„Опен еј-ај“ го претстави новиот модел ГПТ-6 Астра, со додатни заштити

“Опен еј-ај“ воведува нова генерација на својата технологија, наречена „ГПТ-6“ (GPT-6), за која вели дека претставува важна пресвртница во нивните десетгодишни напори за развој на таканаречената општа вештачка интелигенција (Artificial General Intelligence -AGI).

Компанијата објави во четврток дека им овозможила пристап до моделот „ГПТ-6 Астра“ (GPT-6 Astra) на корисниците од бизнис секторот кои учествуваат во програмата „Дејбрејк“ (Daybreak), каде што можат да ги тестираат најнапредните модели на компанијата. “Опен еј-ај“, исто така, планира да им понуди на корисниците кои плаќаат за ChatGPT,  верзија од овој модел на ВИ со дополнителни заштитни механизми за сајбер безбедност. И двете верзии имаат вградени заштити што ги спречуваат корисниците да пристапат до најнапредните функции поврзани со сајбер безбедноста.

Претседателот на “Опен еј-ај“, Грег Брокман, на брифингот изјави дека верува оти новиот модел еден ден ќе се смета за рана фаза на општата вештачка интелигенција (AGI), или софтвер кој ги надминува луѓето во широк спектар на задачи. Овој концепт стана една од главните цели на целата индустрија за ВИ, иако не постои општо прифатена дефиниција за AGI, а многумина сè уште се сомневаат дека такво ниво на вештачка интелигенција е достижно.

„Мислам дека сè уште има многу простор за подобрување, но овој модел претставува значајна квалитативна промена“, рече тој за новиот модел. Тој претставува „пресвртница во тоа кои работни места луѓето можат да ги префрлат на вештачката интелигенција и како таа може да им помогне“, рече Брокман, подоцна додавајќи дека му остава „на читателот сам да одлучи дали, според неговото мислење, се квалификува како AGI“.

“Опен еј-ај“ и „Антропик“ се натпреваруваат жестоко за развој на сè понапредни системи за вештачка интелигенција, додека во исто време расте загриженоста за тоа колку се безбедни, особено по серија инциденти во кои се вклучени нивните технологии. Ненамерниот хакерски напад од страна на моделите на “Опен еј-ај“ на „Хагинг ф3јс“ (Hugging Face) во јули предизвика стравувања дека агентите на вештачката интелигенција би можеле да излезат од контрола, предизвикувајќи обновени повици од некои технолошки лидери и владини претставници за ограничувања на технологијата.

“Опен еј-ај“ претходно изјави дека верува дека моделот Астра достигнал „клучно ниво на способност за сајбер безбедност“, што значи дека може да идентификува и развие начини за искористување на претходно непознати безбедносни слабости без човечка интервенција. Компанијата ги зајакна заштитните механизми на моделот за да спречи негова злоупотреба, особено во областа на сајбер-безбедноста. Овој потег дојде откако “Опен еј-ај“ во август одлучи привремено да суспендира дел од работата на моделот со цел да инсталира посилна заштита, бидејќи утврди дека моделот станал многу способен за решавање задачи во областа на сајбер-безбедноста.

Новиот модел  е особено вешт во управувањето со компјутерот во име на корисникот, соопшти компанијата, така што може да извршува разни деловни задачи и да презема посложени и подолготрајни работи од претходните модели.