Под знак прашалник изградбата на речиси половина од планираните податочни центри во САД

Дури половина од предложените проекти за центри за податоци во САД се изложени на ризик од одложувања или откажувања поради растечките политички реакции и сложеноста на градењето ваков тип објекти, според инвестициската фирма „Кимериџ Енерџи Менаџмент“ (Kimmeridge Energy Management Co.)

„Овој своевиден Силициумска долина модел се соочува со ограничување на реалната инфраструктура“, рече Бен Дел, управувачки партнер и ко-основач на „Кимериџ“, во интервју во среда во седиштето на Блумберг Њуз во Њујорк.

„Кимериџ“ има удели во производители на природен гас и во „Комонвелт ЛНГ“ (Commonwealth LNG), планиран терминал за извоз на горива од Луизијана. Иако се очекува побарувачката за гас во САД да се зголеми со изградбата на нови електрани за обезбедување електрична енергија за бумот на вештачката интелигенција, Дел смета дека одложувањата на проектите за центри за податоци веројатно ќе резултираат со намалување на тие прогнози.

Американските производители на гас имаат големи надежи дека вештачката интелигенција ќе ја зголеми потрошувачката на горивото, кое се тргуваше по релативно ниски цени на домашно ниво во поголемиот дел од изминатата деценија, бидејќи понудата од нафта и гас добиени со т.н. хидраулично фрактурирање (fracking) ја надмина во голема мера побарувачката. Но, скептицизмот на инвеститорите во врска со трошењето на големите технолошки компании и јавното противење на центрите за податоци создаваат дополнителни пречки за оние што сметаат на големи продажби на гас.

Иако поголемиот дел од 30-те милијарди кубни метри очекуван раст на побарувачката на гас во САД дневно е од извозот на течен природен гас, Дел вели дека околу пет до 10 милијарди кубни метри дневно би можеле да бидат поттикнати од центрите за податоци - иако одложувањата би можеле да значат дека потрошувачката поврзана со вештачката интелигенција е на долниот крај од тој опсег.

Центрите за податоци брзо стануваат политичко прашање за претстојните избори за Конгресот во САД, а растечкиот отпор и судските постапки на локално ниво ќе го зголемат ризикот од одложувања или откажувања, рече Дел. Двопартиското противење на центрите за податоци расте во државите, вклучувајќи ги Пенсилванија, Тексас и Охајо, кои некогаш се сметаа за попријателски настроени кон проектите, додаде тој.

Според Дел, идеалниот предлог за центар за податоци би бил „нула влијание“, без нето ефект врз потрошувачката на вода, земјиштето, емисиите или цените на електричната енергија, рече тој.

-Со помош на Џулијан Хаст и Кевин Кроули