.webp){kind=icon}
Социјалната мрежа X, порано позната како Твитер, ја ажурираше својата политика за приватност за да вклучи нов вид кориснички податоци што планира да ги собере - биометриски.
„Врз основа на вашата согласност, може да ги собираме и користиме вашите биометриски информации за безбедност и идентификација“, се наведува во новата политика на компанијата. X не дефинира што смета за биометриско, иако други компании го користеа терминот за да опишат податоци собрани од лицето, очите и отпечатоците од прсти на една личност. Претставник на X со седиште во Сан Франциско ја потврди новата промена на политиката, но не даде повеќе детали.
Bloomberg
Компаниите за социјални медиуми долго време привлекуваат критики од корисниците и регулаторите низ светот за информациите што ги собираат и како ги користат тие податоци, вклучувајќи ја и продажбата на реклами приспособени на интересите и историјата на пребарување на едно леце. Не е јасно како X ќе ги собере биометриските податоци или како може да се користат. Илон Маск, кој го купи Твитер минатата година, рече дека еден од неговите приоритети е да ја ослободи страницата од неавтентични сметки и да поттикне повеќе корисници да користат услуги што поминуваат низ системот за проверка, што покажува дека корисникот плаќал осум долари месечно и дека е најверојатно човек.
X има намера да собира информации за работните места на корисниците и историјата на образованието. „Можеме да ги собираме и користиме вашите лични податоци (како што се вашата историја на вработување, образовна историја, преференции за вработување, вештини и способности, активност за барање работа и ангажман итн.) за да ви препорачаме потенцијални работни места, за да ги споделиме со потенцијалните работодавци кога аплицирате за работа, да им овозможите на работодавците да најдат потенцијални кандидати и да ви покажат порелевантно рекламирање“, се наведува во ажурираната политика за приватност.
Претходната политика на приватност, која е во сила до 29 септември, не вклучуваше референци за биометриски податоци или историја на работа и вработување.
Предложената колективна тужба претходно оваа година тврдеше дека X незаконски ги снимал, складирал и користел биометриските податоци на жителите на Илиноис без согласност. X не ги информирал соодветно поединците што имале интеракција (свесно или не) со Твитер дека ги собира или ги складира нивните биометриски идентификатори на секоја фотографија што содржи лице што е поставено на Твитер, се наведува во тужбата поднесена на 11 јули.
