Зошто ЕУ се откажува од мега-податочни центри за вештачка интелигенција?

Европската Унија (ЕУ) ги намали плановите за изградба на центри за податоци за поддршка на вештачката интелигенција (ВИ), објавувајќи повик за предлози што вклучуваат помали објекти од првично планираните.

Блокот бара понуди за изградба на четири центри за податоци со најмалку 25.000 единици за графичка обработка (GPU) и три со најмалку 40.000 процесори во првата фаза, според извори запознаени со ситуацијата кои зборуваа под услов на анонимност бидејќи информациите не се јавни. „Тагесшпигел“ (Tagesspiegel) претходно објави за намалувањето на програмата.

Плановите предвидуваат приватниот сектор да ги финансира повеќето проекти, додека субвенциите од ЕУ и поединечните државни субвенции би покриле до една третина од вкупните трошоци, велат изворите. Оригиналниот концепт предвидуваше до пет центри за податоци, секој со 100.000 напредни чипови.

Намалените планови претставуваат чекор назад за Европа додека се обидува да го надомести заостанувањето во трката за ВИ, каде што сè повеќе доминира САД и Кина. Американските компании, вклучувајќи ги „Опен еј-ај“ (OpenAI), „Антропик“ (Anthropic) „Пи Би Си“ (PBC) и „Алфабет“ (Alphabet Inc.), инвестираат стотици милијарди долари во центри за податоци што се користат за развој на најнапредните модели.

Портпаролот на Европската комисија (ЕК), извршната гранка на ЕУ, не одговори веднаш на барањето за коментар.

Барем некои конзорциуми би можеле повторно да разгледаат понуди за проекти ако ЕУ ја намали големината на центрите за податоци, бидејќи таков потег ги менува стимулациите за соработка, објави Блумберг претходно овој месец, повикувајќи се на извори запознаени со процесот.

Лидерите на Г7 ја направија вештачката интелигенција една од клучните точки за дискусија на состанокот што оваа недела го организираше францускиот претседател Емануел Макрон. Европа се бори да изгради компании за вештачка интелигенција кои можат да се натпреваруваат со водечките американски конкуренти, проблем што се влоши со неодамнешната наредба на администрацијата на Трамп со која се ограничува пристапот до најновите модели на вештачка интелигенција за странци.

ЕУ би можела да придонесе со најмногу 100 милиони евра за помали објекти и 200 милиони евра за поголеми, со соодветни средства од земјите-членки, велат изворите. Субвенциите од Унијата би можеле да пораснат на 400 милиони и 800 милиони евра во втората фаза, кога центрите за податоци би се прошириле на 75.000 и 100.000 графички процесори, соодветно, додадоа тие.