Може ли убиството на наркобосот да го загрози Светското првенство?

Мексиканските власти реагираа брзо за да ја уверат ФИФА дека безбедноста е на ниво и дека Гвадалахара може да го задржи статусот на домаќин на Светското првенство ова лето, откако убиството на најмоќниот водач на наркокартел во Мексико предизвика немири низ целиот град. Пред два дена најмоќниот мексикански наркобос Немесио Осегера Сервантес, познат и како Ел Менчо, беше убиен во воена операција, а тоа предизвика немири и насилства на улиците. Поранешниот полицаец го водеше наркокартелот Халиско нова генерација (ЦЈНГ), кој самиот го основа, од 2011 година. Како реакција на воената акција, членови на бандата блокираа улици во повеќе мексикански сојузни држави, меѓу кои Халиско, Мичоакан, Агваскалиентес, Тамаулипас и Гванахуато, користејќи запалени автомобили, камиони и автобуси. 

Локалните власти и организаторите разговараа со ФИФА за да потврдат дека безбедносните стандарди ќе бидат исполнети за време на турнирот, според извори запознаени со ова прашање. Се очекува понатамошните состаноци да обезбедат подетални информации за безбедносните мерки за време на турнирот.

 

Близината на запалените барикади на патот до стадионот на Светското првенство, кој е оддалечен помалку од една милја, според локалните медиуми, беше една од загриженостите што ФИФА ги отвори со локалните претставници, рече еден од изворите, зборувајќи под услов да остане анонимен поради доверливоста на информациите.

Претставниците на локалните организатори и ФИФА не одговорија на барањата за коментар. Прашана на нејзината дневна утринска прес-конференција во вторникот за безбедноста пред претстојното Светско првенство, претседателката Клаудија Шајнбаум рече дека Мексико е целосно подготвено да биде домаќин на настанот и ја гарантира неговата безбедност.

„Не постои никаков ризик, ниту еден“, рече таа кога беше прашана за безбедноста на посетителите.

Четири професионални фудбалски натпревари беа откажани во Мексико во неделата откако се случија насилни настани во државата Халиско, каде што се наоѓа Гвадалахара, кое потоа се прошири и во други региони. Се очекува безбедноста да биде засилена за натпреварот в среда во Керетаро помеѓу Мексико и Исланд.

Гвадалахара, третиот по големина град во земјата, треба да биде домаќин на четири натпревари од Светското првенство, почнувајќи од 11 јуни. Распоредот вклучува два големи натпревара: Мексико против Јужна Кореја на 18 јуни и Уругвај против Шпанија на 26 јуни. Покрај тоа, Колумбија треба да игра во Гвадалахара.

Во зависност од исходот од плејофот, други земји можеби ќе мора да патуваат во Гвадалахара за првото коло од турнирот, потенцијално вклучувајќи ги Данска, Република Македонија, Чешка, Ирска, Конго, Јамајка и Нова Каледонија.

Повлекувањето на Гвадалахара од функцијата домаќин на Светското првенство би претставувало сериозен удар врз имиџот на Мексико и би имало негативно влијание врз економијата.

„Потенцијалното откажување како град домаќин би можело да влијае на економската активност оваа година“, напиша Марко Овиедо, виш стратег во „ХП Инвестиментос“ (XP Investimentos), во белешка до клиентите. „Засега ја исклучуваме таа можност, бидејќи владата можеби ќе може да го ограничи насилството пред почетокот на Светското првенство.“