text size
Во пресрет на САД опен, францускиот бренд „Лакост“ (Lacoste) лансираше ексклузивна колекција во чест на својот долгогодишен амбасадор, тенисерот Новак Ѓоковиќ. Култното лого со крокодилот беше заменето со јарец, како референца на терминот GOAT (Greatest Of All Time – најдобар на сите времиња). Со тоа „Лакост“ му оддаде почит на српскиот спортист, кој ги урна речиси сите рекорди, стекнувајќи статус на најголем тенисер во историјата.
„Новак Ѓоковиќ е дел од семејството на ‘Лакост’ повеќе од осум години, во кои освои 12 гранд-слем титули – половина од вкупниот број во неговата кариера“, истакна Тјери Гибер, генерален директор на „Лакост“. „Неговата истрајност, начинот на размислување и вредностите значително придонесоа за зајакнување на нашиот бренд“, додаде Гибер.
Лимитираната колекција, со наслов „Од крокодил до јарец“, се состои од пет парчиња облека – поло-маица, класична маица, горен дел од тренерка, качкет и панталони, соопшти „Лакост“. Особено впечатлив дел од колекцијата е горниот дел од тренерката, кој го дизајнираше креативната директорка на брендот, Пелагија Колотороус, и зрачи со духот на њујоршкиот шик од 1960-тите години.
Њујорк има посебно значење за историјата на францускиот бренд – токму таму францускиот тенисер Рене Лакост го добил прекарот Крокодил, откако ги освоил САД-шампионатите во 1926 и 1927 година и ја осмислил поло-маицата, која подоцна стана заштитен знак на брендот.
Новак Ѓоковиќ, кој повеќе од една деценија доминира во светскиот тенис, досега има освоено 24 гранд-слем титули, што претставува рекорд во историјата на спортот. Исто така тој ги држи рекордите по број на недели поминати на првото место на АТП-листата, најголем број победи на гранд-слем натпревари и по освоени турнири Мастерс 1000. Тој е единствениот тенисер во светот што секој турнир од оваа серија го освоил најмалку двапати.
Ѓоковиќ, познат како поборник за здрав начин на живот и одржливост, досега соработувал со многу глобални брендови, а покрај „Лакост“, главни спонзори на неговиот изглед во моментов се „Хед“ (Head) за рекети, „Асикс“ (Asics) за обувки и производителот на часовници „Убло“ (Hublot). Претходно соработувал со брендови како „Адидас“ (Adidas), „Серџо Тачини“ (Sergio Tacchini) и „Уникло“ (Uniqlo), како и со производителите на часовници „Одемар Пиге“ (Audemars Piguet) и „Сеико“ (Seiko).
Исто така, претходно ги рекламираше автомобилските производители „Пежо“ (Peugeot) и „Мерцедес“ (Mercedes-Benz), како и „Лирџет“ (Learjet), производител на цивилни и воени авиони. Сепак, долгогодишната соработка со „Пежо“ (Peugeot), која започна во 2014 година, беше прекината во 2022 година, кога Ѓоковиќ одлучи да не се вакцинира против ковид-19 – одлука што многумина ја сметаа за контроверзна. Истата година австралиските власти го задржаа на аеродромот во Мелбурн кога се обиде да отпатува на Австралија опен, а потоа му издадоа тригодишна забрана за влез, со што му оневозможија учество на еден од четирите најголеми тениски турнири во светот.
.webp){kind=icon}
