Како мајсторот на ризични инвестиции неочекувано стана владетел на Сан Сиро

Интер Милан има нов сопственик, но не од светот на спортот, туку од самиот врв на глобалните финансии. Хауард Маркс, коосновач и копретседател на „Оуктри капитал менаџмент“ (Oaktree Capital Management), стана мнозински сопственик на познатиот италијански клуб на крајот на мај 2024 година, откако кинескиот конгломерат „Сунинг“ (Suning) не успеа да го врати кредитот од 395 милиони евра земен во 2021 година.

Маркс немаше спортски амбиции. Клубот стана негов неволен „трофеј“, резултат на финансиска дисциплина, а не на спортски соништа. Како и многу други неликвидни средства во неговата кариера, Интер заврши во негови раце затоа што претходните сопственици не ги исполнија своите обврски. Сепак, во финансискиот свет во кој Маркс го изгради својот углед, ваквите можности честопати се покажуваат како најпрофитабилни.

Кој е Хауард Маркс?

Хауард Маркс (78) е еден од најпочитуваните инвеститори во областа на „загрозените“, ризични средства и кредитните инвестиции. Неговиот углед е изграден врз трпение, смиреност и инвестициска филозофија што повеќе личи на зен отколку на берзански стрес. Маркс го основал својот инвестициски фонд „Оуктри“ во 1995 година, а денес управува со средства во вредност од над 180 милијарди долари.

Инвестициските меморандуми на Маркс, напишани без сензационализам, но со длабоко разбирање на пазарот, станаа легендарни. Ворен Бафет еднаш рече дека тоа се единствените е-пораки што ги отвора веднаш кога ги добива. Маркс не прави бомбастични прогнози - тој анализира ризик, однесување на пазарот и психологија на луѓето, инсистирајќи дека најголемите приноси се постигнуваат кога мнозинството бега.

Неговиот пристап се сведува на клучна максима: „Не е важно што купувате, туку колку плаќате за тоа“. Ова јасно го дистанцира од класичните шпекуланти и преценетите акции во раст. Маркс бара можности таму каде што пазарот ја изгубил довербата.

Како Интер заврши во рацете на Маркс?

Сагата на Интер започна во 2016 година, кога беше преземен од кинескиот гигант „Сунинг“. Првичниот амбициозен проект за модернизација на клубот и борба за европски титули наскоро беше забавен од пандемијата, промените во кинеската политика кон странските инвестиции и недостигот од ликвидност. „Оуктри“ се појави како спасител во 2021 година, обезбедувајќи му на „Сунинг“ заем од 395 милиони евра, со каматна стапка од 12 проценти и обезбедување во форма на мнозински удел во клубот.

Кога „Сунинг“ не успеа да го врати долгот или да обезбеди рефинансирање на 22 мај 2024 година (преговорите со ПИМКО пропаднаа), „Оуктри“, како што беше договорено, го активира обезбедувањето и стана нов сопственик.

Што сака Маркс сега со Интер?

Засега „Оуктри“ нема планови за брза продажба. Напротив, фондот објави дека ќе обезбеди стабилност, ќе инвестира во комерцијален раст и ќе поддржува инфраструктурни проекти, вклучувајќи го и долгоочекуваниот нов стадион. Искусниот Џузепе Марота е назначен за претседател на клубот, што сигнализира континуитет во управувањето.

 

Иако самиот Маркс не е оперативно вклучен во спортските одлуки, неговото преземање одразува поширока стратегија: да се стабилизираат средствата, да се зголеми нивната пазарна вредност, а потоа, кога пазарот ќе биде подготвен, да се излезе од проектот профитабилно.

За разлика од сопствениците што влегуваат во клубовите поради слава, престиж или емоции, Маркс е сопственик по сплет на околности. Неговото присуство во фудбалот илустрира подлабока трансформација на спортот: од страст кон биланси на состојба, од трибини до табели во Ексел. Слична ситуација се случи и со градскиот ривал Милан, кој се најде под управување од „Елиот менаџмент“ (Elliott Management) по слична ситуација со неплатениот долг на неговиот кинески сопственик.

Интер: Спортски успеси и привлечни средства

Интер ја заврши сезоната 2024/2025 како второпласирана екипа во Италија, зад Наполи, и стигна до финалето на Лигата на шампионите, каде што беше поразен од ПСЖ. Спортските резултати на клубот, брендот, лојалната глобална база на навивачи и пазарниот потенцијал го прават клубот исклучително вреден, што е потврдено од интересот од потенцијалните купувачи, како што е финскиот претприемач Томас Зилијакус.

За Хауард Маркс, Интер е само уште една можност во неговото долго инвестициско патување, но можеби и најнеобично. Клуб што тој не го избра, но кој сега го носи неговиот потпис. Ако остане верен на своите принципи - дисциплина, вредност и трпение - Интер можеби нема да има харизматичен сопственик во стилот на Роман Абрамович, но ќе има нешто што често е клучно во фудбалот - стабилни темели.