смртта“ на градот се во голема мера пренагласени. И покрај неправедната репутација на американското урбано пропаѓање, неговите адути никогаш не биле поизразени. Со помош на истакнати промотори како новиот градоначалник од Tикток ерата Даниел Лури и популарниот играч на Голден стејт вориорс, Стеф Кари, постпандемиското закрепнување на Сан Франциско е вистинска приказна. А ќе биде во полн сјај во 2026 година, кога се подготвува да биде домаќин на Супер бол Икс ел и Светското првенство на ФИФА.
Но и за време на помирни денови, ќе има многу нови задоволства. Градот во април официјално го отвори „Сансет дјунс парк“, со површина од 50 хектари, долж три километри од некогашниот крајбрежен автопат во населбата Аутер Сансет. Паркот носи големи уметнички инсталации покрај океанот и долгоочекуваните пивски градини на плажа. Најдобриот „смешбургер“ во Заливот ќе ги отвори вратите на почетокот од 2026 година. Историскиот Кастро театар Theatre ќе ги отвори вратите повторно во февруари, по трансформација вредна 41 милион долари.
Во друг дел од градот, културното јадро наречено Џапантаун, „Пис плаза“, конечно ќе се отвори повторно на лето по големата повеќегодишна реконструкција.
САД ќе одбележат 250 години од основањето во 2026 година, а и самиот град Сан Франциско ќе го одбележи своето основање во 1776 година, кога Шпанците ја изградија Мишн Долорес. За да ја истакне новата ера како еден од најдинамичните градови во САД, уметникот Лео Вилареал ќе го осветли Беј бриџ со монументална светлосна инсталација, долга 2,8 километри, на почетокот од 2026 година.
Дури и често критикуваниот центар на Сан Франциско покажува знаци на враќање во живот. Поранешната зграда на „Барнис“, отворена во 1909 година на Јунион сквер, по години празнина е преобразена во 1.858 квадратни метри голема галерија. А напролет, вековниот „Хантингтон хотел“ во Ноб хил повторно ќе ги пречека гостите, по двегодишно реновирање. Ќе има 143 соби уредени од Кен Фулк, меѓународен миленик на дизајнот роден во Сан Франциско. Очекувајте декоративни тавани, панели и спа со 12 соби, луксузни детали попознати за Париз или Лондон отколку за најпознатиот американски град во заливот.
Кога да се оди
Градот е благ и пријатен поголемиот дел од годината. Септември и октомври се најсончеви и најдоследно топли месеци. Мај и јуни се исто така убави, но променливи, бидејќи понекогаш се појавува карактеристичниот временски образец со облачно, мрачно небо и пониски температури.
Кога да не се оди
Од декември до март е дождлив период, но обично има и најдобри цени.
Тајпеј, Тајван
Кулинарска престолнина во подем.
Depositphotos
Тајван често се спомнува во кулинарските разговори, најмногу поради „бабл ти“ (bubble tea) и раниот развој на модерните ноќни пазари. Денес неговата престолнина, Тајпеј, стана една од највозбудливите нови гастрономски дестинации во Азија.
Ова е благодарение на комбинацијата од традиционални локали – како тезгите со пилешко и ориз – кои се наоѓаат во близина на модерни кафулиња, ресторани и пекари што функционираат и како уметнички галерии.
Туризмот бележи раст: во првата половина на 2025 година, десет проценти повеќе туристи го посетиле градот отколку во истиот период од 2024. Луксузното хотелско стопанство исто така цвета. Неодамна отворениот „Капела Тајпеј“ е објект со 86 соби во модерен стаклен облакодер, со цена на соба што започнува од околу 571 долар, со појадок кој вклучува класична говедска супа со нудли и солено соино млеко. А во 2026 година ќе се отвори и првиот хотел „Фор сизонс“ во Тајван.
Тука е и понудата на нови ресторани што ја спојуваат одличната локална кујна со меѓународни влијанија. Едно од најпопуларните места за јадења на скара во Сеул, „Голд пиг“, се отвори и таму. Уште еден одличен ресторан со најкратко име: „A“, авангардниот азиско–француски ресторан, чиј главен готвач Ален Хуанг има две Мишелин ѕвезди.
Кога да се оди
Најпријатна клима има од март до крајот на мај и повторно од септември до ноември.
Кога да не се оди
Август е месец за избегнување, бидејќи е врв на сезоната на тајфуни.
Екстремадура
Ретко место што туристите сè уште не го откриле – барем до овој текст.
Depositphotos
Прво беше Мадрид, потоа Севиља и Канарските Острови. Американците и туристите генерално не можат да се наситат од Шпанија. Затоа, иако има добри причини да ја посетите Барселона оваа година – катедралата Саграда Фамилија конечно треба да биде завршена – безбедно е да се претпостави дека најмалку истражените туристички граници на земјата нема уште долго да останат непосетени. Меѓу нив предничи Екстремадура, регион со големина на Швајцарија, меѓу Андалузија и Португалија.
Главниот град, Касерес, е мозаик од куќи со теракота и камени палати основани од Римјаните, опкружени со маварски ѕидини и кули. Неговиот најценет ресторан „Aтрио“, кој се осмелува да ја вклучи пршутата „иберико“ во речиси сите 22 јадења од менито, доби три Мишелин ѕвезди во 2025 година – признание што го претвора ресторанот во дестинација.
И ресторанот „Aтрио“ и градот Касерес се подготвени за тоа. Сопствениците на ресторанот прво отворија хотел со 14 „спартански соби“, а потоа во соседството 11 раскошни апартмани со сводести тавани. „Хилтон“ се позиционираше во непосредна близина со отворањето на хотелот „Паласио де Годој“ во септември – објект со 73 соби чиј дизајн ги надминува очекувањата за својата категорија.
Градот стана и клучна станица за љубителите на уметноста. Музејот на применета уметност Хелга де Алвеар, отворен во 2021 година, е приватна колекција на основачката и содржи монументални дела на сликарите Аи Вејвеј и Пабло Пикасо. А љубителите на возови наскоро ќе можат да ги користат услугите на луксузниот воз „Aл Андалуз“, едно од сè популарните железнички искуства со пет ѕвезди во Европа. Планиран за пролет, возот ќе застанува во Екстремадура на рутата што ја поврзува Севиља и Мадрид.
Ако сето тоа не е доволно за Екстремадура да засјае, новиот хотел „Розвуд“ сигурно ќе успее. Моментално е во изградба, со шест соби и 150 селски колиби, и ќе биде првиот бренд со пет ѕвезди во регионот. Посетете го сега, пред тајната да се открие.
Кога да се оди
Планирајте патување за Велигден за да ги видите единствените верски процесии во секој поголем град и да уживате во неверојатната глетка на цветањето на црешите во долината Јерте, дом на околу 1,5 милиони цветни дрвја. Раното лето и есента се исто така поволни периоди од аспект на временските прилики, а во октомври Фестивалот Хиспанидад носи спектакуларни коњички приредби во провинцијата Касерес.
Кога да не се оди
Времето во Екстремадура може да биде екстремно, како што и името кажува, па избегнувајте ги жештините во јули и август, како и студените месеци декември, јануари и февруари.
.webp){kind=icon}
