Актерите Ева Лонгорија и Џејми Фокс меѓу инвеститорите во ВИ стартап проценет на 11 милијарди долари

Компанијата за развој на вештачка интелигенција „ИлевнЛабс“ (ElevenLabs) привлече бран нови инвеститори, вклучувајќи ги „Блекрок“, „Енвидија“, актерите Џејми Фокс и Ева Лонгорија, како и Хванг Донг-хјук, креаторот на хит серијата „Скуид гејм“ (Squid Game).

Новите инвеститори се придружија на претходната рунда на финансирање од Серијата Д, која ја процени „ИлевнЛабс“ на 11 милијарди долари, соопшти компанијата во блог пост во вторник. Стартапот сега собра повеќе од 550 милиони долари.

Bloomberg Mercury

 

„ИлевнЛабс“, кој произведува софтвер за клонирање на човечки глас, е меѓу истакнатите стартапи за вештачка интелигенција кои сакаат да се прошират во Холивуд, индустрија која како да пружа отпор кон технологијата. Иако „ИлевнЛабс“ почна прво да продава на бизниси за маркетинг и поддршка на клиенти, сега се обидува да ги искористи буџетите за медиумска продукција. Стартапот претходно ги регрутираше актерите Метју Меконахи и Мајкл Кејн за да им дозволи на нивните гласови да се користат во производите на „ИлевнЛабс“.

Компанијата ги става инвестициските акции во стартапот на располагање на својата „заедница на креатори и мали инвеститори“ преку „Робинхуд“ (Robinhood Ventures), која нуди пристап до фирми што не котираат на берза, според блог постот.

„ИлевнЛабс“ соопшти дека надминал 500 милиони долари од т.н. „annual recurring revenue – ARR”, вообичаена метрика што стартапите со вештачка интелигенција ја користат за да го следат растот на продажбата.

Компанијата ги додаде и „Банко Сантандер“ (Banco Santander SA), “ДЕ Шо“ (DE Shaw & Co) и „Велингтон Менаџмент“ (Wellington Management Group) како нови инвеститори. „Енвидија“ инвестираше преку својот огранок за ризичен капитал „ЕнВенчрс“ (NVentures).

-Со помош на Јажу Сун