.webp){kind=icon}
Ова е најновата ставка во листата на помалку познати технолошки алатки која ви овозможува да купите авионска карта по најдобра цена, секој пат!
Изгледа бесмислено да се грижите за цената на авионски билет. Ако имате среќа, ќе зграбите попуст, но во најголем број случаи би сте се премислувале до бесвест. Дали треба да резервирате или да чекате? Може ли некој навистина да ги победи авиокомпаниите во нивната сопствена игра?
„Гугл“, кој е во сопственост на „Алфабет“ (Alphabet), сака да го промени тоа. На 3-ти април, гигантот за интернет пребарување објави нова функција за гаранција на цените (анг. price-guarantee feature), која секојдневно ќе ги следи цените и на потрошувачите ќе им ја плаќа разликата доколку дојде до пад на цената на купените билети - во периодот од моментот на резервација, до полетувањето.
Засега, ова најмногу се однесува за летовите во САД, на авиокомпаниите „Алјаска ерлајнс“ (Alaska Airlines), „Спирит“ (Spirit) и „Хавајан ерлајнс“ (Hawaiian Airlines). Можете исто така да најдете билети за меѓународни летови од САД, како што се летовите на „Вестџет“ (WestJet) од Канада.
Ако повратните билети за летот што сте го резервирале ги исполнуваат условите за тоа, ќе забележите дека веднаш над цената ќе се појави значка што ја гарантира таа цена, без разлика дали станува збор за стандардна, економична или премиум класа. Потоа треба да направите резервација директно преку Гугл, со кликнување на линкот „Резервирај преку Гугл“ во резултатите од пребарувањето. Ова значи дека треба да ги внесете вашите информации и детали за плаќање во платформата на Гугл, кој ќе ги пренесе до авиокомпанијата, која потоа ќе ја потврди вашата резервација.
Bloomberg Mercury
„Сакаме да ги подигнеме вашите сознанија за цените на ново ниво“, вели Џејд Кеслер, менаџер за производи во „Гугл флајтс“. „Се надеваме дека ќе го понудиме ова на што е можно повеќе корисници и ќе го прошириме овој концепт надвор од опцијата 'Резервирај преку Гугл'“. Иако нема официјален рок, oд „Гугл“ велат дека нивниот долгорочен план е да ја применат функцијата на што е можно повеќе летови во САД, но и кај меѓународните летови, преку голем број авиокомпании.
Во однос на повратот на средства, корисниците ќе добијат е-пошта и ќе видат дека износот автоматски ќе се појави на нивната сметка на „Гугл пеј“ (Google Pay). Потоа тие пари ќе можат да ги префрлат на лична банкарска сметка. Оние кои немаат сметка на „Гугл пеј“ ќе добијат инструкции како да го инсталираат за да пристапат до средствата.
Од „Гугл“ одбија да кажат колку често очекуваат дека ќе мора да им враќаат пари на клиентите доколку цените паѓаат, но повторуваат дека се уверени во прецизноста на нивните предвидувачки алгоритми.
Од таму тврдат дека нема да им наплаќаат на авиокомпаниите за резервирање летови преку опцијата „Резервирај преку Гугл“, ниту пак ќе добиваат процент од приходите од авиокомпаниите поради користење на функцијата. Сите трошоци ќе бидат на товар на пребарувачот. Функцијата за гаранција на цените на „Гугл“ се придружува кон низата алатки за клиенти на компанијата кои ги следат цените на авиобилетите, како што се табелата за цени, истражувањето со мапи и предупредувањето на корисниците за промените на цените.
„Се надеваме дека луѓето ќе му веруваат на 'Гугл флајтс' секогаш кога ќе треба да направат добра зделка за воздушниот сообраќај, а гаранцијата на цената ќе помогне уште повеќе да се изгради таа доверба“, вели Кеслер.
Тајмингот се чини дека е соодветен, бидејќи патниците стануваат почувствителни на нивото на цените во време на горлива инфлација и патуваат помалку. „Гугл“ започна пилот програма за оваа функција за гаранција на цената во 2019 година, но ја паузираше. Продолжи во 2022 година со јавно тестирање во четвртиот квартал.
Други начини за заштеда
„Хопер“ (Hopper), апликацијата за резервации, најмногу може да се спореди со оваа функција. Нејзината опција „замрзнување на цените“ постои од 2019 година. Им овозможува на корисниците да платат цена која е пропорционална на цената на летот, со цел да ја обезбедат во момент кога не се подготвени да направат резервација. (Неодамнешно пребарување на апликацијата „Хопер“ покажува надомест од 30 долари за замрзнување на билетите за повратна карта до Перу од 350 долари за јуни 2023 година). Ако цената падне, ќе платите пониска цена. Од „Хопер“ велат дека 55 отсто од луѓето кои ја користеле функцијата минатата година заштедиле пари бидејќи од таму го покриваат зголемувањето на цените.
Ако претпочитате да резервирате директно во авиокомпанијата, не е тајна дека правилото на американското Министерство за транспорт бара американските авиокомпании да обезбедат рефундирање ако клиентот го побара тоа во рок од 24 часа од правењето на резервацијата. Авионската карта мора да се купи најмалку седум дена пред полетување. Но, користењето на ова правило заради грејс период ако најдете билет по подобра цена кратко време по резервирањето не е секогаш безбедно.
„Ризикувате да се најдете во ситуација да најдете подобра цена, да ја откажете претходната резервација и потоа да направите нова резервација, но пониската цена што сте ја виделе може веќе да не е достапна. Тоа може да се случи многу брзо“, вели Кервин Мекензи, ветеран во авијацијата и основач на „Пасрајдер“ (Passrider.com).
