Во првите два дена од лансирањето, дигитален асистент во јавниот сектор базиран на вештачка интелигенција, АДА, опслужи 1.321 граѓанин и со нив размени 24.877 пораки, разговори што граѓаните ги имаат донесено до бараните информации и документи, објави вицепремиерот задолжен за економски прашања Фатмир Битиќи на својот профил на Фејсбук.
„Транспарентност, ефективност и ефикасност е целта што ја сакавме и која се постигнува со АДА веќе во првите 48 часа од нејзиното лансирање. Дигитализацијата неизбежно се случува, засилено веќе со години во приватниот сектор, а сега чекорот го фаќа и јавниот сектор“, наведе Битиќи во објавата и истакна дека во последните 48 часа АДА била активна 166.000 секунди или 46 часа.
Вицепремиерот посочува дека АДА е дигитална алатка, дигитален асистент базиран на вештачка интелигенција што дава информации и услуги за граѓаните и бизнис-секторот.
„Во оваа прва фаза, АДА на сите заинтересирани граѓани и компании ќе им ги нуди сите информации за поддршка на инвестиции по планот за економски раст, сите повици од програмата на ФИТР, како и условите за инвестирање во нашата земја преку ТИРЗ. Во иднина АДА ќе дава и други услуги од јавниот сектор“, посочува Битиќи.
Тој нагласува дека во оваа фаза АДА обезбедува првични информации и податоци за потенцијалните и постојните инвеститори, а крајната цел на разговорот со АДА е да ги поврзе инвеститорите и граѓаните со вработените административни службеници од соодветната институција, со цел заокружување на процесот преку потпишување договори за финансиска поддршка за инвестиции или апликација на некој од повиците на ФИТР.
„АДА ги сумира на едно место сите потребни информации за граѓаните и ги води во процесот додека да го најдат она што вистински одговара на нивните потреби од удобноста на нивниот дом или работно место, а од друга страна ги унапредува работните места, процесите и ефективноста и продуктивноста на вработените во јавниот сектор. АДА е промената што ни е потребна и за која постојано зборуваме“, напиша вицепремиерот Битиќи во објавата.
.webp){kind=icon}
