Стартап со поддршка од „Енвидија“ го олеснува проблемот со струја за дата-центрите

Долгите редици за приклучување на преоптоварена електроенергетска мрежа ги принудија податочните центри да бараат брзи решенија за снабдување со електрична енергија, од доставување гасни турбини до промена на начинот на кој ги проектираат своите објекти.

Стартапот „Верс“ (Verse Enterprises, Inc) од Сан Франциско тврди дека неговиот софтвер може да им помогне на податочните центри да го заобиколат чекањето за приклучок така што ќе управува со батерии и соларни системи што работат надвор од мрежата.

Компанијата веќе развива софтвер кој ги анализира цените на енергијата и побарувачката за објектите да можат да ја следат сопствената потрошувачка на електрична енергија. Сега соработува со компанијата „Калибрант Енерџи“, која развива батериски системи, за во понудата да се вклучат и складирање на енергија и производство од соларни извори. Таквиот модел, тврдат тие, може да спречи преоптоварување на мрежата во периоди на најголема побарувачка.

Компанијата смета дека на тој начин ќе ги убеди дистрибутерите на електрична енергија да го преземат дополнителниот товар што го носат податочните центри, без скапи и долготрајни инвестиции во надградба на инфраструктурата.

„Дојдовме до точка каде што чистата енергија е всушност економски исплатливо и изводливо решение бидејќи може многу брзо да се имплементира“, изјави коосновачот и главен извршен директор Сејед Мадаени.

Компанијата оваа пролет собра 54 милиони долари во инвестициска рунда од серија Б, меѓу чии инвеститори се најде и производителот на чипови „Енвидија“ (Nvidia).

Сејед Мадаени верува дека чистата енергија може да го забрза развојот на податочните центри | Verse

Тоа е дел од пошироките напори на компаниите што развиваат вештачка интелигенција да финансираат стартапи насочени кон енергетска ефикасност и со тоа да ја намалат својата сѐ поголема потрошувачка на електрична енергија. „Енвидија“ исто така инвестираше милиони долари во „Емералд“ (Emerald AI), компанија што развива сличен софтвер. 

Но вградувањето на такви системи не гарантира дека електроенергетските компании веднаш ќе ги приклучат податочните центри на мрежата, предупредува Елисон Вајс, глобална директорка за системи за складирање енергија во „Вуд Мекензи“ (Wood Mackenzie).

Пофлексибилната потрошувачка на електрична енергија може да го олесни приклучувањето, но дистрибутерите засега не дефинирале стандарди што податочните центри треба да ги исполнат за да добијат пристап до мрежата. Исто така, не е јасно дали батериските системи или сопственото производство на електрична енергија ќе помогнат во исполнувањето на тие услови.

„Нема единствен рамковен систем“, изјави таа.

Федералните регулатори наскоро треба да претстават насоки за тоа како САД ќе го забрзаат приклучувањето на податочните центри на електроенергетската мрежа. Клучно прашање е дали најголемите технолошки компании сами ќе обезбедуваат производство на електрична енергија, ќе се обврзат на пофлексибилна потрошувачка или ќе ги сносат трошоците за надградба на мрежната инфраструктура.

Падот на цените на батериите и сѐ поголемите потреби за електрична енергија поттикнаа силен раст на нивната примена. Аналитичарите очекуваат пазарот на системи за складирање енергија оваа година да порасне за 21 отсто, бидејќи побарувачката за батерии продолжува да расте и покрај царините и ограничувањата на даночните стимулации за батерии кои во голема мера се потпираат на кинески компоненти.

Во „Верс“ велат дека собраниот капитал ќе го искористат за проширување на својата технологија на повеќе од 100 локации до почетокот на следната година.