Авиокомпаниите ќе можат да ја обезбедат најновата 5G технологија во своите авиони, покрај претходните генерации на мобилна технологија, бидејќи Европската комисија (ЕК) ја ажурираше уредбата за спектарот на мобилни комуникации во авионите, назначувајќи одредени фреквенции на 5G технологијата, се наведува во соопштение на Комисијата објавено во четвроткот.
Патниците на летовите во рамки на ЕУ ќе можат да ги користат своите мобилни телефони до максимум, исто како и со копнена 5G мобилна мрежа.
Тиери Бретон, еврокомесар за внатрешен пазар, изјави:
„5G ќе овозможи иновативни услуги за луѓето и можности за раст за европските компании. Небото повеќе не е лимит кога станува збор за опциите што ги нуди супербрзата конекција со можност за масовно поврзување“.
Од 2008 година, одлуката на Комисијата дозволува авиокомпаниите да обезбедуваат можност за пораки, телефонски повици и услуги за размена на податоци за патниците кои летаат во ЕУ. Новото ажурирање на одлуката на Комисијата во однос на мобилните комуникации во летовите го отвора патот за широка примена на 5G услугите.
Услугата се обезбедува во кабината на авионите со помош на специјална мрежна опрема, т.н. пико ќелија (анг. pico-cell), за поврзување на корисниците и насочување на повици, пораки и податоци (обично преку сателитска мрежа), помеѓу авионот и копнената мобилна мрежа.
Европската комисија во соопштението наведува дека измени претрпела и одлуката за фреквенциските опсези од 5 GHz, со што стануваат достапни за Wi-Fi во патниот транспорт, на пример во автомобили и автобуси. Измената на одлуката поставува основа за иновации во автомобилската индустрија и потенцијално за апликациите за метаверзумот. Според измената на одлуката, земјите-членки треба да ги направат фреквенциските опсези од 5 GHz достапни за употреба во патнички возила што е можно поскоро, а најдоцна до 30 јуни 2023 година.
.webp){kind=icon}
