Тешки се времињата за „Ауди“, дел од „Фолксваген АГ“. Глобалната продажба е намалена, трговските тензии се зголемуваат, а загриженоста за намалување на производството и губење работни места е распространета во германската автомобилска индустрија. Но она што го зголемува моралот на вработените, вели извршниот директор на „Ауди“, е влегувањето на брендот во најпрестижниот тркачки циркус во светот.
„Го потценив влијанието на Формула 1 врз тимот на „Ауди“, врз нивото на енергија, врз посветеноста“, рече Гернот Долнер во едно интервју. „Духот, организацијата на тимот, брзината на донесување одлуки, начинот на кој тимовите комуницираат едни со други, токму така сакам тимовите на ‘Ауди’ да функционираат.“
Коментарите на Долнер во Берлин дојдоа откако „Ауди“ го претстави дизајнот на својот тркачки автомобил, а по преземањето на целосната контрола врз швајцарската компанија за мотоспорт „Заубер“. Со купувањето и влегувањето во Ф1, „Ауди“ се стреми да ја зацврсти својата репутација за инженерска извонредност. На брендот му е потребно тоа. Со падот на продажбата на клучните пазари, „Ауди“ ја намали својата цел за профитабилност двапати минатата година.
Како и неговите германски конкуренти, „Ауди“ се соочува со повисоки американски царини и интензивна конкуренција во Кина. Но застарената линија на модели го стави зад „Мерцедес Бенц“ (Mercedes-Benz Group AG) и БМВ (BMW AG), кои лансираат нови автомобили со напреден софтвер и подолг досег на батерии.
За финансирање на проектот Ф1, „Ауди“ обезбеди капитална инвестиција од „Катар инвестмент ауторити“ (Qatar Investment Authority) во 2024 година. Компанијата е отворена за можноста за продажба на дополнителен удел во тимот во иднина, рече Долнер, иако во моментов ништо не е планирано.
„Можно е, но во моментов не е дел од планот“, рече извршниот директор. „Задоволни сме од поставеноста што ја имаме и ги имаме сите опции.“
„Ауди“ влегува во Ф1 бидејќи спортот продолжува да добива на популарност низ целиот свет, благодарение на успехот на серијата на Нетфликс, „Формула 1: Вози за да преживееш“. Компанијата се обложува дека видливоста на Ф1 ќе ѝ помогне да привлече повеќе жени и помлади потрошувачи.
Популарноста на спортот исто така привлекува инвеститори, а вредноста на тимовите брзо расте. Тимот на Мерцедес Ф1 продаде удел минатата година за околу 6 милијарди долари, додека актуелниот шампион Мекларен е проценет на повеќе од 4 милијарди долари.
„Ауди“ има „доста добро чувство“ за тоа каде е неговата вредност во моментов, рече Долнер, иако одби да даде точна бројка. „За нас, тоа е долгорочна инвестиција и тие бројки би станале релевантни само ако разгледаме дополнителен инвеститор, но тоа не е наш фокус во моментов.“
Заедно со новиот учесник „Кадилак“, „Ауди“ влегува во Ф1 бидејќи стапуваат во сила нови регулативи за моќноста на моторот, кои би можеле да ја потресат конкуренцијата. Оваа година ограничувањето на трошоците е зголемено на 215 милиони долари.
Сепак, тимот ќе ја започне сезоната како аутсајдер, откако Заубер заврши деветти од десет тима во шампионатот минатата година.
Тимот на Ауди Ф1 минатата година отвори нова технолошка канцеларија во Велика Британија за да биде поблиску до другите тимови и да привлече вработени од конкурентите. Погонскиот склоп ќе се развива во Германија, додека шасијата ќе се произведува во Швајцарија.
Првата трка од новата сезона ќе се одржи во Мелбурн на 8 март. Возачите на „Заубер“ од минатата година, Нико Хилкенберг и Габриел Бортолето, ќе продолжат да возат за „Ауди“.
.webp){kind=icon}
